3. ваммикасуттам̣

249. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена а̄йасма̄ кума̄ракассапо андхаване вихарати. атха кхо ан̃н̃атара̄ девата̄ абхикканта̄йа раттийа̄ абхиккантаван̣н̣а̄ кевалакаппам̣ андхаванам̣ обха̄сетва̄ йена̄йасма̄ кума̄ракассапо тенупасан̇ками; упасан̇камитва̄ екамантам̣ ат̣т̣ха̄си. екамантам̣ т̣хита̄ кхо са̄ девата̄ а̄йасмантам̣ кума̄ракассапам̣ етадавоча –

‘‘бхиккху бхиккху, айам̣ ваммико [ваммӣко (каттхачи) сакката̄нурӯпам̣] раттим̣ дхӯма̄йати, дива̄ паджджалати. бра̄хман̣о евама̄ха – ‘абхиккхан̣а, сумедха, саттхам̣ а̄да̄йа̄’ти. абхиккхан̣анто сумедхо саттхам̣ а̄да̄йа аддаса лан̇гим̣ ‘лан̇гӣ, бхаданте’ти. бра̄хман̣о евама̄ха – ‘уккхипа лан̇гим̣; абхиккхан̣а, сумедха, саттхам̣ а̄да̄йа̄’ти. абхиккхан̣анто сумедхо саттхам̣ а̄да̄йа аддаса уддхума̄йикам̣. ‘уддхума̄йика̄, бхаданте’ти. бра̄хман̣о евама̄ха – ‘уккхипа уддхума̄йикам̣; абхиккхан̣а, сумедха, саттхам̣ а̄да̄йа̄’ти. абхиккхан̣анто сумедхо саттхам̣ а̄да̄йа аддаса двидха̄патхам̣. ‘двидха̄патхо, бхаданте’ти. бра̄хман̣о евама̄ха – ‘уккхипа двидха̄патхам̣; абхиккхан̣а, сумедха, саттхам̣ а̄да̄йа̄’ти. абхиккхан̣анто сумедхо саттхам̣ а̄да̄йа аддаса чан̇гава̄рам̣ [пан̇кава̄рам̣ (сйа̄.), чан̇кава̄рам̣ (ка.)]. ‘чан̇гава̄ро, бхаданте’ти. бра̄хман̣о евама̄ха – ‘уккхипа чан̇гава̄рам̣; абхиккхан̣а, сумедха, саттхам̣ а̄да̄йа̄’ти. абхиккхан̣анто сумедхо саттхам̣ а̄да̄йа аддаса куммам̣. ‘куммо, бхаданте’ти. бра̄хман̣о евама̄ха – ‘уккхипа куммам̣; абхиккхан̣а, сумедха, саттхам̣ а̄да̄йа̄’ти. абхиккхан̣анто сумедхо саттхам̣ а̄да̄йа аддаса асисӯнам̣. ‘асисӯна̄, бхаданте’ти. бра̄хман̣о евама̄ха – ‘уккхипа асисӯнам̣; абхиккхан̣а, сумедха, саттхам̣ а̄да̄йа̄’ти. абхиккхан̣анто сумедхо саттхам̣ а̄да̄йа аддаса мам̣сапесим̣. ‘мам̣сапеси, бхаданте’ти. бра̄хман̣о евама̄ха – ‘уккхипа мам̣сапесим̣; абхиккхан̣а, сумедха, саттхам̣ а̄да̄йа̄’ти. абхиккхан̣анто сумедхо саттхам̣ а̄да̄йа аддаса на̄гам̣. ‘на̄го, бхаданте’ти. бра̄хман̣о евама̄ха – ‘тит̣т̣хату на̄го, ма̄ на̄гам̣ гхат̣т̣еси; намо карохи на̄гасса̄’’’ти.

