8. саллекхасуттам̣

81. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. атха кхо а̄йасма̄ маха̄чундо са̄йанхасамайам̣ пат̣исалла̄на̄ вут̣т̣хито йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ маха̄чундо бхагавантам̣ етадавоча – ‘‘йа̄ има̄, бханте, анекавихита̄ дит̣т̣хийо локе уппаджджанти – аттава̄дапат̣исам̣йутта̄ ва̄ локава̄дапат̣исам̣йутта̄ ва̄ – а̄димева ну кхо, бханте, бхиккхуно манасикарото евамета̄сам̣ дит̣т̣хӣнам̣ паха̄нам̣ хоти, евамета̄сам̣ дит̣т̣хӣнам̣ пат̣иниссагго хотӣ’’ти?

82. ‘‘йа̄ има̄, чунда, анекавихита̄ дит̣т̣хийо локе уппаджджанти – аттава̄дапат̣исам̣йутта̄ ва̄ локава̄дапат̣исам̣йутта̄ ва̄ – йаттха чета̄ дит̣т̣хийо уппаджджанти йаттха ча анусенти йаттха ча самуда̄чаранти там̣ ‘нетам̣ мама, несохамасми, на ме со атта̄’ти – еваметам̣ йатха̄бхӯтам̣ саммаппан̃н̃а̄ пассато евамета̄сам̣ дит̣т̣хӣнам̣ паха̄нам̣ хоти, евамета̄сам̣ дит̣т̣хӣнам̣ пат̣иниссагго хоти.

‘‘т̣ха̄нам̣ кхо панетам̣, чунда, виджджати йам̣ идхекаччо бхиккху вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа вихареййа. тасса евамасса – ‘саллекхена вихара̄мӣ’ти. на кхо панете, чунда, арийасса винайе саллекха̄ вуччанти. дит̣т̣хадхаммасукхавиха̄ра̄ ете арийасса винайе вуччанти.

‘‘т̣ха̄нам̣ кхо панетам̣, чунда, виджджати йам̣ идхекаччо бхиккху витаккавича̄ра̄нам̣ вӯпасама̄ аджджхаттам̣ сампаса̄данам̣ четасо екодибха̄вам̣ авитаккам̣ авича̄рам̣ сама̄дхиджам̣ пӣтисукхам̣ дутийам̣ джха̄нам̣ упасампаджджа вихареййа. тасса евамасса – ‘саллекхена вихара̄мӣ’ти. на кхо панете, чунда, арийасса винайе саллекха̄ вуччанти. дит̣т̣хадхаммасукхавиха̄ра̄ ете арийасса винайе вуччанти.

‘‘т̣ха̄нам̣ кхо панетам̣, чунда, виджджати йам̣ идхекаччо бхиккху пӣтийа̄ ча вира̄га̄ упеккхако ча вихареййа, сато ча сампаджа̄но сукхан̃ча ка̄йена пат̣исам̣ведеййа, йам̣ там̣ арийа̄ а̄чиккханти – ‘упеккхако сатима̄ сукхавиха̄рӣ’ти татийам̣ джха̄нам̣ упасампаджджа вихареййа. тасса евамасса – ‘саллекхена вихара̄мӣ’ти. на кхо панете, чунда, арийасса винайе саллекха̄ вуччанти. дит̣т̣хадхаммасукхавиха̄ра̄ ете арийасса винайе вуччанти.

‘‘т̣ха̄нам̣ кхо панетам̣, чунда, виджджати йам̣ идхекаччо бхиккху сукхасса ча паха̄на̄ дуккхасса ча паха̄на̄ пуббева соманассадоманасса̄нам̣ аттхан̇гама̄ адуккхамасум̣ упеккха̄сатипа̄рисуддхим̣ чатуттхам̣ джха̄нам̣ упасампаджджа вихареййа. тасса евамасса – ‘саллекхена вихара̄мӣ’ти. на кхо панете, чунда, арийасса винайе саллекха̄ вуччанти. дит̣т̣хадхаммасукхавиха̄ра̄ ете арийасса винайе вуччанти.

