9. дхаммачетийасуттам̣

364. евам̣ ме сутам̣ – екам̣ самайам̣ бхагава̄ саккесу вихарати меда̄л̣упам̣ [метал̣ӯпам̣ (сӣ.), медал̣умпам̣ (пӣ.)] на̄ма сакйа̄нам̣ нигамо. тена кхо пана самайена ра̄джа̄ пасенади косало нагаракам̣ ануппатто хоти кеначидева каран̣ӣйена. атха кхо ра̄джа̄ пасенади косало дӣгхам̣ ка̄ра̄йанам̣ а̄мантеси – ‘‘йоджехи, самма ка̄ра̄йана, бхадра̄ни бхадра̄ни йа̄на̄ни, уййа̄набхӯмим̣ гаччха̄ма субхӯмим̣ дассана̄йа̄’’ти [субхӯмидассана̄йа̄ти (дӣ. ни. 2.43)]. ‘‘евам̣, дева̄’’ти кхо дӣгхо ка̄ра̄йано ран̃н̃о пасенадисса косаласса пат̣иссутва̄ бхадра̄ни бхадра̄ни йа̄на̄ни йоджа̄петва̄ ран̃н̃о пасенадисса косаласса пат̣иведеси – ‘‘йутта̄ни кхо те, дева, бхадра̄ни бхадра̄ни йа̄на̄ни. йассада̄ни ка̄лам̣ ман̃н̃асӣ’’ти. атха кхо ра̄джа̄ пасенади косало бхадрам̣ йа̄нам̣ абхирухитва̄ бхадрехи бхадрехи йа̄нехи нагаракамха̄ ниййа̄си махачча̄ ра̄джа̄нубха̄вена. йена а̄ра̄мо тена па̄йа̄си. йа̄ватика̄ йа̄насса бхӯми йа̄нена гантва̄ йа̄на̄ паччорохитва̄ паттикова а̄ра̄мам̣ па̄виси. аддаса̄ кхо ра̄джа̄ пасенади косало а̄ра̄ме джан̇гха̄виха̄рам̣ анучан̇камама̄но анувичарама̄но руккхамӯла̄ни па̄са̄дика̄ни паса̄данӣйа̄ни аппасадда̄ни аппаниггхоса̄ни виджанава̄та̄ни мануссара̄хассеййака̄ни [мануссара̄хасеййака̄ни (сӣ. пӣ.)] пат̣исалла̄наса̄руппа̄ни. дисва̄на бхагавантам̣йева а̄раббха сати удапа̄ди – ‘‘има̄ни кхо та̄ни руккхамӯла̄ни па̄са̄дика̄ни паса̄данӣйа̄ни аппасадда̄ни аппаниггхоса̄ни виджанава̄та̄ни мануссара̄хассеййака̄ни пат̣исалла̄наса̄руппа̄ни, йаттха судам̣ майам̣ там̣ бхагавантам̣ пайирупа̄са̄ма арахантам̣ самма̄самбуддха’’нти.