‘‘име кхо твам̣, бхиккху, пан̃хе бхагавантам̣ упасан̇камитва̄ пуччхеййа̄си, йатха̄ ча те бхагава̄ бйа̄кароти татха̄ нам̣ дха̄реййа̄си. на̄хам̣ там̣, бхиккху, пасса̄ми садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа, йо имесам̣ пан̃ха̄нам̣ веййа̄каран̣ена читтам̣ а̄ра̄дхеййа ан̃н̃атра татха̄гатена ва̄, татха̄гатаса̄вакена ва̄, ито ва̄ пана сутва̄’’ти – идамавоча са̄ девата̄. идам̣ ватва̄ таттхевантарадха̄йи.

250. атха кхо а̄йасма̄ кума̄ракассапо тасса̄ раттийа̄ аччайена йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ кума̄ракассапо бхагавантам̣ етадавоча – ‘‘имам̣, бханте, раттим̣ ан̃н̃атара̄ девата̄ абхикканта̄йа раттийа̄ абхиккантаван̣н̣а̄ кевалакаппам̣ андхаванам̣ обха̄сетва̄ йена̄хам̣ тенупасан̇ками; упасан̇камитва̄ екамантам̣ ат̣т̣ха̄си. екамантам̣ т̣хита̄ кхо, бханте, са̄ девата̄ мам̣ етадавоча – ‘бхиккху бхиккху, айам̣ ваммико раттим̣ дхӯма̄йати, дива̄ паджджалати’. бра̄хман̣о евама̄ха – ‘абхиккхан̣а, сумедха, саттхам̣ а̄да̄йа̄’ти. абхиккхан̣анто сумедхо саттхам̣ а̄да̄йа…пе… ито ва̄ пана сутва̄ти. идамавоча, бханте, са̄ девата̄. идам̣ ватва̄ таттхевантарадха̄йи. ‘ко ну кхо, бханте, ваммико, ка̄ раттим̣ дхӯма̄йана̄, ка̄ дива̄ паджджалана̄, ко бра̄хман̣о, ко сумедхо, ким̣ саттхам̣, ким̣ абхиккхан̣ам̣, ка̄ лан̇гӣ, ка̄ уддхума̄йика̄, ко двидха̄патхо, ким̣ чан̇гава̄рам̣, ко куммо, ка̄ асисӯна̄, ка̄ мам̣сапеси, ко на̄го’’’ти?

251. ‘‘‘ваммико’ти кхо, бхиккху, имассетам̣ ча̄тумаха̄бхӯтикасса [ча̄туммаха̄бхӯтикасса (сӣ. сйа̄. пӣ.)] ка̄йасса адхивачанам̣, ма̄та̄петтикасамбхавасса оданакумма̄сӯпачайасса аниччуччха̄дана-паримадданабхедана-виддхам̣сана-дхаммасса.

‘‘йам̣ кхо, бхиккху, дива̄ камманте [каммантам̣ (ка.)] а̄раббха раттим̣ анувитаккети анувича̄рети – айам̣ раттим̣ дхӯма̄йана̄. йам̣ кхо, бхиккху, раттим̣ анувитаккетва̄ анувича̄ретва̄ дива̄ камманте пайоджети ка̄йена ва̄ча̄йа ‘манаса̄’ [( ) наттхи (сӣ. сйа̄.)] – айам̣ дива̄ паджджалана̄.

‘‘‘бра̄хман̣о’ти кхо, бхиккху, татха̄гатассетам̣ адхивачанам̣ арахато самма̄самбуддхасса. ‘сумедхо’ти кхо бхиккху секкхассетам̣ бхиккхуно адхивачанам̣.

‘‘‘саттха’нти кхо, бхиккху, арийа̄йетам̣ пан̃н̃а̄йа адхивачанам̣. ‘абхиккхан̣а’нти кхо, бхиккху, вӣрийа̄рамбхассетам̣ адхивачанам̣.

‘‘‘лан̇гӣ’ти кхо, бхиккху, авиджджа̄йетам̣ адхивачанам̣. уккхипа лан̇гим̣, паджаха авиджджам̣; абхиккхан̣а, сумедха, саттхам̣ а̄да̄йа̄ти айаметасса аттхо.