‘‘т̣ха̄нам̣ кхо панетам̣, чунда, виджджати йам̣ идхекаччо бхиккху саббасо рӯпасан̃н̃а̄нам̣ саматиккама̄, пат̣игхасан̃н̃а̄нам̣ аттхан̇гама̄, на̄наттасан̃н̃а̄нам̣ аманасика̄ра̄, ‘ананто а̄ка̄со’ти а̄ка̄са̄нан̃ча̄йатанам̣ упасампаджджа вихареййа. тасса евамасса – ‘саллекхена вихара̄мӣ’ти. на кхо панете, чунда, арийасса винайе саллекха̄ вуччанти. санта̄ ете виха̄ра̄ арийасса винайе вуччанти.

‘‘т̣ха̄нам̣ кхо панетам̣, чунда, виджджати йам̣ идхекаччо бхиккху саббасо а̄ка̄са̄нан̃ча̄йатанам̣ саматиккамма ‘анантам̣ вин̃н̃а̄н̣а’нти вин̃н̃а̄н̣ан̃ча̄йатанам̣ упасампаджджа вихареййа. тасса евамасса – ‘саллекхена вихара̄мӣ’ти. на кхо панете, чунда, арийасса винайе саллекха̄ вуччанти. санта̄ ете виха̄ра̄ арийасса винайе вуччанти.

‘‘т̣ха̄нам̣ кхо панетам̣, чунда, виджджати йам̣ идхекаччо бхиккху саббасо вин̃н̃а̄н̣ан̃ча̄йатанам̣ саматиккамма ‘наттхи кин̃чӣ’ти а̄кин̃чан̃н̃а̄йатанам̣ упасампаджджа вихареййа. тасса евамасса – ‘саллекхена вихара̄мӣ’ти. на кхо панете, чунда, арийасса винайе саллекха̄ вуччанти. санта̄ ете виха̄ра̄ арийасса винайе вуччанти.

‘‘т̣ха̄нам̣ кхо панетам̣, чунда, виджджати йам̣ идхекаччо бхиккху саббасо а̄кин̃чан̃н̃а̄йатанам̣ саматиккамма невасан̃н̃а̄на̄сан̃н̃а̄йатанам̣ упасампаджджа вихареййа. тасса евамасса – ‘саллекхена вихара̄мӣ’ти. на кхо панете, чунда, арийасса винайе саллекха̄ вуччанти. санта̄ ете виха̄ра̄ арийасса винайе вуччанти.