365. атха кхо ра̄джа̄ пасенади косало дӣгхам̣ ка̄ра̄йанам̣ а̄мантеси – ‘‘има̄ни кхо, самма ка̄ра̄йана, та̄ни руккхамӯла̄ни па̄са̄дика̄ни паса̄данӣйа̄ни аппасадда̄ни аппаниггхоса̄ни виджанава̄та̄ни мануссара̄хассеййака̄ни пат̣исалла̄наса̄руппа̄ни, йаттха судам̣ майам̣ там̣ бхагавантам̣ пайирупа̄са̄ма арахантам̣ самма̄самбуддхам̣. кахам̣ ну кхо, самма ка̄ра̄йана, етарахи со бхагава̄ вихарати арахам̣ самма̄самбуддхо’’ти? ‘‘аттхи, маха̄ра̄джа, меда̄л̣упам̣ на̄ма сакйа̄нам̣ нигамо. таттха со бхагава̄ етарахи вихарати арахам̣ самма̄самбуддхо’’ти. ‘‘кӣвадӯре [кӣвадӯро (сӣ. сйа̄. кам̣. пӣ.)] пана, самма ка̄ра̄йана, нагаракамха̄ меда̄л̣упам̣ на̄ма сакйа̄нам̣ нигамо хотӣ’’ти? ‘‘на дӯре, маха̄ра̄джа; тӣн̣и йоджана̄ни; сакка̄ диваса̄васесена ганту’’нти. ‘‘тена хи, самма ка̄ра̄йана, йоджехи бхадра̄ни бхадра̄ни йа̄на̄ни, гамисса̄ма майам̣ там̣ бхагавантам̣ дассана̄йа арахантам̣ самма̄самбуддха’’нти. ‘‘евам̣, дева̄’’ти кхо дӣгхо ка̄ра̄йано ран̃н̃о пасенадисса косаласса пат̣иссутва̄ бхадра̄ни бхадра̄ни йа̄на̄ни йоджа̄петва̄ ран̃н̃о пасенадисса косаласса пат̣иведеси – ‘‘йутта̄ни кхо те, дева, бхадра̄ни бхадра̄ни йа̄на̄ни. йассада̄ни ка̄лам̣ ман̃н̃асӣ’’ти. атха кхо ра̄джа̄ пасенади косало бхадрам̣ йа̄нам̣ абхирухитва̄ бхадрехи бхадрехи йа̄нехи нагаракамха̄ йена меда̄л̣упам̣ на̄ма сакйа̄нам̣ нигамо тена па̄йа̄си. тенева диваса̄васесена меда̄л̣упам̣ на̄ма сакйа̄нам̣ нигамам̣ сампа̄пун̣и. йена а̄ра̄мо тена па̄йа̄си. йа̄ватика̄ йа̄насса бхӯми йа̄нена гантва̄ йа̄на̄ паччорохитва̄ паттикова а̄ра̄мам̣ па̄виси.

366. тена кхо пана самайена самбахула̄ бхиккхӯ аббхока̄се чан̇каманти. атха кхо ра̄джа̄ пасенади косало йена те бхиккхӯ тенупасан̇ками; упасан̇камитва̄ те бхиккхӯ етадавоча – ‘‘кахам̣ ну кхо, бханте, етарахи со бхагава̄ вихарати арахам̣ самма̄самбуддхо? дассанака̄ма̄ хи майам̣ там̣ бхагавантам̣ арахантам̣ самма̄самбуддха’’нти. ‘‘есо, маха̄ра̄джа, виха̄ро сам̣вутадва̄ро. тена аппасаддо упасан̇камитва̄ атарама̄но а̄л̣индам̣ пависитва̄ укка̄ситва̄ аггал̣ам̣ а̄кот̣ехи. вивариссати бхагава̄ те два̄ра’’нти. атха кхо ра̄джа̄ пасенади косало таттхева кхагган̃ча ун̣хӣсан̃ча дӣгхасса ка̄ра̄йанасса па̄да̄си. атха кхо дӣгхасса ка̄ра̄йанасса етадахоси – ‘‘раха̄йати кхо да̄ни ра̄джа̄ [маха̄ра̄джа̄ (сӣ. сйа̄. кам̣. пӣ.)], идхева [тенидхева (сӣ.)] да̄ни майа̄ т̣ха̄табба’’нти. атха кхо ра̄джа̄ пасенади косало йена со виха̄ро сам̣вутадва̄ро тена аппасаддо упасан̇камитва̄ атарама̄но а̄л̣индам̣ пависитва̄ укка̄ситва̄ аггал̣ам̣ а̄кот̣еси. вивари бхагава̄ два̄рам̣. атха кхо ра̄джа̄ пасенади косало виха̄рам̣ пависитва̄ бхагавато па̄десу сираса̄ нипатитва̄ бхагавато па̄да̄ни мукхена ча паричумбати, па̄н̣ӣхи ча парисамба̄хати, на̄ман̃ча са̄вети – ‘‘ра̄джа̄хам̣, бханте, пасенади косало; ра̄джа̄хам̣, бханте, пасенади косало’’ти.