‘‘‘уддхума̄йика̄’ти кхо, бхиккху, кодхӯпа̄йа̄сассетам̣ адхивачанам̣. уккхипа уддхума̄йикам̣, паджаха кодхӯпа̄йа̄сам̣; абхиккхан̣а, сумедха, саттхам̣ а̄да̄йа̄ти айаметасса аттхо.

‘‘‘двидха̄патхо’ти кхо, бхиккху, вичикиччха̄йетам̣ адхивачанам̣. уккхипа двидха̄патхам̣, паджаха вичикиччхам̣; абхиккхан̣а, сумедха, саттхам̣ а̄да̄йа̄ти айаметасса аттхо.

‘‘‘чан̇гава̄ра’нти кхо, бхиккху, пан̃чаннетам̣ нӣваран̣а̄нам̣ адхивачанам̣, сеййатхидам̣ – ка̄маччханданӣваран̣асса, бйа̄па̄данӣваран̣асса, тхӣнамиддханӣваран̣асса, уддхаччакуккуччанӣваран̣асса, вичикиччха̄нӣваран̣асса. уккхипа чан̇гава̄рам̣, паджаха пан̃ча нӣваран̣е; абхиккхан̣а, сумедха, саттхам̣ а̄да̄йа̄ти айаметасса аттхо.

‘‘‘куммо’ти кхо, бхиккху, пан̃чаннетам̣ упа̄да̄наккхандха̄нам̣ адхивачанам̣, сеййатхидам̣ – рӯпупа̄да̄наккхандхасса, веданупа̄да̄наккхандхасса, сан̃н̃упа̄да̄наккхандхасса, сан̇кха̄рупа̄да̄наккхандхасса, вин̃н̃а̄н̣упа̄да̄наккхандхасса. уккхипа куммам̣, паджаха пан̃чупа̄да̄наккхандхе; абхиккхан̣а, сумедха, саттхам̣ а̄да̄йа̄ти айаметасса аттхо.

‘‘‘асисӯна̄’ти кхо, бхиккху, пан̃чаннетам̣ ка̄магун̣а̄нам̣ адхивачанам̣ – чаккхувин̃н̃еййа̄нам̣ рӯпа̄нам̣ ит̣т̣ха̄нам̣ канта̄нам̣ мана̄па̄нам̣ пийарӯпа̄нам̣ ка̄мӯпасам̣хита̄нам̣ раджанӣйа̄нам̣, сотавин̃н̃еййа̄нам̣ садда̄нам̣…пе… гха̄навин̃н̃еййа̄нам̣ гандха̄нам̣…пе… дживха̄вин̃н̃еййа̄нам̣ раса̄нам̣…пе… ка̄йавин̃н̃еййа̄нам̣ пхот̣т̣хабба̄нам̣ ит̣т̣ха̄нам̣ канта̄нам̣ мана̄па̄нам̣ пийарӯпа̄нам̣ ка̄мӯпасам̣хита̄нам̣ раджанӣйа̄нам̣. уккхипа асисӯнам̣, паджаха пан̃ча ка̄магун̣е; абхиккхан̣а, сумедха, саттхам̣ а̄да̄йа̄ти айаметасса аттхо.

‘‘‘мам̣сапесӣ’ти кхо, бхиккху, нандӣра̄гассетам̣ адхивачанам̣. уккхипа мам̣сапесим̣, паджаха нандӣра̄гам̣; абхиккхан̣а, сумедха, саттхам̣ а̄да̄йа̄ти айаметасса аттхо.

‘‘‘на̄го’ти кхо, бхиккху, кхӣн̣а̄савассетам̣ бхиккхуно адхивачанам̣. тит̣т̣хату на̄го, ма̄ на̄гам̣ гхат̣т̣еси; намо карохи на̄гасса̄ти айаметасса аттхо’’ти.

идамавоча бхагава̄. аттамано а̄йасма̄ кума̄ракассапо бхагавато бха̄ситам̣ абхинандӣти.

ваммикасуттам̣ нит̣т̣хитам̣ татийам̣.