1. амбалат̣т̣хикара̄хулова̄дасуттам̣

107. евам̣ ме сутам̣ – екам̣ самайам̣ бхагава̄ ра̄джагахе вихарати вел̣уване каландаканива̄пе. тена кхо пана самайена а̄йасма̄ ра̄хуло амбалат̣т̣хика̄йам̣ вихарати. атха кхо бхагава̄ са̄йанхасамайам̣ пат̣исалла̄на̄ вут̣т̣хито йена амбалат̣т̣хика̄ йена̄йасма̄ ра̄хуло тенупасан̇ками. аддаса̄ кхо а̄йасма̄ ра̄хуло бхагавантам̣ дӯратова а̄гаччхантам̣. дисва̄на а̄санам̣ пан̃н̃а̄песи, удакан̃ча па̄да̄нам̣. нисӣди бхагава̄ пан̃н̃атте а̄сане. нисаджджа па̄де паккха̄леси. а̄йасма̄пи кхо ра̄хуло бхагавантам̣ абхива̄детва̄ екамантам̣ нисӣди.

108. атха кхо бхагава̄ париттам̣ удака̄васесам̣ удака̄дха̄не т̣хапетва̄ а̄йасмантам̣ ра̄хулам̣ а̄мантеси – ‘‘пассаси но твам̣, ра̄хула, имам̣ париттам̣ удака̄васесам̣ удака̄дха̄не т̣хапита’’нти? ‘‘евам̣, бханте’’. ‘‘евам̣ париттакам̣ кхо, ра̄хула, тесам̣ са̄ман̃н̃ам̣ йесам̣ наттхи сампаджа̄намуса̄ва̄де ладжджа̄’’ти. атха кхо бхагава̄ париттам̣ удака̄васесам̣ чхад̣д̣етва̄ а̄йасмантам̣ ра̄хулам̣ а̄мантеси – ‘‘пассаси но твам̣, ра̄хула, париттам̣ удака̄васесам̣ чхад̣д̣ита’’нти? ‘‘евам̣, бханте’’. ‘‘евам̣ чхад̣д̣итам̣ кхо, ра̄хула, тесам̣ са̄ман̃н̃ам̣ йесам̣ наттхи сампаджа̄намуса̄ва̄де ладжджа̄’’ти. атха кхо бхагава̄ там̣ удака̄дха̄нам̣ никкуджджитва̄ а̄йасмантам̣ ра̄хулам̣ а̄мантеси – ‘‘пассаси но твам̣, ра̄хула, имам̣ удака̄дха̄нам̣ никкуджджита’’нти? ‘‘евам̣, бханте’’. ‘‘евам̣ никкуджджитам̣ кхо, ра̄хула, тесам̣ са̄ман̃н̃ам̣ йесам̣ наттхи сампаджа̄намуса̄ва̄де ладжджа̄’’ти. атха кхо бхагава̄ там̣ удака̄дха̄нам̣ уккуджджитва̄ а̄йасмантам̣ ра̄хулам̣ а̄мантеси – ‘‘пассаси но твам̣, ра̄хула, имам̣ удака̄дха̄нам̣ риттам̣ туччха’’нти? ‘‘евам̣, бханте’’. ‘‘евам̣ риттам̣ туччхам̣ кхо, ра̄хула, тесам̣ са̄ман̃н̃ам̣ йесам̣ наттхи сампаджа̄намуса̄ва̄де ладжджа̄ти. сеййатха̄пи, ра̄хула, ран̃н̃о на̄го ӣса̄данто урӯл̣хава̄ [уббӯл̣хава̄ (сӣ. пӣ.)] абхиджа̄то сан̇га̄ма̄вачаро сан̇га̄магато пуримехипи па̄дехи каммам̣ кароти, паччхимехипи па̄дехи каммам̣ кароти, пурименапи ка̄йена каммам̣ кароти, паччхименапи ка̄йена каммам̣ кароти, сӣсенапи каммам̣ кароти, кан̣н̣ехипи каммам̣ кароти, дантехипи каммам̣ кароти, нан̇гут̣т̣хенапи каммам̣ кароти; раккхатева сон̣д̣ам̣. таттха хаттха̄рохасса евам̣ хоти – ‘айам̣ кхо ран̃н̃о на̄го ӣса̄данто урӯл̣хава̄ абхиджа̄то сан̇га̄ма̄вачаро сан̇га̄магато пуримехипи па̄дехи каммам̣ кароти, паччхимехипи па̄дехи каммам̣ кароти…пе… нан̇гут̣т̣хенапи каммам̣ кароти; раккхатева сон̣д̣ам̣. апариччаттам̣ кхо ран̃н̃о на̄гасса джӣвита’нти. йато кхо, ра̄хула, ран̃н̃о на̄го ӣса̄данто урӯл̣хава̄ абхиджа̄то сан̇га̄ма̄вачаро сан̇га̄магато пуримехипи па̄дехи каммам̣ кароти, паччхимехипи па̄дехи каммам̣ кароти…пе… нан̇гут̣т̣хенапи каммам̣ кароти, сон̣д̣а̄йапи каммам̣ кароти, таттха хаттха̄рохасса евам̣ хоти – ‘айам̣ кхо ран̃н̃о на̄го ӣса̄данто урӯл̣хава̄ абхиджа̄то сан̇га̄ма̄вачаро сан̇га̄магато пуримехипи па̄дехи каммам̣ кароти, паччхимехипи па̄дехи каммам̣ кароти, пурименапи ка̄йена каммам̣ кароти, паччхименапи ка̄йена каммам̣ кароти, сӣсенапи каммам̣ кароти, кан̣н̣ехипи каммам̣ кароти, дантехипи каммам̣ кароти, нан̇гут̣т̣хенапи каммам̣ кароти, сон̣д̣а̄йапи каммам̣ кароти. париччаттам̣ кхо ран̃н̃о на̄гасса джӣвитам̣. наттхи да̄ни кин̃чи ран̃н̃о на̄гасса акаран̣ӣйа’нти. евамева кхо, ра̄хула, йасса кассачи сампаджа̄намуса̄ва̄де наттхи ладжджа̄, на̄хам̣ тасса кин̃чи па̄пам̣ акаран̣ӣйанти вада̄ми. тасма̄тиха те, ра̄хула, ‘хасса̄пи на муса̄ бхан̣исса̄мӣ’ти – еван̃хи те, ра̄хула, сиккхитаббам̣.