367. ‘‘ким̣ пана твам̣, маха̄ра̄джа, аттхавасам̣ сампассама̄но имасмим̣ сарӣре еварӯпам̣ параманипаччака̄рам̣ кароси, миттӯпаха̄рам̣ [читтӯпаха̄рам̣ (сӣ.)] упадам̣сесӣ’’ти? ‘‘аттхи кхо ме, бханте, бхагавати дхамманвайо – ‘хоти самма̄самбуддхо бхагава̄, сва̄ккха̄то бхагавата̄ дхаммо, суппат̣ипанно бхагавато са̄вакасан̇гхо’ти. идха̄хам̣, бханте, пасса̄ми еке саман̣абра̄хман̣е парийантакатам̣ брахмачарийам̣ чаранте дасапи васса̄ни, вӣсампи васса̄ни, тим̣сампи васса̄ни, чатта̄рӣсампи васса̄ни. те апарена самайена сунха̄та̄ сувилитта̄ каппитакесамассӯ пан̃чахи ка̄магун̣ехи самаппита̄ саман̇гӣбхӯта̄ парича̄ренти. идха пана̄хам̣, бханте, бхиккхӯ пасса̄ми йа̄ваджӣвам̣ а̄па̄н̣акот̣икам̣ парипун̣н̣ам̣ парисуддхам̣ брахмачарийам̣ чаранте. на кхо пана̄хам̣, бханте, ито бахиддха̄ ан̃н̃ам̣ евам̣ парипун̣н̣ам̣ парисуддхам̣ брахмачарийам̣ саманупасса̄ми. айампи кхо ме, бханте, бхагавати дхамманвайо хоти – ‘самма̄самбуддхо бхагава̄, сва̄ккха̄то бхагавата̄ дхаммо, суппат̣ипанно бхагавато са̄вакасан̇гхо’’ти.

368. ‘‘пуна чапарам̣, бханте, ра̄джа̄нопи ра̄джӯхи виваданти, кхаттийа̄пи кхаттийехи виваданти, бра̄хман̣а̄пи бра̄хман̣ехи виваданти, гахапатайопи гахапатӣхи виваданти, ма̄та̄пи путтена вивадати, путтопи ма̄тара̄ вивадати, пита̄пи путтена вивадати, путтопи питара̄ вивадати, бха̄та̄пи бхагинийа̄ вивадати, бхагинӣпи бха̄тара̄ вивадати, саха̄йопи саха̄йена вивадати. идха пана̄хам̣, бханте, бхиккхӯ пасса̄ми самагге саммодама̄не авивадама̄не кхӣродакӣбхӯте ан̃н̃аман̃н̃ам̣ пийачаккхӯхи сампассанте вихаранте. на кхо пана̄хам̣, бханте, ито бахиддха̄ ан̃н̃ам̣ евам̣ самаггам̣ парисам̣ саманупасса̄ми. айампи кхо ме, бханте, бхагавати дхамманвайо хоти – ‘самма̄самбуддхо бхагава̄, сва̄ккха̄то бхагавата̄ дхаммо, суппат̣ипанно бхагавато са̄вакасан̇гхо’ти.

369. ‘‘пуна чапара̄хам̣, бханте, а̄ра̄мена а̄ра̄мам̣, уййа̄нена уййа̄нам̣ анучан̇кама̄ми анувичара̄ми. сохам̣ таттха пасса̄ми еке саман̣абра̄хман̣е кисе лӯкхе дуббан̣н̣е уппан̣д̣уппан̣д̣укаджа̄те дхаманисантхатагатте, на вийа ман̃н̃е чаккхум̣ бандханте джанасса дассана̄йа. тасса майхам̣, бханте, етадахоси – ‘аддха̄ име а̄йасманто анабхирата̄ ва̄ брахмачарийам̣ чаранти, аттхи ва̄ тесам̣ кин̃чи па̄пам̣ каммам̣ катам̣ пат̣иччханнам̣; татха̄ хи име а̄йасманто киса̄ лӯкха̄ дуббан̣н̣а̄ уппан̣д̣уппан̣д̣укаджа̄та̄ дхаманисантхатагатта̄, на вийа ман̃н̃е чаккхум̣ бандханти джанасса дассана̄йа̄’ти. тйа̄хам̣ упасан̇камитва̄ евам̣ вада̄ми – ‘ким̣ ну кхо тумхе а̄йасманто киса̄ лӯкха̄ дуббан̣н̣а̄ уппан̣д̣уппан̣д̣укаджа̄та̄ дхаманисантхатагатта̄, на вийа ман̃н̃е чаккхум̣ бандхатха джанасса дассана̄йа̄’ти? те евама̄хам̣су – ‘бандхукарого но [пан̣д̣укарогино (ка.)], маха̄ра̄джа̄’ти. идха пана̄хам̣, бханте, бхиккхӯ пасса̄ми хат̣т̣хапахат̣т̣хе удаггудагге абхиратарӯпе пӣн̣индрийе [пӣн̣итиндрийе (сӣ. пӣ.)] аппоссукке панналоме парадаттавутте мигабхӯтена четаса̄ вихаранте. тасса майхам̣, бханте, етадахоси – ‘аддха̄ име а̄йасманто тасса бхагавато са̄сане ул̣а̄рам̣ пуббена̄парам̣ висесам̣ джа̄нанти; татха̄ хи име а̄йасманто хат̣т̣хапахат̣т̣ха̄ удаггудагга̄ абхиратарӯпа̄ пӣн̣индрийа̄ аппоссукка̄ панналома̄ парадаттавутта̄ мигабхӯтена четаса̄ вихарантӣ’ти. айампи кхо ме, бханте, бхагавати дхамманвайо хоти – ‘самма̄самбуддхо бхагава̄, сва̄ккха̄то бхагавата̄ дхаммо, суппат̣ипанно бхагавато са̄вакасан̇гхо’ти.

