10. чӯл̣аса̄ропамасуттам̣

312. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. атха кхо пин̇галакоччхо бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо пин̇галакоччхо бра̄хман̣о бхагавантам̣ етадавоча – ‘‘йеме, бхо готама, саман̣абра̄хман̣а̄ сан̇гхино ган̣ино ган̣а̄чарийа̄ н̃а̄та̄ йасассино титтхакара̄ са̄дхусаммата̄, бахуджанасса, сеййатхидам̣ – пӯран̣о кассапо, маккхали госа̄ло, аджито кесакамбало, пакудхо качча̄йано, сан̃чайо [сан̃джайо (сӣ. сйа̄. пӣ. ка.)] белат̣т̣хапутто, ниган̣т̣хо на̄т̣апутто, саббете сака̄йа пат̣ин̃н̃а̄йа аббхан̃н̃ам̣су саббева на̄ббхан̃н̃ам̣су, уда̄ху екачче аббхан̃н̃ам̣су екачче на̄ббхан̃н̃ам̣сӯ’’ти? ‘‘алам̣, бра̄хман̣а, тит̣т̣хатетам̣ – саббете сака̄йа пат̣ин̃н̃а̄йа аббхан̃н̃ам̣су саббева на̄ббхан̃н̃ам̣су, уда̄ху екачче аббхан̃н̃ам̣су екачче на̄ббхан̃н̃ам̣сӯти. дхаммам̣ те, бра̄хман̣а, десесса̄ми, там̣ сун̣а̄хи, са̄дхукам̣ манаси карохи, бха̄сисса̄мӣ’’ти. ‘‘евам̣, бхо’’ти кхо пин̇галакоччхо бра̄хман̣о бхагавато паччассоси. бхагава̄ етадавоча –

313. ‘‘сеййатха̄пи, бра̄хман̣а, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣ атиккамма тачам̣ атиккамма папат̣икам̣, са̄кха̄пала̄сам̣ чхетва̄ а̄да̄йа паккамеййа ‘са̄ра’нти ман̃н̃ама̄но. таменам̣ чаккхума̄ пурисо дисва̄ евам̣ вадеййа – ‘на вата̄йам̣ бхавам̣ пурисо ан̃н̃а̄си са̄рам̣, на ан̃н̃а̄си пхеггум̣, на ан̃н̃а̄си тачам̣, на ан̃н̃а̄си папат̣икам̣, на ан̃н̃а̄си са̄кха̄пала̄сам̣. татха̄ хайам̣ бхавам̣ пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣ атиккамма тачам̣ атиккамма папат̣икам̣, са̄кха̄пала̄сам̣ чхетва̄ а̄да̄йа пакканто ‘са̄ра’нти ман̃н̃ама̄но. йан̃часса са̄рена са̄ракаран̣ӣйам̣ тан̃часса аттхам̣ на̄нубхависсатӣ’ти.

314. ‘‘сеййатха̄пи ва̄ пана, бра̄хман̣а, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣ атиккамма тачам̣, папат̣икам̣ чхетва̄ а̄да̄йа паккамеййа ‘са̄ра’нти ман̃н̃ама̄но. таменам̣ чаккхума̄ пурисо дисва̄ евам̣ вадеййа – ‘на вата̄йам̣ бхавам̣ пурисо ан̃н̃а̄си са̄рам̣, на ан̃н̃а̄си пхеггум̣, на ан̃н̃а̄си тачам̣, на ан̃н̃а̄си папат̣икам̣, на ан̃н̃а̄си са̄кха̄пала̄сам̣. татха̄ хайам̣ бхавам̣ пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣ атиккамма тачам̣ папат̣икам̣ чхетва̄ а̄да̄йа пакканто ‘са̄ра’нти ман̃н̃ама̄но. йан̃часса са̄рена са̄ракаран̣ӣйам̣ тан̃часса аттхам̣ на̄нубхависсатӣ’ти.

315. ‘‘сеййатха̄пи ва̄ пана, бра̄хман̣а, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣, тачам̣ чхетва̄ а̄да̄йа паккамеййа ‘са̄ра’нти ман̃н̃ама̄но. таменам̣ чаккхума̄ пурисо дисва̄ евам̣ вадеййа – ‘на вата̄йам̣ бхавам̣ пурисо ан̃н̃а̄си са̄рам̣, на ан̃н̃а̄си пхеггум̣, на ан̃н̃а̄си тачам̣, на ан̃н̃а̄си папат̣икам̣, на ан̃н̃а̄си са̄кха̄пала̄сам̣. татха̄ хайам̣ бхавам̣ пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣, тачам̣ чхетва̄ а̄да̄йа пакканто ‘са̄ра’нти ман̃н̃ама̄но. йан̃часса са̄рена са̄ракаран̣ӣйам̣ тан̃часса аттхам̣ на̄нубхависсатӣ’ти.