83. ‘‘идха кхо пана во, чунда, саллекхо каран̣ӣйо. ‘паре вихим̣сака̄ бхависсанти, майаметтха авихим̣сака̄ бхависса̄ма̄’ти саллекхо каран̣ӣйо. ‘паре па̄н̣а̄типа̄тӣ бхависсанти, майаметтха па̄н̣а̄типа̄та̄ пат̣ивирата̄ бхависса̄ма̄’ти саллекхо каран̣ӣйо. ‘паре адинна̄да̄йӣ бхависсанти, майаметтха адинна̄да̄на̄ пат̣ивирата̄ бхависса̄ма̄’ти саллекхо каран̣ӣйо. ‘паре абрахмача̄рӣ бхависсанти, майаметтха брахмача̄рӣ бхависса̄ма̄’ти саллекхо каран̣ӣйо. ‘паре муса̄ва̄дӣ бхависсанти, майаметтха муса̄ва̄да̄ пат̣ивирата̄ бхависса̄ма̄’ти саллекхо каран̣ӣйо. ‘паре писун̣ава̄ча̄ [писун̣а̄ ва̄ча̄ (сӣ. пӣ.)] бхависсанти, майаметтха писун̣а̄йа ва̄ча̄йа пат̣ивирата̄ бхависса̄ма̄’ти саллекхо каран̣ӣйо. ‘паре пхарусава̄ча̄ [пхаруса̄ ва̄ча̄ (сӣ. пӣ.)] бхависсанти, майаметтха пхаруса̄йа ва̄ча̄йа пат̣ивирата̄ бхависса̄ма̄’ти саллекхо каран̣ӣйо. ‘паре сампхаппала̄пӣ бхависсанти, майаметтха сампхаппала̄па̄ пат̣ивирата̄ бхависса̄ма̄’ти саллекхо каран̣ӣйо. ‘паре абхиджджха̄лӯ бхависсанти, майаметтха анабхиджджха̄лӯ бхависса̄ма̄’ти саллекхо каран̣ӣйо. ‘паре бйа̄панначитта̄ бхависсанти, майаметтха абйа̄панначитта̄ бхависса̄ма̄’ти саллекхо каран̣ӣйо. ‘паре миччха̄дит̣т̣хӣ бхависсанти, майаметтха самма̄дит̣т̣хӣ бхависса̄ма̄’ти саллекхо каран̣ӣйо. ‘паре миччха̄сан̇каппа̄ бхависсанти, майаметтха самма̄сан̇каппа̄ бхависса̄ма̄’ти саллекхо каран̣ӣйо. ‘паре миччха̄ва̄ча̄ бхависсанти, майаметтха самма̄ва̄ча̄ бхависса̄ма̄’ти саллекхо каран̣ӣйо. ‘паре миччха̄камманта̄ бхависсанти, майаметтха самма̄камманта̄ бхависса̄ма̄’ти саллекхо каран̣ӣйо. ‘паре миччха̄а̄джӣва̄ бхависсанти, майаметтха самма̄а̄джӣва̄ бхависса̄ма̄’ти саллекхо каран̣ӣйо. ‘паре миччха̄ва̄йа̄ма̄ бхависсанти, майаметтха самма̄ва̄йа̄ма̄ бхависса̄ма̄’ти саллекхо каран̣ӣйо. ‘паре миччха̄сатӣ бхависсанти, майаметтха самма̄сатӣ бхависса̄ма̄’ти саллекхо каран̣ӣйо. ‘паре миччха̄сама̄дхи бхависсанти, майаметтха самма̄сама̄дхӣ бхависса̄ма̄’ти саллекхо каран̣ӣйо. ‘паре миччха̄н̃а̄н̣ӣ бхависсанти, майаметтха самма̄н̃а̄н̣ӣ бхависса̄ма̄’ти саллекхо каран̣ӣйо. ‘паре миччха̄вимуттӣ бхависсанти, майаметтха самма̄вимуттӣ бхависса̄ма̄’ти саллекхо каран̣ӣйо.

‘‘‘паре тхӣнамиддхапарийут̣т̣хита̄ бхависсанти, майаметтха вигататхӣнамиддха̄ бхависса̄ма̄’ти саллекхо каран̣ӣйо. ‘паре уддхата̄ бхависсанти, майаметтха ануддхата̄ бхависса̄ма̄’ти саллекхо каран̣ӣйо. ‘паре вичикиччхӣ [вечикиччхӣ (сӣ. пӣ. ка.)] бхависсанти, майаметтха тин̣н̣авичикиччха̄ бхависса̄ма̄’ти саллекхо каран̣ӣйо. ‘паре кодхана̄ бхависсанти, майаметтха аккодхана̄ бхависса̄ма̄’ти саллекхо каран̣ӣйо. ‘паре упана̄хӣ бхависсанти, майаметтха анупана̄хӣ бхависса̄ма̄’ти саллекхо каран̣ӣйо. ‘паре маккхӣ бхависсанти, майаметтха амаккхӣ бхависса̄ма̄’ти саллекхо каран̣ӣйо. ‘паре пал̣а̄сӣ бхависсанти, майаметтха апал̣а̄сӣ бхависса̄ма̄’ти саллекхо каран̣ӣйо. ‘паре иссукӣ бхависсанти, майаметтха аниссукӣ бхависса̄ма̄’ти саллекхо каран̣ӣйо. ‘паре маччхарӣ бхависсанти, майаметтха амаччхарӣ бхависса̄ма̄’ти саллекхо каран̣ӣйо. ‘паре сат̣ха̄ бхависсанти, майаметтха асат̣ха̄ бхависса̄ма̄’ти саллекхо каран̣ӣйо. ‘паре ма̄йа̄вӣ бхависсанти, майаметтха ама̄йа̄вӣ бхависса̄ма̄’ти саллекхо каран̣ӣйо. ‘паре тхаддха̄ бхависсанти, майаметтха аттхаддха̄ бхависса̄ма̄’ти саллекхо каран̣ӣйо. ‘паре атима̄нӣ бхависсанти, майаметтха анатима̄нӣ бхависса̄ма̄’ти саллекхо каран̣ӣйо. ‘паре дуббача̄ бхависсанти, майаметтха сувача̄ бхависса̄ма̄’ти саллекхо каран̣ӣйо. ‘паре па̄памитта̄ бхависсанти, майаметтха калйа̄н̣амитта̄ бхависса̄ма̄’ти саллекхо каран̣ӣйо. ‘паре паматта̄ бхависсанти, майаметтха аппаматта̄ бхависса̄ма̄’ти саллекхо каран̣ӣйо. ‘паре ассаддха̄ бхависсанти, майаметтха саддха̄ бхависса̄ма̄’ти саллекхо каран̣ӣйо. ‘паре ахирика̄ бхависсанти, майаметтха хиримана̄ бхависса̄ма̄’ти саллекхо каран̣ӣйо. ‘паре анотта̄пӣ [аноттаппӣ (ка.)] бхависсанти, майаметтха отта̄пӣ бхависса̄ма̄’ти саллекхо каран̣ӣйо. ‘паре аппассута̄ бхависсанти, майаметтха бахуссута̄ бхависса̄ма̄’ти саллекхо каран̣ӣйо. ‘паре кусӣта̄ бхависсанти, майаметтха а̄раддхавӣрийа̄ бхависса̄ма̄’ти саллекхо каран̣ӣйо. ‘паре мут̣т̣хассатӣ бхависсанти, майаметтха упат̣т̣хитассатӣ бхависса̄ма̄’ти саллекхо каран̣ӣйо. ‘паре дуппан̃н̃а̄ бхависсанти, майаметтха пан̃н̃а̄сампанна̄ бхависса̄ма̄’ти саллекхо каран̣ӣйо. ‘паре сандит̣т̣хипара̄ма̄сӣ а̄дха̄нагга̄хӣ дуппат̣иниссаггӣ бхависсанти, майаметтха асандит̣т̣хипара̄ма̄сӣ ана̄дха̄нагга̄хӣ суппат̣иниссаггӣ бхависса̄ма̄’ти саллекхо каран̣ӣйо.