109. ‘‘там̣ ким̣ ман̃н̃аси, ра̄хула, киматтхийо а̄да̄со’’ти? ‘‘паччавеккхан̣аттхо, бханте’’ти. ‘‘евамева кхо, ра̄хула, паччавеккхитва̄ паччавеккхитва̄ ка̄йена каммам̣ каттаббам̣, паччавеккхитва̄ паччавеккхитва̄ ва̄ча̄йа каммам̣ каттаббам̣, паччавеккхитва̄ паччавеккхитва̄ манаса̄ каммам̣ каттаббам̣. йадева твам̣, ра̄хула, ка̄йена каммам̣ каттука̄мо ахоси, тадева те ка̄йакаммам̣ паччавеккхитаббам̣ – ‘йам̣ ну кхо ахам̣ идам̣ ка̄йена каммам̣ каттука̄мо идам̣ ме ка̄йакаммам̣ аттабйа̄ба̄дха̄йапи сам̣ваттеййа, парабйа̄ба̄дха̄йапи сам̣ваттеййа, убхайабйа̄ба̄дха̄йапи сам̣ваттеййа – акусалам̣ идам̣ ка̄йакаммам̣ дуккхудрайам̣ [дуккхундрайам̣, дуккхудайам̣ (ка.)] дуккхавипа̄ка’нти? саче твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ ка̄йена каммам̣ каттука̄мо идам̣ ме ка̄йакаммам̣ аттабйа̄ба̄дха̄йапи сам̣ваттеййа, парабйа̄ба̄дха̄йапи сам̣ваттеййа, убхайабйа̄ба̄дха̄йапи сам̣ваттеййа – акусалам̣ идам̣ ка̄йакаммам̣ дуккхудрайам̣ дуккхавипа̄ка’нти, еварӯпам̣ те, ра̄хула, ка̄йена каммам̣ сасаккам̣ на каран̣ӣйам̣ [сам̣саккам̣ на ча каран̣ӣйам̣ (ка.)]. саче пана твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ ка̄йена каммам̣ каттука̄мо идам̣ ме ка̄йакаммам̣ неваттабйа̄ба̄дха̄йапи сам̣ваттеййа, на парабйа̄ба̄дха̄йапи сам̣ваттеййа, на убхайабйа̄ба̄дха̄йапи сам̣ваттеййа – кусалам̣ идам̣ ка̄йакаммам̣ сукхудрайам̣ сукхавипа̄ка’нти, еварӯпам̣ те, ра̄хула, ка̄йена каммам̣ каран̣ӣйам̣.