316. ‘‘сеййатха̄пи ва̄ пана, бра̄хман̣а, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣, пхеггум̣ чхетва̄ а̄да̄йа паккамеййа ‘са̄ра’нти ман̃н̃ама̄но. таменам̣ чаккхума̄ пурисо дисва̄ евам̣ вадеййа – ‘на вата̄йам̣ бхавам̣ пурисо ан̃н̃а̄си са̄рам̣, на ан̃н̃а̄си пхеггум̣, на ан̃н̃а̄си тачам̣, на ан̃н̃а̄си папат̣икам̣, на ан̃н̃а̄си са̄кха̄пала̄сам̣. татха̄ хайам̣ бхавам̣ пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣, пхеггум̣ чхетва̄ а̄да̄йа пакканто ‘са̄ра’нти ман̃н̃ама̄но. йан̃часса са̄рена са̄ракаран̣ӣйам̣ тан̃часса аттхам̣ на̄нубхависсатӣ’ти.

317. ‘‘сеййатха̄пи ва̄ пана, бра̄хман̣а, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато са̄ран̃н̃ева чхетва̄ а̄да̄йа паккамеййа ‘са̄ра’нти джа̄нама̄но. таменам̣ чаккхума̄ пурисо дисва̄ евам̣ вадеййа – ‘ан̃н̃а̄си вата̄йам̣ бхавам̣ пурисо са̄рам̣, ан̃н̃а̄си пхеггум̣, ан̃н̃а̄си тачам̣, ан̃н̃а̄си папат̣икам̣, ан̃н̃а̄си са̄кха̄пала̄сам̣. татха̄ хайам̣ бхавам̣ пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато са̄ран̃н̃ева чхетва̄ а̄да̄йа пакканто ‘са̄ра’нти джа̄нама̄но. йан̃часса са̄рена са̄ракаран̣ӣйам̣ тан̃часса аттхам̣ анубхависсатӣ’ти.

318. ‘‘евамева кхо, бра̄хман̣а, идхекаччо пуггало саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена аттамано хоти парипун̣н̣асан̇каппо. со тена ла̄бхасакка̄расилокена атта̄нуккам̣сети, парам̣ вамбхети – ‘ахамасми ла̄бхасакка̄расилокава̄, име панан̃н̃е бхиккхӯ аппан̃н̃а̄та̄ аппесаккха̄’ти. ла̄бхасакка̄расилокена ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа на чхандам̣ джанети, на ва̄йамати, олӣнавуттико ча хоти са̄тхалико. сеййатха̄пи со, бра̄хман̣а, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣ атиккамма тачам̣ атиккамма папат̣икам̣, са̄кха̄пала̄сам̣ чхетва̄ а̄да̄йа пакканто ‘са̄ра’нти ман̃н̃ама̄но. йан̃часса са̄рена са̄ракаран̣ӣйам̣ тан̃часса аттхам̣ на̄нубхависсати. татхӯпама̄хам̣, бра̄хман̣а, имам̣ пуггалам̣ вада̄ми.

319. ‘‘идха пана, бра̄хман̣а, екаччо пуггало саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена на аттамано хоти на парипун̣н̣асан̇каппо. со тена ла̄бхасакка̄расилокена на атта̄нуккам̣сети, на парам̣ вамбхети. ла̄бхасакка̄расилокена ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа чхандам̣ джанети, ва̄йамати, анолӣнавуттико ча хоти аса̄тхалико. со сӣласампадам̣ а̄ра̄дхети. со та̄йа сӣласампада̄йа аттамано хоти, парипун̣н̣асан̇каппо. со та̄йа сӣласампада̄йа атта̄нуккам̣сети, парам̣ вамбхети – ‘ахамасми сӣлава̄ калйа̄н̣адхаммо, име панан̃н̃е бхиккхӯ дуссӣла̄ па̄падхамма̄’ти. сӣласампада̄йа ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа на чхандам̣ джанети, на ва̄йамати, олӣнавуттико ча хоти са̄тхалико. сеййатха̄пи со, бра̄хман̣а, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣ атиккамма тачам̣, папат̣икам̣ чхетва̄ а̄да̄йа пакканто ‘са̄ра’нти ман̃н̃ама̄но. йан̃часса са̄рена са̄ракаран̣ӣйам̣, тан̃часса аттхам̣ на̄нубхависсати. татхӯпама̄хам̣, бра̄хман̣а, имам̣ пуггалам̣ вада̄ми.

