7. ванапаттхасуттам̣

190. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча – ‘‘ванапаттхапарийа̄йам̣ во, бхиккхаве, десесса̄ми, там̣ сун̣а̄тха, са̄дхукам̣ манасикаротха, бха̄сисса̄мӣ’’ти. ‘‘евам̣, бханте’’ти кхо те бхиккхӯ бхагавато паччассосум̣. бхагава̄ етадавоча –

191. ‘‘идха, бхиккхаве, бхиккху ан̃н̃атарам̣ ванапаттхам̣ упанисса̄йа вихарати. тасса там̣ ванапаттхам̣ упанисса̄йа вихарато анупат̣т̣хита̄ чева сати на упат̣т̣ха̄ти, асама̄хитан̃ча читтам̣ на сама̄дхийати, апариккхӣн̣а̄ ча а̄сава̄ на париккхайам̣ гаччханти, анануппаттан̃ча ануттарам̣ йогаккхемам̣ на̄нупа̄пун̣а̄ти. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те касирена самуда̄гаччханти. тена, бхиккхаве, бхиккхуна̄ ити пат̣исан̃чиккхитаббам̣ – ‘ахам̣ кхо имам̣ ванапаттхам̣ упанисса̄йа вихара̄ми, тасса ме имам̣ ванапаттхам̣ упанисса̄йа вихарато анупат̣т̣хита̄ чева сати на упат̣т̣ха̄ти, асама̄хитан̃ча читтам̣ на сама̄дхийати, апариккхӣн̣а̄ ча а̄сава̄ на париккхайам̣ гаччханти, анануппаттан̃ча ануттарам̣ йогаккхемам̣ на̄нупа̄пун̣а̄ми. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те касирена самуда̄гаччхантӣ’ти. тена, бхиккхаве, бхиккхуна̄ раттибха̄гам̣ ва̄ дивасабха̄гам̣ ва̄ тамха̄ ванапаттха̄ паккамитаббам̣, на ваттхаббам̣.

192. ‘‘идха пана, бхиккхаве, бхиккху ан̃н̃атарам̣ ванапаттхам̣ упанисса̄йа вихарати. тасса там̣ ванапаттхам̣ упанисса̄йа вихарато анупат̣т̣хита̄ чева сати на упат̣т̣ха̄ти, асама̄хитан̃ча читтам̣ на сама̄дхийати, апариккхӣн̣а̄ ча а̄сава̄ на париккхайам̣ гаччханти, анануппаттан̃ча ануттарам̣ йогаккхемам̣ на̄нупа̄пун̣а̄ти. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те аппакасирена самуда̄гаччханти. тена, бхиккхаве, бхиккхуна̄ ити пат̣исан̃чиккхитаббам̣ – ‘ахам̣ кхо имам̣ ванапаттхам̣ упанисса̄йа вихара̄ми. тасса ме имам̣ ванапаттхам̣ упанисса̄йа вихарато анупат̣т̣хита̄ чева сати на упат̣т̣ха̄ти асама̄хитан̃ча читтам̣ на сама̄дхийати, апариккхӣн̣а̄ ча а̄сава̄ на париккхайам̣ гаччханти, анануппаттан̃ча ануттарам̣ йогаккхемам̣ на̄нупа̄пун̣а̄ми. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те аппакасирена самуда̄гаччханти. на кхо пана̄хам̣ чӣварахету ага̄расма̄ анага̄рийам̣ паббаджито на пин̣д̣апа̄тахету…пе… на сена̄санахету…пе… на гила̄наппаччайабхесаджджапариккха̄рахету ага̄расма̄ анага̄рийам̣ паббаджито. атха ча пана ме имам̣ ванапаттхам̣ упанисса̄йа вихарато анупат̣т̣хита̄ чева сати на упат̣т̣ха̄ти, асама̄хитан̃ча читтам̣ на сама̄дхийати, апариккхӣн̣а̄ ча а̄сава̄ на париккхайам̣ гаччханти, анануппаттан̃ча ануттарам̣ йогаккхемам̣ на̄нупа̄пун̣а̄мӣ’ти. тена, бхиккхаве, бхиккхуна̄ сан̇кха̄пи тамха̄ ванапаттха̄ паккамитаббам̣, на ваттхаббам̣.