‘‘каронтенапи те, ра̄хула, ка̄йена каммам̣ тадева те ка̄йакаммам̣ паччавеккхитаббам̣ – ‘йам̣ ну кхо ахам̣ идам̣ ка̄йена каммам̣ кароми идам̣ ме ка̄йакаммам̣ аттабйа̄ба̄дха̄йапи сам̣ваттати, парабйа̄ба̄дха̄йапи сам̣ваттати, убхайабйа̄ба̄дха̄йапи сам̣ваттати – акусалам̣ идам̣ ка̄йакаммам̣ дуккхудрайам̣ дуккхавипа̄ка’нти? саче пана твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ ка̄йена каммам̣ кароми идам̣ ме ка̄йакаммам̣ аттабйа̄ба̄дха̄йапи сам̣ваттати, парабйа̄ба̄дха̄йапи сам̣ваттати, убхайабйа̄ба̄дха̄йапи сам̣ваттати – акусалам̣ идам̣ ка̄йакаммам̣ дуккхудрайам̣ дуккхавипа̄ка’нти, пат̣исам̣хареййа̄си твам̣, ра̄хула, еварӯпам̣ ка̄йакаммам̣. саче пана твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ ка̄йена каммам̣ кароми идам̣ ме ка̄йакаммам̣ неваттабйа̄ба̄дха̄йапи сам̣ваттати, на парабйа̄ба̄дха̄йапи сам̣ваттати, на убхайабйа̄ба̄дха̄йапи сам̣ваттати – кусалам̣ идам̣ ка̄йакаммам̣ сукхудрайам̣ сукхавипа̄ка’нти, анупададжджеййа̄си твам̣, ра̄хула, еварӯпам̣ ка̄йакаммам̣.

‘‘катва̄пи те, ра̄хула, ка̄йена каммам̣ тадева те ка̄йакаммам̣ паччавеккхитаббам̣ – ‘йам̣ ну кхо ахам̣ идам̣ ка̄йена каммам̣ ака̄сим̣ идам̣ ме ка̄йакаммам̣ аттабйа̄ба̄дха̄йапи сам̣ваттати [сам̣ватти (пӣ.)], парабйа̄ба̄дха̄йапи сам̣ваттати, убхайабйа̄ба̄дха̄йапи сам̣ваттати – акусалам̣ идам̣ ка̄йакаммам̣ дуккхудрайам̣ дуккхавипа̄ка’нти? саче кхо твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ ка̄йена каммам̣ ака̄сим̣, идам̣ ме ка̄йакаммам̣ аттабйа̄ба̄дха̄йапи сам̣ваттати, парабйа̄ба̄дха̄йапи сам̣ваттати, убхайабйа̄ба̄дха̄йапи сам̣ваттати – акусалам̣ идам̣ ка̄йакаммам̣ дуккхудрайам̣ дуккхавипа̄ка’нти, еварӯпам̣ те, ра̄хула, ка̄йакаммам̣ саттхари ва̄ вин̃н̃ӯсу ва̄ сабрахмача̄рӣсу десетаббам̣, виваритаббам̣, утта̄нӣка̄таббам̣; десетва̄ виваритва̄ утта̄нӣкатва̄ а̄йатим̣ сам̣варам̣ а̄паджджитаббам̣. саче пана твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ ка̄йена каммам̣ ака̄сим̣ идам̣ ме ка̄йакаммам̣ неваттабйа̄ба̄дха̄йапи сам̣ваттати, на парабйа̄ба̄дха̄йапи сам̣ваттати, на убхайабйа̄ба̄дха̄йапи сам̣ваттати – кусалам̣ идам̣ ка̄йакаммам̣ сукхудрайам̣ сукхавипа̄ка’нти, тенева твам̣, ра̄хула, пӣтипа̄моджджена вихареййа̄си ахоратта̄нусиккхӣ кусалесу дхаммесу.