370. ‘‘пуна чапара̄хам̣, бханте, ра̄джа̄ кхаттийо муддха̄васитто; пахоми гха̄тета̄йам̣ ва̄ гха̄тетум̣, джа̄пета̄йам̣ ва̄ джа̄петум̣, пабба̄джета̄йам̣ ва̄ пабба̄джетум̣. тасса майхам̣, бханте, ад̣д̣акаран̣е нисиннасса антарантара̄ катхам̣ опа̄тенти. сохам̣ на лабха̄ми – ‘ма̄ ме бхонто ад̣д̣акаран̣е нисиннасса антарантара̄ катхам̣ опа̄тетха [опа̄тенту (сӣ.) упариселасутте пана ‘‘опа̄тетха̄’’тийева диссати], катха̄парийоса̄нам̣ ме бхонто а̄гаментӯ’ти. тасса майхам̣, бханте, антарантара̄ катхам̣ опа̄тенти. идха пана̄хам̣, бханте, бхиккхӯ пасса̄ми; йасмим̣ самайе бхагава̄ анекасата̄йа париса̄йа дхаммам̣ десети, нева тасмим̣ самайе бхагавато са̄вака̄нам̣ кхипитасаддо ва̄ хоти укка̄ситасаддо ва̄. бхӯтапуббам̣, бханте, бхагава̄ анекасата̄йа париса̄йа дхаммам̣ десети. татран̃н̃атаро бхагавато са̄вако укка̄си. таменам̣ ан̃н̃атаро сабрахмача̄рӣ джан̣н̣укена гхат̣т̣еси – ‘аппасаддо а̄йасма̄ хоту, ма̄йасма̄ саддамака̄си; саттха̄ но бхагава̄ дхаммам̣ десетӣ’ти. тасса майхам̣, бханте, етадахоси – ‘аччхарийам̣ вата, бхо, аббхутам̣ вата, бхо! адан̣д̣ена вата кира, бхо, асаттхена евам̣ сувинӣта̄ париса̄ бхависсатӣ’ти! на кхо пана̄хам̣, бханте, ито бахиддха̄ ан̃н̃ам̣ евам̣ сувинӣтам̣ парисам̣ саманупасса̄ми. айампи кхо ме, бханте, бхагавати дхамманвайо хоти – ‘самма̄самбуддхо бхагава̄, сва̄ккха̄то бхагавата̄ дхаммо, суппат̣ипанно бхагавато са̄вакасан̇гхо’ти.