193. ‘‘идха пана, бхиккхаве, бхиккху ан̃н̃атарам̣ ванапаттхам̣ упанисса̄йа вихарати. тасса там̣ ванапаттхам̣ упанисса̄йа вихарато анупат̣т̣хита̄ чева сати упат̣т̣ха̄ти, асама̄хитан̃ча читтам̣ сама̄дхийати, апариккхӣн̣а̄ ча а̄сава̄ париккхайам̣ гаччханти, анануппаттан̃ча ануттарам̣ йогаккхемам̣ анупа̄пун̣а̄ти. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄, те касирена самуда̄гаччханти. тена, бхиккхаве, бхиккхуна̄ ити пат̣исан̃чиккхитаббам̣ – ‘ахам̣ кхо имам̣ ванапаттхам̣ упанисса̄йа вихара̄ми. тасса ме имам̣ ванапаттхам̣ упанисса̄йа вихарато анупат̣т̣хита̄ чева сати упат̣т̣ха̄ти асама̄хитан̃ча читтам̣ сама̄дхийати, апариккхӣн̣а̄ ча а̄сава̄ париккхайам̣ гаччханти, анануппаттан̃ча ануттарам̣ йогаккхемам̣ анупа̄пун̣а̄ми. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те касирена самуда̄гаччханти. на кхо пана̄хам̣ чӣварахету ага̄расма̄ анага̄рийам̣ паббаджито, на пин̣д̣апа̄тахету…пе… на сена̄санахету…пе… на гила̄наппаччайабхесаджджапариккха̄рахету ага̄расма̄ анага̄рийам̣ паббаджито. атха ча пана ме имам̣ ванапаттхам̣ упанисса̄йа вихарато анупат̣т̣хита̄ чева сати упат̣т̣ха̄ти, асама̄хитан̃ча читтам̣ сама̄дхийати, апариккхӣн̣а̄ ча а̄сава̄ париккхайам̣ гаччханти, анануппаттан̃ча ануттарам̣ йогаккхемам̣ анупа̄пун̣а̄мӣ’ти. тена, бхиккхаве, бхиккхуна̄ сан̇кха̄пи тасмим̣ ванапаттхе ваттхаббам̣, на паккамитаббам̣.

194. ‘‘идха пана, бхиккхаве, бхиккху ан̃н̃атарам̣ ванапаттхам̣ упанисса̄йа вихарати. тасса там̣ ванапаттхам̣ упанисса̄йа вихарато анупат̣т̣хита̄ чева сати упат̣т̣ха̄ти, асама̄хитан̃ча читтам̣ сама̄дхийати, апариккхӣн̣а̄ ча а̄сава̄ париккхайам̣ гаччханти, анануппаттан̃ча ануттарам̣ йогаккхемам̣ анупа̄пун̣а̄ти. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те аппакасирена самуда̄гаччханти. тена, бхиккхаве, бхиккхуна̄ ити пат̣исан̃чиккхитаббам̣ – ‘ахам̣ кхо имам̣ ванапаттхам̣ упанисса̄йа вихара̄ми. тасса ме имам̣ ванапаттхам̣ упанисса̄йа вихарато анупат̣т̣хита̄ чева сати упат̣т̣ха̄ти асама̄хитан̃ча читтам̣ сама̄дхийати, апариккхӣн̣а̄ ча а̄сава̄ париккхайам̣ гаччханти, анануппаттан̃ча ануттарам̣ йогаккхемам̣ анупа̄пун̣а̄ми. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те аппакасирена самуда̄гаччхантӣ’ти. тена, бхиккхаве, бхиккхуна̄ йа̄ваджӣвампи тасмим̣ ванапаттхе ваттхаббам̣, на паккамитаббам̣.