320. ‘‘идха пана, бра̄хман̣а, екаччо пуггало саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена на аттамано хоти, на парипун̣н̣асан̇каппо. со тена ла̄бхасакка̄расилокена на атта̄нуккам̣сети, на парам̣ вамбхети. ла̄бхасакка̄расилокена ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа чхандам̣ джанети, ва̄йамати, анолӣнавуттико ча хоти аса̄тхалико. со сӣласампадам̣ а̄ра̄дхети. со та̄йа сӣласампада̄йа аттамано хоти но ча кхо парипун̣н̣асан̇каппо. со та̄йа сӣласампада̄йа на атта̄нуккам̣сети, на парам̣ вамбхети. сӣласампада̄йа ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа чхандам̣ джанети, ва̄йамати, анолӣнавуттико ча хоти аса̄тхалико. со сама̄дхисампадам̣ а̄ра̄дхети. со та̄йа сама̄дхисампада̄йа аттамано хоти, парипун̣н̣асан̇каппо. со та̄йа сама̄дхисампада̄йа атта̄нуккам̣сети, парам̣ вамбхети – ‘ахамасми сама̄хито екаггачитто, име панан̃н̃е бхиккхӯ асама̄хита̄ виббхантачитта̄’ти. сама̄дхисампада̄йа ча йе ан̃н̃е дхамма̄ уттаритара̄ ча пан̣ӣтатара̄ ча, тесам̣ дхамма̄нам̣ саччхикирийа̄йа на чхандам̣ джанети, на ва̄йамати, олӣнавуттико ча хоти са̄тхалико. сеййатха̄пи со, бра̄хман̣а, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣ атиккамма пхеггум̣, тачам̣ чхетва̄ а̄да̄йа пакканто ‘са̄ра’нти ман̃н̃ама̄но. йан̃часса са̄рена са̄ракаран̣ӣйам̣ тан̃часса аттхам̣ на̄нубхависсати. татхӯпама̄хам̣, бра̄хман̣а, имам̣ пуггалам̣ вада̄ми.

321. ‘‘идха пана, бра̄хман̣а, екаччо пуггало саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена…пе… антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена на аттамано хоти на парипун̣н̣асан̇каппо. со тена ла̄бхасакка̄расилокена на атта̄нуккам̣сети, на парам̣ вамбхети. ла̄бхасакка̄расилокена ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа чхандам̣ джанети, ва̄йамати, анолӣнавуттико ча хоти аса̄тхалико. со сӣласампадам̣ а̄ра̄дхети. со та̄йа сӣласампада̄йа аттамано хоти, но ча кхо парипун̣н̣асан̇каппо. со та̄йа сӣласампада̄йа на атта̄нуккам̣сети, на парам̣ вамбхети. сӣласампада̄йа ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа чхандам̣ джанети, ва̄йамати, анолӣнавуттико ча хоти аса̄тхалико. со сама̄дхисампадам̣ а̄ра̄дхети. со та̄йа сама̄дхисампада̄йа аттамано хоти, но ча кхо парипун̣н̣асан̇каппо. со та̄йа сама̄дхисампада̄йа на атта̄нуккам̣сети, на парам̣ вамбхети. сама̄дхисампада̄йа ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа чхандам̣ джанети, ва̄йамати, анолӣнавуттико ча хоти аса̄тхалико. со н̃а̄н̣адассанам̣ а̄ра̄дхети. со тена н̃а̄н̣адассанена аттамано хоти, парипун̣н̣асан̇каппо. со тена н̃а̄н̣адассанена атта̄нуккам̣сети, парам̣ вамбхети – ‘ахамасми джа̄нам̣ пассам̣ вихара̄ми, име панан̃н̃е бхиккхӯ аджа̄нам̣ апассам̣ вихарантӣ’ти. н̃а̄н̣адассанена ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа на чхандам̣ джанети, на ва̄йамати, олӣнавуттико ча хоти са̄тхалико. сеййатха̄пи со, бра̄хман̣а, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато атиккаммева са̄рам̣, пхеггум̣ чхетва̄ а̄да̄йа пакканто ‘са̄ра’нти ман̃н̃ама̄но. йан̃часса са̄рена са̄ракаран̣ӣйам̣ тан̃часса аттхам̣ на̄нубхависсати. татхӯпама̄хам̣, бра̄хман̣а, имам̣ пуггалам̣ вада̄ми.