110. ‘‘йадева твам̣, ра̄хула, ва̄ча̄йа каммам̣ каттука̄мо ахоси, тадева те вачӣкаммам̣ паччавеккхитаббам̣ – ‘йам̣ ну кхо ахам̣ идам̣ ва̄ча̄йа каммам̣ каттука̄мо идам̣ ме вачӣкаммам̣ аттабйа̄ба̄дха̄йапи сам̣ваттеййа, парабйа̄ба̄дха̄йапи сам̣ваттеййа, убхайабйа̄ба̄дха̄йапи сам̣ваттеййа – акусалам̣ идам̣ вачӣкаммам̣ дуккхудрайам̣ дуккхавипа̄ка’нти? саче твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ ва̄ча̄йа каммам̣ каттука̄мо идам̣ ме вачӣкаммам̣ аттабйа̄ба̄дха̄йапи сам̣ваттеййа, парабйа̄ба̄дха̄йапи сам̣ваттеййа, убхайабйа̄ба̄дха̄йапи сам̣ваттеййа – акусалам̣ идам̣ вачӣкаммам̣ дуккхудрайам̣ дуккхавипа̄ка’нти, еварӯпам̣ те, ра̄хула, ва̄ча̄йа каммам̣ сасаккам̣ на каран̣ӣйам̣. саче пана твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ ва̄ча̄йа каммам̣ каттука̄мо идам̣ ме вачӣкаммам̣ неваттабйа̄ба̄дха̄йапи сам̣ваттеййа, на парабйа̄ба̄дха̄йапи сам̣ваттеййа – кусалам̣ идам̣ вачӣкаммам̣ сукхудрайам̣ сукхавипа̄ка’нти, еварӯпам̣ те, ра̄хула, ва̄ча̄йа каммам̣ каран̣ӣйам̣.

‘‘каронтенапи, ра̄хула, ва̄ча̄йа каммам̣ тадева те вачӣкаммам̣ паччавеккхитаббам̣ – ‘йам̣ ну кхо ахам̣ идам̣ ва̄ча̄йа каммам̣ кароми идам̣ ме вачӣкаммам̣ аттабйа̄ба̄дха̄йапи сам̣ваттати, парабйа̄ба̄дха̄йапи сам̣ваттати, убхайабйа̄ба̄дха̄йапи сам̣ваттати – акусалам̣ идам̣ вачӣкаммам̣ дуккхудрайам̣ дуккхавипа̄ка’нти? саче пана твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ ва̄ча̄йа каммам̣ кароми идам̣ ме вачӣкаммам̣ аттабйа̄ба̄дха̄йапи сам̣ваттати, парабйа̄ба̄дха̄йапи сам̣ваттати, убхайабйа̄ба̄дха̄йапи сам̣ваттати – акусалам̣ идам̣ вачӣкаммам̣ дуккхудрайам̣ дуккхавипа̄ка’нти, пат̣исам̣хареййа̄си твам̣, ра̄хула, еварӯпам̣ вачӣкаммам̣. саче пана твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ ва̄ча̄йа каммам̣ кароми идам̣ ме вачӣкаммам̣ неваттабйа̄ба̄дха̄йапи сам̣ваттати, на парабйа̄ба̄дха̄йапи сам̣ваттати, на убхайабйа̄ба̄дха̄йапи сам̣ваттати – кусалам̣ идам̣ вачӣкаммам̣ сукхудрайам̣ сукхавипа̄ка’нти, анупададжджеййа̄си, твам̣ ра̄хула, еварӯпам̣ вачӣкаммам̣.

‘‘катва̄пи те, ра̄хула, ва̄ча̄йа каммам̣ тадева те вачӣкаммам̣ паччавеккхитаббам̣ – ‘йам̣ ну кхо ахам̣ идам̣ ва̄ча̄йа каммам̣ ака̄сим̣ идам̣ ме вачӣкаммам̣ аттабйа̄ба̄дха̄йапи сам̣ваттати [сам̣ватти (сӣ. пӣ.)], парабйа̄ба̄дха̄йапи сам̣ваттати, убхайабйа̄ба̄дха̄йапи сам̣ваттати – акусалам̣ идам̣ вачӣкаммам̣ дуккхудрайам̣ дуккхавипа̄ка’нти? саче кхо твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ ва̄ча̄йа каммам̣ ака̄сим̣ идам̣ ме вачӣкаммам̣ аттабйа̄ба̄дха̄йапи сам̣ваттати, парабйа̄ба̄дха̄йапи сам̣ваттати, убхайабйа̄ба̄дха̄йапи сам̣ваттати – акусалам̣ идам̣ вачӣкаммам̣ дуккхудрайам̣ дуккхавипа̄ка’нти, еварӯпам̣ те, ра̄хула, вачӣкаммам̣ саттхари ва̄ вин̃н̃ӯсу ва̄ сабрахмача̄рӣсу десетаббам̣, виваритаббам̣, утта̄нӣкаттаббам̣; десетва̄ виваритва̄ утта̄нӣкатва̄ а̄йатим̣ сам̣варам̣ а̄паджджитаббам̣. саче пана твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ ва̄ча̄йа каммам̣ ака̄сим̣ идам̣ ме вачӣкаммам̣ неваттабйа̄ба̄дха̄йапи сам̣ваттати, на парабйа̄ба̄дха̄йапи сам̣ваттати, на убхайабйа̄ба̄дха̄йапи сам̣ваттати – кусалам̣ идам̣ вачӣкаммам̣ сукхудрайам̣ сукхавипа̄ка’нти, тенева твам̣, ра̄хула, пӣтипа̄моджджена вихареййа̄си ахоратта̄нусиккхӣ кусалесу дхаммесу.

