9. маха̄са̄ропамасуттам̣

307. евам̣ ме сутам̣ – екам̣ самайам̣ бхагава̄ ра̄джагахе вихарати гиджджхакӯт̣е паббате ачирапакканте девадатте. татра кхо бхагава̄ девадаттам̣ а̄раббха бхиккхӯ а̄мантеси –

‘‘идха, бхиккхаве, екаччо кулапутто саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена аттамано хоти парипун̣н̣асан̇каппо. со тена ла̄бхасакка̄расилокена атта̄нуккам̣сети парам̣ вамбхети – ‘ахамасми ла̄бхасакка̄расилокава̄ [ла̄бхӣ силокава̄ (сӣ. пӣ.), ла̄бхӣ сакка̄ра силокава̄ (сйа̄.)], име панан̃н̃е бхиккхӯ аппан̃н̃а̄та̄ аппесаккха̄’ти. со тена ла̄бхасакка̄расилокена маджджати памаджджати пама̄дам̣ а̄паджджати, паматто сама̄но дуккхам̣ вихарати.

‘‘сеййатха̄пи, бхиккхаве, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣ атиккамма тачам̣ атиккамма папат̣икам̣, са̄кха̄пала̄сам̣ чхетва̄ а̄да̄йа паккамеййа ‘са̄ра’нти ман̃н̃ама̄но. таменам̣ чаккхума̄ пурисо дисва̄ евам̣ вадеййа – ‘на вата̄йам̣ бхавам̣ пурисо ан̃н̃а̄си са̄рам̣, на ан̃н̃а̄си пхеггум̣, на ан̃н̃а̄си тачам̣, на ан̃н̃а̄си папат̣икам̣, на ан̃н̃а̄си са̄кха̄пала̄сам̣. татха̄ хайам̣ [татха̄па̄йам̣ (ка.)] бхавам̣ пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣ атиккамма тачам̣ атиккамма папат̣икам̣, са̄кха̄пала̄сам̣ чхетва̄ а̄да̄йа пакканто ‘са̄ра’нти ман̃н̃ама̄но. йан̃часса са̄рена са̄ракаран̣ӣйам̣ тан̃часса аттхам̣ на̄нубхависсатӣ’ти. евамева кхо, бхиккхаве, идхекаччо кулапутто саддха̄ ага̄расма̄ анага̄рийам̣ паббаджито хоти – отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена аттамано хоти парипун̣н̣асан̇каппо. со тена ла̄бхасакка̄расилокена атта̄нуккам̣сети, парам̣ вамбхети ‘ахамасми ла̄бхасакка̄расилокава̄, име панан̃н̃е бхиккхӯ аппан̃н̃а̄та̄ аппесаккха̄’ти. со тена ла̄бхасакка̄расилокена маджджати памаджджати пама̄дам̣ а̄паджджати, паматто сама̄но дуккхам̣ вихарати. айам̣ вуччати, бхиккхаве, бхиккху са̄кха̄пала̄сам̣ аггахеси брахмачарийасса; тена ча воса̄нам̣ а̄па̄ди.

308. ‘‘идха пана, бхиккхаве, екаччо кулапутто саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена на аттамано хоти на парипун̣н̣асан̇каппо. со тена ла̄бхасакка̄расилокена на атта̄нуккам̣сети, на парам̣ вамбхети. со тена ла̄бхасакка̄расилокена на маджджати наппамаджджати на пама̄дам̣ а̄паджджати. аппаматто сама̄но сӣласампадам̣ а̄ра̄дхети. со та̄йа сӣласампада̄йа аттамано хоти парипун̣н̣асан̇каппо. со та̄йа сӣласампада̄йа атта̄нуккам̣сети, парам̣ вамбхети – ‘ахамасми сӣлава̄ калйа̄н̣адхаммо, име панан̃н̃е бхиккхӯ дуссӣла̄ па̄падхамма̄’ти. со та̄йа сӣласампада̄йа маджджати памаджджати пама̄дам̣ а̄паджджати, паматто сама̄но дуккхам̣ вихарати.