322. ‘‘идха пана, бра̄хман̣а, екаччо пуггало саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето, аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти. со евам̣ паббаджито сама̄но ла̄бхасакка̄расилокам̣ абхиниббаттети. со тена ла̄бхасакка̄расилокена на аттамано хоти, на парипун̣н̣асан̇каппо. со тена ла̄бхасакка̄расилокена на атта̄нуккам̣сети, на парам̣ вамбхети. ла̄бхасакка̄расилокена ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа чхандам̣ джанети, ва̄йамати, анолӣнавуттико ча хоти аса̄тхалико. со сӣласампадам̣ а̄ра̄дхети. со та̄йа сӣласампада̄йа аттамано хоти, но ча кхо парипун̣н̣асан̇каппо. со та̄йа сӣласампада̄йа на атта̄нуккам̣сети, на парам̣ вамбхети. сӣласампада̄йа ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа чхандам̣ джанети, ва̄йамати, анолӣнавуттико ча хоти аса̄тхалико. со сама̄дхисампадам̣ а̄ра̄дхети. со та̄йа сама̄дхисампада̄йа аттамано хоти, но ча кхо парипун̣н̣асан̇каппо. со та̄йа сама̄дхисампада̄йа на атта̄нуккам̣сети, на парам̣ вамбхети. сама̄дхисампада̄йа ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа чхандам̣ джанети, ва̄йамати, анолӣнавуттико ча хоти аса̄тхалико. со н̃а̄н̣адассанам̣ а̄ра̄дхети. со тена н̃а̄н̣адассанена аттамано хоти, но ча кхо парипун̣н̣асан̇каппо. со тена н̃а̄н̣адассанена на атта̄нуккам̣сети, на парам̣ вамбхети. н̃а̄н̣адассанена ча йе ан̃н̃е дхамма̄ уттаритара̄ ча пан̣ӣтатара̄ ча тесам̣ дхамма̄нам̣ саччхикирийа̄йа чхандам̣ джанети, ва̄йамати, анолӣнавуттико ча хоти аса̄тхалико.

323. ‘‘катаме ча, бра̄хман̣а, дхамма̄ н̃а̄н̣адассанена уттаритара̄ ча пан̣ӣтатара̄ ча? идха, бра̄хман̣а, бхиккху вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа вихарати. айампи кхо, бра̄хман̣а, дхаммо н̃а̄н̣адассанена уттаритаро ча пан̣ӣтатаро ча.

‘‘пуна чапарам̣, бра̄хман̣а, бхиккху витаккавича̄ра̄нам̣ вӯпасама̄ аджджхаттам̣ сампаса̄данам̣ четасо екодибха̄вам̣ авитаккам̣ авича̄рам̣ сама̄дхиджам̣ пӣтисукхам̣ дутийам̣ джха̄нам̣ упасампаджджа вихарати. айампи кхо, бра̄хман̣а, дхаммо н̃а̄н̣адассанена уттаритаро ча пан̣ӣтатаро ча.

‘‘пуна чапарам̣, бра̄хман̣а, бхиккху пӣтийа̄ ча вира̄га̄ упеккхако ча вихарати, сато ча сампаджа̄но сукхан̃ча ка̄йена пат̣исам̣ведети, йам̣ там̣ арийа̄ а̄чиккханти – ‘упеккхако сатима̄ сукхавиха̄рӣ’ти татийам̣ джха̄нам̣ упасампаджджа вихарати. айампи кхо, бра̄хман̣а, дхаммо н̃а̄н̣адассанена уттаритаро ча пан̣ӣтатаро ча.

‘‘пуна чапарам̣, бра̄хман̣а, бхиккху сукхасса ча паха̄на̄ дуккхасса ча паха̄на̄ пуббева соманассадоманасса̄нам̣ аттхан̇гама̄ адуккхамасукхам̣ упеккха̄сатипа̄рисуддхим̣ чатуттхам̣ джха̄нам̣ упасампаджджа вихарати. айампи кхо, бра̄хман̣а, дхаммо н̃а̄н̣адассанена уттаритаро ча пан̣ӣтатаро ча.