111. ‘‘йадева твам̣, ра̄хула, манаса̄ каммам̣ каттука̄мо ахоси, тадева те манокаммам̣ паччавеккхитаббам̣ – ‘йам̣ ну кхо ахам̣ идам̣ манаса̄ каммам̣ каттука̄мо идам̣ ме манокаммам̣ аттабйа̄ба̄дха̄йапи сам̣ваттеййа, парабйа̄ба̄дха̄йапи сам̣ваттеййа, убхайабйа̄ба̄дха̄йапи сам̣ваттеййа – акусалам̣ идам̣ манокаммам̣ дуккхудрайам̣ дуккхавипа̄ка’нти? саче твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ манаса̄ каммам̣ каттука̄мо идам̣ ме манокаммам̣ аттабйа̄ба̄дха̄йапи сам̣ваттеййа, парабйа̄ба̄дха̄йапи сам̣ваттеййа, убхайабйа̄ба̄дха̄йапи сам̣ваттеййа – акусалам̣ идам̣ манокаммам̣ дуккхудрайам̣ дуккхавипа̄ка’нти, еварӯпам̣ те, ра̄хула, манаса̄ каммам̣ сасаккам̣ на каран̣ӣйам̣. саче пана твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ манаса̄ каммам̣ каттука̄мо идам̣ ме манокаммам̣ неваттабйа̄ба̄дха̄йапи сам̣ваттеййа, на парабйа̄ба̄дха̄йапи сам̣ваттеййа, на убхайабйа̄ба̄дха̄йапи сам̣ваттеййа – кусалам̣ идам̣ манокаммам̣ сукхудрайам̣ сукхавипа̄ка’нти, еварӯпам̣ те, ра̄хула, манаса̄ каммам̣ каран̣ӣйам̣.

‘‘каронтенапи те, ра̄хула, манаса̄ каммам̣ тадева те манокаммам̣ паччавеккхитаббам̣ – ‘йам̣ ну кхо ахам̣ идам̣ манаса̄ каммам̣ кароми идам̣ ме манокаммам̣ аттабйа̄ба̄дха̄йапи сам̣ваттати, парабйа̄ба̄дха̄йапи сам̣ваттати, убхайабйа̄ба̄дха̄йапи сам̣ваттати – акусалам̣ идам̣ манокаммам̣ дуккхудрайам̣ дуккхавипа̄ка’нти? саче пана твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ манаса̄ каммам̣ кароми идам̣ ме манокаммам̣ аттабйа̄ба̄дха̄йапи сам̣ваттати, парабйа̄ба̄дха̄йапи сам̣ваттати, убхайабйа̄ба̄дха̄йапи сам̣ваттати – акусалам̣ идам̣ манокаммам̣ дуккхудрайам̣ дуккхавипа̄ка’нти, пат̣исам̣хареййа̄си твам̣, ра̄хула, еварӯпам̣ манокаммам̣. саче пана твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ манаса̄ каммам̣ кароми идам̣ ме манокаммам̣ неваттабйа̄ба̄дха̄йапи сам̣ваттати, на парабйа̄ба̄дха̄йапи сам̣ваттати, на убхайабйа̄ба̄дха̄йапи сам̣ваттати – кусалам̣ идам̣ манокаммам̣ сукхудрайам̣ сукхавипа̄ка’нти, анупададжджеййа̄си твам̣, ра̄хула, еварӯпам̣ манокаммам̣.