371. ‘‘пуна чапара̄хам̣, бханте, пасса̄ми идхекачче кхаттийапан̣д̣ите нипун̣е катапараппава̄де ва̄лаведхирӯпе. те бхинданта̄ [вобхинданта̄ (сӣ.)] ман̃н̃е чаранти пан̃н̃а̄гатена дит̣т̣хигата̄ни. те сун̣анти – ‘саман̣о кхалу, бхо, готамо амукам̣ на̄ма га̄мам̣ ва̄ нигамам̣ ва̄ осариссатӣ’ти. те пан̃хам̣ абхисан̇кхаронти – ‘имам̣ майам̣ пан̃хам̣ саман̣ам̣ готамам̣ упасан̇камитва̄ пуччхисса̄ма. евам̣ че но пут̣т̣хо евам̣ бйа̄кариссати, евамасса майам̣ ва̄дам̣ а̄ропесса̄ма; евам̣ чепи но пут̣т̣хо евам̣ бйа̄кариссати, евамписса майам̣ ва̄дам̣ а̄ропесса̄ма̄’ти. те сун̣анти – ‘саман̣о кхалу, бхо, готамо амукам̣ на̄ма га̄мам̣ ва̄ нигамам̣ ва̄ осат̣о’ти. те йена бхагава̄ тенупасан̇каманти. те бхагава̄ дхаммийа̄ катха̄йа сандассети сама̄дапети самуттеджети сампахам̣сети. те бхагавата̄ дхаммийа̄ катха̄йа сандассита̄ сама̄дапита̄ самуттеджита̄ сампахам̣сита̄ на чева бхагавантам̣ пан̃хам̣ пуччханти, куто ва̄дам̣ а̄ропессанти? ан̃н̃адаттху бхагавато са̄вака̄ сампаджджанти. айампи кхо ме, бханте, бхагавати дхамманвайо хоти – ‘самма̄самбуддхо бхагава̄, сва̄ккха̄то бхагавата̄ дхаммо, суппат̣ипанно бхагавато са̄вакасан̇гхо’ти.

372. ‘‘пуна чапара̄хам̣, бханте, пасса̄ми идхекачче бра̄хман̣апан̣д̣ите…пе… гахапатипан̣д̣ите…пе… саман̣апан̣д̣ите нипун̣е катапараппава̄де ва̄лаведхирӯпе. те бхинданта̄ ман̃н̃е чаранти пан̃н̃а̄гатена дит̣т̣хигата̄ни. те сун̣анти – ‘саман̣о кхалу, бхо, готамо амукам̣ на̄ма га̄мам̣ ва̄ нигамам̣ ва̄ осариссатӣ’ти. те пан̃хам̣ абхисан̇кхаронти – ‘имам̣ майам̣ пан̃хам̣ саман̣ам̣ готамам̣ упасан̇камитва̄ пуччхисса̄ма. евам̣ че но пут̣т̣хо евам̣ бйа̄кариссати, евамасса майам̣ ва̄дам̣ а̄ропесса̄ма; евам̣ чепи но пут̣т̣хо евам̣ бйа̄кариссати, евамписса майам̣ ва̄дам̣ а̄ропесса̄ма̄’ти. те сун̣анти – ‘саман̣о кхалу, бхо, готамо амукам̣ на̄ма га̄мам̣ ва̄ нигамам̣ ва̄ осат̣о’ти. те йена бхагава̄ тенупасан̇каманти. те бхагава̄ дхаммийа̄ катха̄йа сандассети сама̄дапети самуттеджети сампахам̣сети. те бхагавата̄ дхаммийа̄ катха̄йа сандассита̄ сама̄дапита̄ самуттеджита̄ сампахам̣сита̄ на чева бхагавантам̣ пан̃хам̣ пуччханти, куто ва̄дам̣ а̄ропессанти? ан̃н̃адаттху бхагавантам̣йева ока̄сам̣ йа̄чанти ага̄расма̄ анага̄рийам̣ паббаджджа̄йа. те бхагава̄ пабба̄джети. те татха̄паббаджита̄ сама̄на̄ ека̄ вӯпакат̣т̣ха̄ аппаматта̄ а̄та̄пино пахитатта̄ вихаранта̄ начирассева – йассаттха̄йа кулапутта̄ саммадева ага̄расма̄ анага̄рийам̣ паббаджанти тадануттарам̣ – брахмачарийапарийоса̄нам̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихаранти. те евама̄хам̣су – ‘манам̣ вата, бхо, анасса̄ма; манам̣ вата, бхо, панасса̄ма’. майан̃хи пуббе ассаман̣а̄ва сама̄на̄ саман̣а̄мха̄ти пат̣иджа̄нимха̄, абра̄хман̣а̄ва сама̄на̄ бра̄хман̣а̄мха̄ти пат̣иджа̄нимха̄, анарахантова сама̄на̄ араханта̄мха̄ти пат̣иджа̄нимха̄. ‘ида̄ни кхомха саман̣а̄, ида̄ни кхомха бра̄хман̣а̄, ида̄ни кхомха араханто’ти. айампи кхо ме, бханте, бхагавати дхамманвайо хоти – ‘самма̄самбуддхо бхагава̄, сва̄ккха̄то бхагавата̄ дхаммо, суппат̣ипанно бхагавато са̄вакасан̇гхо’ти.