309. ‘‘идха пана, бхиккхаве, екаччо кулапутто саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена на аттамано хоти на парипун̣н̣асан̇каппо. со тена ла̄бхасакка̄расилокена на атта̄нуккам̣сети, на парам̣ вамбхети. со тена ла̄бхасакка̄расилокена на маджджати наппамаджджати на пама̄дам̣ а̄паджджати, аппаматто сама̄но сӣласампадам̣ а̄ра̄дхети. со та̄йа сӣласампада̄йа аттамано хоти но ча кхо парипун̣н̣асан̇каппо. со та̄йа сӣласампада̄йа на атта̄нуккам̣сети, на парам̣ вамбхети. со та̄йа сӣласампада̄йа на маджджати наппамаджджати на пама̄дам̣ а̄паджджати. аппаматто сама̄но сама̄дхисампадам̣ а̄ра̄дхети. со та̄йа сама̄дхисампада̄йа аттамано хоти парипун̣н̣асан̇каппо. со та̄йа сама̄дхисампада̄йа атта̄нуккам̣сети, парам̣ вамбхети – ‘ахамасми сама̄хито екаггачитто, име панан̃н̃е бхиккхӯ асама̄хита̄ виббхантачитта̄’ти. со та̄йа сама̄дхисампада̄йа маджджати памаджджати пама̄дам̣ а̄паджджати, паматто сама̄но дуккхам̣ вихарати.

‘‘сеййатха̄пи, бхиккхаве, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣ тачам̣ чхетва̄ а̄да̄йа паккамеййа ‘са̄ра’нти ман̃н̃ама̄но. таменам̣ чаккхума̄ пурисо дисва̄ евам̣ вадеййа ‘на вата̄йам̣ бхавам̣ пурисо ан̃н̃а̄си са̄рам̣, на ан̃н̃а̄си пхеггум̣, на ан̃н̃а̄си тачам̣, на ан̃н̃а̄си папат̣икам̣, на ан̃н̃а̄си са̄кха̄пала̄сам̣. татха̄ хайам̣ бхавам̣ пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣ тачам̣ чхетва̄ а̄да̄йа пакканто ‘са̄ра’нти ман̃н̃ама̄но. йан̃часса са̄рена са̄ракаран̣ӣйам̣ тан̃часса аттхам̣ на̄нубхависсатӣ’ти.

‘‘евамева кхо, бхиккхаве, идхекаччо кулапутто саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена на аттамано хоти на парипун̣н̣асан̇каппо. со тена ла̄бхасакка̄расилокена на атта̄нуккам̣сети, на парам̣ вамбхети. со тена ла̄бхасакка̄расилокена на маджджати наппамаджджати на пама̄дам̣ а̄паджджати, аппаматто сама̄но сӣласампадам̣ а̄ра̄дхети. со та̄йа сӣласампада̄йа аттамано хоти но ча кхо парипун̣н̣асан̇каппо. со та̄йа сӣласампада̄йа на атта̄нуккам̣сети, на парам̣ вамбхети. со та̄йа сӣласампада̄йа на маджджати наппамаджджати на пама̄дам̣ а̄паджджати, аппаматто сама̄но сама̄дхисампадам̣ а̄ра̄дхети. со та̄йа сама̄дхисампада̄йа аттамано хоти парипун̣н̣асан̇каппо. со та̄йа сама̄дхисампада̄йа атта̄нуккам̣сети, парам̣ вамбхети – ‘ахамасми сама̄хито екаггачитто, име панан̃н̃е бхиккхӯ асама̄хита̄ виббхантачитта̄’ти. со та̄йа сама̄дхисампада̄йа маджджати памаджджати пама̄дам̣ а̄паджджати, паматто сама̄но дуккхам̣ вихарати. айам̣ вуччати, бхиккхаве, бхиккху тачам̣ аггахеси брахмачарийасса; тена ча воса̄нам̣ а̄па̄ди.

310. ‘‘идха пана, бхиккхаве, екаччо кулапутто саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена на аттамано хоти на парипун̣н̣асан̇каппо. со тена ла̄бхасакка̄расилокена на атта̄нуккам̣сети, на парам̣ вамбхети. со тена ла̄бхасакка̄расилокена на маджджати наппамаджджати на пама̄дам̣ а̄паджджати. аппаматто сама̄но сӣласампадам̣ а̄ра̄дхети. со та̄йа сӣласампада̄йа аттамано хоти, но ча кхо парипун̣н̣асан̇каппо. со та̄йа сӣласампада̄йа на атта̄нуккам̣сети, на парам̣ вамбхети. со та̄йа сӣласампада̄йа на маджджати наппамаджджати на пама̄дам̣ а̄паджджати, аппаматто сама̄но сама̄дхисампадам̣ а̄ра̄дхети. со та̄йа сама̄дхисампада̄йа аттамано хоти, но ча кхо парипун̣н̣асан̇каппо. со та̄йа сама̄дхисампада̄йа на атта̄нуккам̣сети, на парам̣ вамбхети. со та̄йа сама̄дхисампада̄йа на маджджати наппамаджджати на пама̄дам̣ а̄паджджати аппаматто сама̄но н̃а̄н̣адассанам̣ а̄ра̄дхети. со тена н̃а̄н̣адассанена аттамано хоти парипун̣н̣асан̇каппо. со тена н̃а̄н̣адассанена атта̄нуккам̣сети, парам̣ вамбхети – ‘ахамасми джа̄нам̣ пассам̣ вихара̄ми. име панан̃н̃е бхиккхӯ аджа̄нам̣ апассам̣ вихарантӣ’ти. со тена н̃а̄н̣адассанена маджджати памаджджати пама̄дам̣ а̄паджджати, паматто сама̄но дуккхам̣ вихарати.