‘‘катва̄пи те, ра̄хула, манаса̄ каммам̣ тадева те манокаммам̣ паччавеккхитаббам̣ – ‘йам̣ ну кхо ахам̣ идам̣ манаса̄ каммам̣ ака̄сим̣ идам̣ ме манокаммам̣ аттабйа̄ба̄дха̄йапи сам̣ваттати [сам̣ватти (сӣ. пӣ.)], парабйа̄ба̄дха̄йапи сам̣ваттати, убхайабйа̄ба̄дха̄йапи сам̣ваттати – акусалам̣ идам̣ манокаммам̣ дуккхудрайам̣ дуккхавипа̄ка’нти? саче кхо твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ манаса̄ каммам̣ ака̄сим̣ идам̣ ме манокаммам̣ аттабйа̄ба̄дха̄йапи сам̣ваттати, парабйа̄ба̄дха̄йапи сам̣ваттати, убхайабйа̄ба̄дха̄йапи сам̣ваттати – акусалам̣ идам̣ манокаммам̣ дуккхудрайам̣ дуккхавипа̄ка’нти, еварӯпам̣ пана [еварӯпе (сӣ. пӣ.), еварӯпе пана (сйа̄. кам̣.)] те, ра̄хула, манокаммам̣ [манокамме (сӣ. сйа̄. кам̣. пӣ.)] ат̣т̣ӣйитаббам̣ хара̄йитаббам̣ джигуччхитаббам̣; ат̣т̣ӣйитва̄ хара̄йитва̄ джигуччхитва̄ а̄йатим̣ сам̣варам̣ а̄паджджитаббам̣. саче пана твам̣, ра̄хула, паччавеккхама̄но евам̣ джа̄неййа̄си – ‘йам̣ кхо ахам̣ идам̣ манаса̄ каммам̣ ака̄сим̣ идам̣ ме манокаммам̣ неваттабйа̄ба̄дха̄йапи сам̣ваттати, на парабйа̄ба̄дха̄йапи сам̣ваттати, на убхайабйа̄ба̄дха̄йапи сам̣ваттати – кусалам̣ идам̣ манокаммам̣ сукхудрайам̣ сукхавипа̄ка’нти, тенева твам̣, ра̄хула, пӣтипа̄моджджена вихареййа̄си ахоратта̄нусиккхӣ кусалесу дхаммесу.

112. ‘‘йе хи кечи, ра̄хула, атӣтамаддха̄нам̣ саман̣а̄ ва̄ бра̄хман̣а̄ ва̄ ка̄йакаммам̣ парисодхесум̣, вачӣкаммам̣ парисодхесум̣, манокаммам̣ парисодхесум̣, саббе те евамевам̣ паччавеккхитва̄ паччавеккхитва̄ ка̄йакаммам̣ парисодхесум̣, паччавеккхитва̄ паччавеккхитва̄ вачӣкаммам̣ парисодхесум̣, паччавеккхитва̄ паччавеккхитва̄ манокаммам̣ парисодхесум̣. йепи хи кечи, ра̄хула, ана̄гатамаддха̄нам̣ саман̣а̄ ва̄ бра̄хман̣а̄ ва̄ ка̄йакаммам̣ парисодхессанти, вачӣкаммам̣ парисодхессанти, манокаммам̣ парисодхессанти, саббе те евамевам̣ паччавеккхитва̄ паччавеккхитва̄ ка̄йакаммам̣ парисодхессанти, паччавеккхитва̄ паччавеккхитва̄ вачӣкаммам̣ парисодхессанти, паччавеккхитва̄ паччавеккхитва̄ манокаммам̣ парисодхессанти. йепи хи кечи, ра̄хула, етарахи саман̣а̄ ва̄ бра̄хман̣а̄ ва̄ ка̄йакаммам̣ парисодхенти, вачӣкаммам̣ парисодхенти, манокаммам̣ парисодхенти, саббе те евамевам̣ паччавеккхитва̄ паччавеккхитва̄ ка̄йакаммам̣ парисодхенти, паччавеккхитва̄ паччавеккхитва̄ вачӣкаммам̣ парисодхенти, паччавеккхитва̄ паччавеккхитва̄ манокаммам̣ парисодхенти. тасма̄тиха, ра̄хула, ‘паччавеккхитва̄ паччавеккхитва̄ ка̄йакаммам̣ парисодхесса̄ми, паччавеккхитва̄ паччавеккхитва̄ вачӣкаммам̣ парисодхесса̄ми, паччавеккхитва̄ паччавеккхитва̄ манокаммам̣ парисодхесса̄мӣ’ти – еван̃хи те, ра̄хула, сиккхитабба’’нти.

идамавоча бхагава̄. аттамано а̄йасма̄ ра̄хуло бхагавато бха̄ситам̣ абхинандӣти.

амбалат̣т̣хикара̄хулова̄дасуттам̣ нит̣т̣хитам̣ пат̣хамам̣.