373. ‘‘пуна чапара̄хам̣, бханте, име исидаттапура̄н̣а̄ тхапатайо мамабхатта̄ мамайа̄на̄, ахам̣ несам̣ джӣвика̄йа [джӣвитасса (сӣ.), джӣвикам̣ (сӣ. ат̣т̣ха.), джӣвитам̣ (сйа̄. кам̣. пӣ. ка.)] да̄та̄, йасасса а̄хатта̄; атха ча пана но татха̄ майи нипаччака̄рам̣ каронти йатха̄ бхагавати. бхӯтапубба̄хам̣, бханте, сенам̣ аббхуййа̄то сама̄но име ча исидаттапура̄н̣а̄ тхапатайо вӣмам̣сама̄но ан̃н̃атарасмим̣ самба̄дхе а̄васатхе ва̄сам̣ упагаччхим̣. атха кхо, бханте, име исидаттапура̄н̣а̄ тхапатайо бахудева раттим̣ дхаммийа̄ катха̄йа вӣтина̄метва̄, йато ахоси бхагава̄ [ассосум̣ кхо бхагавантам̣ (сӣ. сйа̄. кам̣. пӣ.)] тато сӣсам̣ катва̄ мам̣ па̄дато каритва̄ нипаджджим̣су. тасса майхам̣, бханте, етадахоси – ‘аччхарийам̣ вата, бхо, аббхутам̣ вата, бхо! име исидаттапура̄н̣а̄ тхапатайо мамабхатта̄ мамайа̄на̄, ахам̣ несам̣ джӣвика̄йа да̄та̄, йасасса а̄хатта̄; атха ча пана но татха̄ майи нипаччака̄рам̣ каронти йатха̄ бхагавати. аддха̄ име а̄йасманто тасса бхагавато са̄сане ул̣а̄рам̣ пуббена̄парам̣ висесам̣ джа̄нантӣ’ти. айампи кхо ме, бханте, бхагавати дхамманвайо хоти – ‘самма̄самбуддхо бхагава̄, сва̄ккха̄то бхагавата̄ дхаммо, суппат̣ипанно бхагавато са̄вакасан̇гхо’ти.

374. ‘‘пуна чапарам̣, бханте, бхагава̄пи кхаттийо, ахампи кхаттийо; бхагава̄пи косало, ахампи косало; бхагава̄пи а̄сӣтико, ахампи а̄сӣтико. йампи, бханте, бхагава̄пи кхаттийо ахампи кхаттийо, бхагава̄пи косало ахампи косало, бхагава̄пи а̄сӣтико ахампи а̄сӣтико; имина̄ва̄раха̄мева̄хам̣ [имина̄па̄хам̣ (ка.)], бханте, бхагавати параманипаччака̄рам̣ ка̄тум̣, миттӯпаха̄рам̣ упадам̣сетум̣. ханда, ча да̄ни майам̣, бханте, гаччха̄ма; бахукичча̄ майам̣ бахукаран̣ӣйа̄’’ти. ‘‘йассада̄ни твам̣, маха̄ра̄джа, ка̄лам̣ ман̃н̃асӣ’’ти. атха кхо ра̄джа̄ пасенади косало ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ пакка̄ми. атха кхо бхагава̄ ачирапаккантасса ран̃н̃о пасенадисса косаласса бхиккхӯ а̄мантеси – ‘‘есо, бхиккхаве, ра̄джа̄ пасенади косало дхаммачетийа̄ни бха̄ситва̄ ут̣т̣ха̄йа̄сана̄ пакканто. угган̣хатха, бхиккхаве, дхаммачетийа̄ни; парийа̄пун̣а̄тха, бхиккхаве, дхаммачетийа̄ни; дха̄ретха, бхиккхаве, дхаммачетийа̄ни. аттхасам̣хита̄ни, бхиккхаве, дхаммачетийа̄ни а̄дибрахмачарийака̄нӣ’’ти.

идамавоча бхагава̄. аттамана̄ те бхиккхӯ бхагавато бха̄ситам̣ абхинандунти.

дхаммачетийасуттам̣ нит̣т̣хитам̣ навамам̣.