195. ‘‘идха, бхиккхаве, бхиккху ан̃н̃атарам̣ га̄мам̣ упанисса̄йа вихарати …пе… ан̃н̃атарам̣ нигамам̣ упанисса̄йа вихарати…пе… ан̃н̃атарам̣ нагарам̣ упанисса̄йа вихарати…пе… ан̃н̃атарам̣ джанападам̣ упанисса̄йа вихарати…пе… ан̃н̃атарам̣ пуггалам̣ упанисса̄йа вихарати. тасса там̣ пуггалам̣ упанисса̄йа вихарато анупат̣т̣хита̄ чева сати на упат̣т̣ха̄ти, асама̄хитан̃ча читтам̣ на сама̄дхийати, апариккхӣн̣а̄ ча а̄сава̄ на париккхайам̣ гаччханти, анануппаттан̃ча ануттарам̣ йогаккхемам̣ на̄нупа̄пун̣а̄ти. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те касирена самуда̄гаччханти. тена, бхиккхаве, бхиккхуна̄ ити пат̣исан̃чиккхитаббам̣ – ‘ахам̣ кхо имам̣ пуггалам̣ упанисса̄йа вихара̄ми. тасса ме имам̣ пуггалам̣ упанисса̄йа вихарато анупат̣т̣хита̄ чева сати на упат̣т̣ха̄ти, асама̄хитан̃ча читтам̣ на сама̄дхийати, апариккхӣн̣а̄ ча а̄сава̄ на париккхайам̣ гаччханти, анануппаттан̃ча ануттарам̣ йогаккхемам̣ на̄нупа̄пун̣а̄ми. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те касирена самуда̄гаччхантӣ’ти. тена, бхиккхаве, бхиккхуна̄ раттибха̄гам̣ ва̄ дивасабха̄гам̣ ва̄ со пуггало ана̄пуччха̄ паккамитаббам̣, на̄нубандхитаббо.

196. ‘‘идха пана, бхиккхаве, бхиккху ан̃н̃атарам̣ пуггалам̣ упанисса̄йа вихарати. тасса там̣ пуггалам̣ упанисса̄йа вихарато анупат̣т̣хита̄ чева сати на упат̣т̣ха̄ти, асама̄хитан̃ча читтам̣ на сама̄дхийати, апариккхӣн̣а̄ ча а̄сава̄ на париккхайам̣ гаччханти, анануппаттан̃ча ануттарам̣ йогаккхемам̣ на̄нупа̄пун̣а̄ти. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄, те аппакасирена самуда̄гаччханти. тена, бхиккхаве, бхиккхуна̄ ити пат̣исан̃чиккхитаббам̣ – ‘ахам̣ кхо имам̣ пуггалам̣ упанисса̄йа вихара̄ми. тасса ме имам̣ пуггалам̣ упанисса̄йа вихарато анупат̣т̣хита̄ чева сати на упат̣т̣ха̄ти, асама̄хитан̃ча читтам̣ на сама̄дхийати, апариккхӣн̣а̄ ча а̄сава̄ на париккхайам̣ гаччханти, анануппаттан̃ча ануттарам̣ йогаккхемам̣ на̄нупа̄пун̣а̄ми. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те аппакасирена самуда̄гаччханти. на кхо пана̄хам̣ чӣварахету ага̄расма̄ анага̄рийам̣ паббаджито, на пин̣д̣апа̄тахету…пе… на сена̄санахету…пе… на гила̄наппаччайабхесаджджапариккха̄рахету ага̄расма̄ анага̄рийам̣ паббаджито. атха ча пана ме имам̣ пуггалам̣ упанисса̄йа вихарато анупат̣т̣хита̄ чева сати на упат̣т̣ха̄ти, асама̄хитан̃ча читтам̣ на сама̄дхийати, апариккхӣн̣а̄ ча а̄сава̄ на париккхайам̣ гаччханти, анануппаттан̃ча ануттарам̣ йогаккхемам̣ на̄нупа̄пун̣а̄мӣ’ти. тена, бхиккхаве, бхиккхуна̄ сан̇кха̄пи со пуггало а̄пуччха̄ паккамитаббам̣, на̄нубандхитаббо.