‘‘сеййатха̄пи, бхиккхаве, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ пхеггум̣ чхетва̄ а̄да̄йа паккамеййа ‘са̄ра’нти ман̃н̃ама̄но. таменам̣ чаккхума̄ пурисо дисва̄ евам̣ вадеййа – ‘на вата̄йам̣ бхавам̣ пурисо ан̃н̃а̄си са̄рам̣ на ан̃н̃а̄си пхеггум̣ на ан̃н̃а̄си тачам̣ на ан̃н̃а̄си папат̣икам̣ на ан̃н̃а̄си са̄кха̄пала̄сам̣. татха̄ хайам̣ бхавам̣ пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ пхеггум̣ чхетва̄ а̄да̄йа пакканто ‘са̄ра’нти ман̃н̃ама̄но. йан̃часса са̄рена са̄ракаран̣ӣйам̣ тан̃часса аттхам̣ на̄нубхависсатӣ’ти. евамева кхо, бхиккхаве, идхекаччо кулапутто саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена на аттамано хоти на парипун̣н̣асан̇каппо. со тена ла̄бхасакка̄расилокена на атта̄нуккам̣сети, на парам̣ вамбхети. со тена ла̄бхасакка̄расилокена на маджджати наппамаджджати на пама̄дам̣ а̄паджджати, аппаматто сама̄но сӣласампадам̣ а̄ра̄дхети. со та̄йа сӣласампада̄йа аттамано хоти, но ча кхо парипун̣н̣асан̇каппо. со та̄йа сӣласампада̄йа на атта̄нуккам̣сети, на парам̣ вамбхети. со та̄йа сӣласампада̄йа на маджджати наппамаджджати на пама̄дам̣ а̄паджджати, аппаматто сама̄но сама̄дхисампадам̣ а̄ра̄дхети. со та̄йа сама̄дхисампада̄йа аттамано хоти, но ча кхо парипун̣н̣асан̇каппо. со та̄йа сама̄дхисампада̄йа на атта̄нуккам̣сети, на парам̣ вамбхети. со та̄йа сама̄дхисампада̄йа на маджджати наппамаджджати на пама̄дам̣ а̄паджджати, аппаматто сама̄но н̃а̄н̣адассанам̣ а̄ра̄дхети. со тена н̃а̄н̣адассанена аттамано хоти парипун̣н̣асан̇каппо. со тена н̃а̄н̣адассанена атта̄нуккам̣сети, парам̣ вамбхети – ‘ахамасми джа̄нам̣ пассам̣ вихара̄ми, име панан̃н̃е бхиккхӯ аджа̄нам̣ апассам̣ вихарантӣ’ти. со тена н̃а̄н̣адассанена маджджати памаджджати пама̄дам̣ а̄паджджати, паматто сама̄но дуккхам̣ вихарати. айам̣ вуччати, бхиккхаве, бхиккху пхеггум̣ аггахеси брахмачарийасса; тена ча воса̄нам̣ а̄па̄ди.

311. ‘‘идха пана, бхиккхаве, екаччо кулапутто саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена на аттамано хоти, на парипун̣н̣асан̇каппо. со тена ла̄бхасакка̄расилокена на атта̄нуккам̣сети, на парам̣ вамбхети. со тена ла̄бхасакка̄расилокена на маджджати наппамаджджати на пама̄дам̣ а̄паджджати, аппаматто сама̄но сӣласампадам̣ а̄ра̄дхети. со та̄йа сӣласампада̄йа аттамано хоти, но ча кхо парипун̣н̣асан̇каппо. со та̄йа сӣласампада̄йа на атта̄нуккам̣сети, на парам̣ вамбхети. со та̄йа сӣласампада̄йа на маджджати наппамаджджати на пама̄дам̣ а̄паджджати, аппаматто сама̄но сама̄дхисампадам̣ а̄ра̄дхети. со та̄йа сама̄дхисампада̄йа аттамано хоти, но ча кхо парипун̣н̣асан̇каппо. со та̄йа сама̄дхисампада̄йа на атта̄нуккам̣сети, на парам̣ вамбхети. со та̄йа сама̄дхисампада̄йа на маджджати наппамаджджати на пама̄дам̣ а̄паджджати, аппаматто сама̄но н̃а̄н̣адассанам̣ а̄ра̄дхети. со тена н̃а̄н̣адассанена аттамано хоти, но ча кхо парипун̣н̣асан̇каппо. со тена н̃а̄н̣адассанена на атта̄нуккам̣сети, на парам̣ вамбхети. со тена н̃а̄н̣адассанена на маджджати наппамаджджати на пама̄дам̣ а̄паджджати, аппаматто сама̄но асамайавимоккхам̣ а̄ра̄дхети. ат̣т̣ха̄наметам̣ [ат̣т̣ха̄нам̣ кхо панетам̣ (ка.)], бхиккхаве, анавака̄со йам̣ со бхиккху та̄йа асамайавимуттийа̄ париха̄йетха.