‘‘пуна чапарам̣, бра̄хман̣а, бхиккху саббасо рӯпасан̃н̃а̄нам̣ саматиккама̄ пат̣игхасан̃н̃а̄нам̣ аттхан̇гама̄ на̄наттасан̃н̃а̄нам̣ аманасика̄ра̄ ‘ананто а̄ка̄со’ти а̄ка̄са̄нан̃ча̄йатанам̣ упасампаджджа вихарати. айампи кхо, бра̄хман̣а, дхаммо н̃а̄н̣адассанена уттаритаро ча пан̣ӣтатаро ча.

‘‘пуна чапарам̣, бра̄хман̣а, бхиккху саббасо а̄ка̄са̄нан̃ча̄йатанам̣ саматиккамма ‘анантам̣ вин̃н̃а̄н̣а’нти вин̃н̃а̄н̣ан̃ча̄йатанам̣ упасампаджджа вихарати. айампи кхо, бра̄хман̣а, дхаммо н̃а̄н̣адассанена уттаритаро ча пан̣ӣтатаро ча.

‘‘пуна чапарам̣, бра̄хман̣а, бхиккху саббасо вин̃н̃а̄н̣ан̃ча̄йатанам̣ саматиккамма ‘наттхи кин̃чӣ’ти а̄кин̃чан̃н̃а̄йатанам̣ упасампаджджа вихарати. айампи кхо, бра̄хман̣а, дхаммо н̃а̄н̣адассанена уттаритаро ча пан̣ӣтатаро ча.

‘‘пуна чапарам̣, бра̄хман̣а, бхиккху саббасо а̄кин̃чан̃н̃а̄йатанам̣ саматиккамма невасан̃н̃а̄на̄сан̃н̃а̄йатанам̣ упасампаджджа вихарати. айампи кхо, бра̄хман̣а, дхаммо н̃а̄н̣адассанена уттаритаро ча пан̣ӣтатаро ча.

‘‘пуна чапарам̣, бра̄хман̣а, бхиккху саббасо невасан̃н̃а̄на̄сан̃н̃а̄йатанам̣ саматиккамма сан̃н̃а̄ведайитаниродхам̣ упасампаджджа вихарати, пан̃н̃а̄йа часса дисва̄ а̄сава̄ париккхӣн̣а̄ хонти. айампи кхо, бра̄хман̣а, дхаммо н̃а̄н̣адассанена уттаритаро ча пан̣ӣтатаро ча. име кхо, бра̄хман̣а, дхамма̄ н̃а̄н̣адассанена уттаритара̄ ча пан̣ӣтатара̄ ча.

324. ‘‘сеййатха̄пи со, бра̄хман̣а, пурисо са̄раттхико са̄рагавесӣ са̄рапарийесанам̣ чарама̄но махато руккхасса тит̣т̣хато са̄равато са̄рам̣йева чхетва̄ а̄да̄йа пакканто ‘са̄ра’нти джа̄нама̄но. йан̃часса са̄рена са̄ракаран̣ӣйам̣ тан̃часса аттхам̣ анубхависсати. татхӯпама̄хам̣, бра̄хман̣а, имам̣ пуггалам̣ вада̄ми.

‘‘ити кхо, бра̄хман̣а, найидам̣ брахмачарийам̣ ла̄бхасакка̄расилока̄нисам̣сам̣, на сӣласампада̄нисам̣сам̣, на сама̄дхисампада̄нисам̣сам̣, на н̃а̄н̣адассана̄нисам̣сам̣. йа̄ ча кхо айам̣, бра̄хман̣а, акуппа̄ четовимутти – етадаттхамидам̣, бра̄хман̣а, брахмачарийам̣, етам̣ са̄рам̣ етам̣ парийоса̄на’’нти.

евам̣ вутте, пин̇галакоччхо бра̄хман̣о бхагавантам̣ етадавоча – ‘‘абхиккантам̣, бхо готама, абхиккантам̣, бхо готама…пе… упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти.

чӯл̣аса̄ропамасуттам̣ нит̣т̣хитам̣ дасамам̣.

опаммавагго нит̣т̣хито татийо.