197. ‘‘идха пана, бхиккхаве, бхиккху ан̃н̃атарам̣ пуггалам̣ упанисса̄йа вихарати. тасса там̣ пуггалам̣ упанисса̄йа вихарато анупат̣т̣хита̄ чева сати упат̣т̣ха̄ти, асама̄хитан̃ча читтам̣ сама̄дхийати, апариккхӣн̣а̄ ча а̄сава̄ париккхайам̣ гаччханти, анануппаттан̃ча ануттарам̣ йогаккхемам̣ анупа̄пун̣а̄ти. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те касирена самуда̄гаччханти. тена, бхиккхаве, бхиккхуна̄ ити пат̣исан̃чиккхитаббам̣ – ‘ахам̣ кхо имам̣ пуггалам̣ упанисса̄йа вихара̄ми. тасса ме имам̣ пуггалам̣ упанисса̄йа вихарато анупат̣т̣хита̄ чева сати упат̣т̣ха̄ти, асама̄хитан̃ча читтам̣ сама̄дхийати, апариккхӣн̣а̄ ча а̄сава̄ париккхайам̣ гаччханти, анануппаттан̃ча ануттарам̣ йогаккхемам̣ анупа̄пун̣а̄ми. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те касирена самуда̄гаччханти. на кхо пана̄хам̣ чӣварахету ага̄расма̄ анага̄рийам̣ паббаджито, на пин̣д̣апа̄тахету…пе… на сена̄санахету…пе… на гила̄наппаччайабхесаджджапариккха̄рахету ага̄расма̄ анага̄рийам̣ паббаджито. атха ча пана ме имам̣ пуггалам̣ упанисса̄йа вихарато анупат̣т̣хита̄ чева сати упат̣т̣ха̄ти, асама̄хитан̃ча читтам̣ сама̄дхийати, апариккхӣн̣а̄ ча а̄сава̄ париккхайам̣ гаччханти, анануппаттан̃ча ануттарам̣ йогаккхемам̣ анупа̄пун̣а̄мӣ’ти. тена, бхиккхаве, бхиккхуна̄ сан̇кха̄пи со пуггало анубандхитаббо, на паккамитаббам̣.

198. ‘‘идха пана, бхиккхаве, бхиккху ан̃н̃атарам̣ пуггалам̣ упанисса̄йа вихарати. тасса там̣ пуггалам̣ упанисса̄йа вихарато анупат̣т̣хита̄ чева сати упат̣т̣ха̄ти, асама̄хитан̃ча читтам̣ сама̄дхийати, апариккхӣн̣а̄ ча а̄сава̄ париккхайам̣ гаччханти, анануппаттан̃ча ануттарам̣ йогаккхемам̣ анупа̄пун̣а̄ти. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те аппакасирена самуда̄гаччханти. тена, бхиккхаве, бхиккхуна̄ ити пат̣исан̃чиккхитаббам̣ – ‘ахам̣ кхо имам̣ пуггалам̣ упанисса̄йа вихара̄ми. тасса ме имам̣ пуггалам̣ упанисса̄йа вихарато анупат̣т̣хита̄ чева сати упат̣т̣ха̄ти, асама̄хитан̃ча читтам̣ сама̄дхийати, апариккхӣн̣а̄ ча а̄сава̄ париккхайам̣ гаччханти, анануппаттан̃ча ануттарам̣ йогаккхемам̣ анупа̄пун̣а̄ми. йе ча кхо име паббаджитена джӣвитапариккха̄ра̄ самуда̄нетабба̄ – чӣварапин̣д̣апа̄тасена̄санагила̄наппаччайабхесаджджапариккха̄ра̄ – те аппакасирена самуда̄гаччхантӣ’ти. тена, бхиккхаве, бхиккхуна̄ йа̄ваджӣвампи со пуггало анубандхитаббо, на паккамитаббам̣, апи пануджджама̄ненапӣ’’ти [апи пан̣уджджама̄нена̄ти (?)].

идамавоча бхагава̄. аттамана̄ те бхиккхӯ бхагавато бха̄ситам̣ абхинандунти.

ванапаттхасуттам̣ нит̣т̣хитам̣ саттамам̣.