‘‘сеййатха̄пи, бхиккхаве, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато са̄ран̃н̃ева чхетва̄ а̄да̄йа паккамеййа ‘са̄ра’нти джа̄нама̄но. таменам̣ чаккхума̄ пурисо дисва̄ евам̣ вадеййа – ‘ан̃н̃а̄си вата̄йам̣ бхавам̣ пурисо са̄рам̣, ан̃н̃а̄си пхеггум̣, ан̃н̃а̄си тачам̣, ан̃н̃а̄си папат̣икам̣, ан̃н̃а̄си са̄кха̄пала̄сам̣. татха̄ хайам̣ бхавам̣ пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато са̄ран̃н̃ева чхетва̄ а̄да̄йа пакканто ‘са̄ра’нти джа̄нама̄но. йан̃часса са̄рена са̄ракаран̣ӣйам̣ тан̃часса аттхам̣ анубхависсатӣ’ти.

‘‘евамева кхо, бхиккхаве, идхекаччо кулапутто саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена на аттамано хоти, на парипун̣н̣асан̇каппо. со тена ла̄бхасакка̄расилокена на атта̄нуккам̣сети, на парам̣ вамбхети. со тена ла̄бхасакка̄расилокена на маджджати наппамаджджати на пама̄дам̣ а̄паджджати, аппаматто сама̄но сӣласампадам̣ а̄ра̄дхети. со та̄йа сӣласампада̄йа аттамано хоти, но ча кхо парипун̣н̣асан̇каппо. со та̄йа сӣласампада̄йа на атта̄нуккам̣сети, на парам̣ вамбхети. со та̄йа сӣласампада̄йа на маджджати наппамаджджати на пама̄дам̣ а̄паджджати, аппаматто сама̄но сама̄дхисампадам̣ а̄ра̄дхети. со та̄йа сама̄дхисампада̄йа аттамано хоти, но ча кхо парипун̣н̣асан̇каппо. со та̄йа сама̄дхисампада̄йа на атта̄нуккам̣сети, на парам̣ вамбхети. со та̄йа сама̄дхисампада̄йа на маджджати наппамаджджати на пама̄дам̣ а̄паджджати, аппаматто сама̄но н̃а̄н̣адассанам̣ а̄ра̄дхети. со тена н̃а̄н̣адассанена аттамано хоти, но ча кхо парипун̣н̣асан̇каппо. со тена н̃а̄н̣адассанена на атта̄нуккам̣сети, на парам̣ вамбхети. со тена н̃а̄н̣адассанена на маджджати наппамаджджати на пама̄дам̣ а̄паджджати, аппаматто сама̄но асамайавимоккхам̣ а̄ра̄дхети. ат̣т̣ха̄наметам̣, бхиккхаве, анавака̄со йам̣ со бхиккху та̄йа асамайавимуттийа̄ париха̄йетха.

‘‘ити кхо, бхиккхаве, найидам̣ брахмачарийам̣ ла̄бхасакка̄расилока̄нисам̣сам̣, на сӣласампада̄нисам̣сам̣, на сама̄дхисампада̄нисам̣сам̣, на н̃а̄н̣адассана̄нисам̣сам̣. йа̄ ча кхо айам̣, бхиккхаве, акуппа̄ четовимутти – етадаттхамидам̣, бхиккхаве, брахмачарийам̣, етам̣ са̄рам̣ етам̣ парийоса̄на’’нти.

идамавоча бхагава̄. аттамана̄ те бхиккхӯ бхагавато бха̄ситам̣ абхинандунти.

маха̄са̄ропамасуттам̣ нит̣т̣хитам̣ навамам̣.