84. ‘‘читтуппа̄дампи кхо ахам̣, чунда, кусалесу дхаммесу бахука̄рам̣ [бахӯпака̄рам̣ (ка.)] вада̄ми, ко пана ва̄до ка̄йена ва̄ча̄йа анувидхӣйана̄су! тасма̄тиха, чунда, ‘паре вихим̣сака̄ бхависсанти, майаметтха авихим̣сака̄ бхависса̄ма̄’ти читтам̣ уппа̄детаббам̣. ‘паре па̄н̣а̄типа̄тӣ бхависсанти, майаметтха па̄н̣а̄типа̄та̄ пат̣ивирата̄ бхависса̄ма̄’ти читтам̣ уппа̄детаббам̣…‘паре сандит̣т̣хипара̄ма̄сӣ а̄дха̄нагга̄хӣ дуппат̣иниссаггӣ бхависсанти, майаметтха асандит̣т̣хипара̄ма̄сӣ ана̄дха̄нагга̄хӣ суппат̣иниссаггӣ бхависса̄ма̄’ти читтам̣ уппа̄детаббам̣.

85. ‘‘сеййатха̄пи, чунда, висамо магго асса, тасса [магго тасса̄сса (сӣ. сйа̄. пӣ.)] ан̃н̃о само магго париккамана̄йа; сеййатха̄ ва̄ пана, чунда, висамам̣ титтхам̣ асса, тасса ан̃н̃ам̣ самам̣ титтхам̣ париккамана̄йа; евамева кхо, чунда, вихим̣сакасса пурисапуггаласса авихим̣са̄ хоти париккамана̄йа, па̄н̣а̄типа̄тисса пурисапуггаласса па̄н̣а̄типа̄та̄ вераман̣ӣ хоти париккамана̄йа, адинна̄да̄йисса пурисапуггаласса адинна̄да̄на̄ вераман̣ӣ хоти париккамана̄йа, абрахмача̄рисса пурисапуггаласса абрахмачарийа̄ вераман̣ӣ хоти париккамана̄йа, муса̄ва̄дисса пурисапуггаласса муса̄ва̄да̄ вераман̣ӣ хоти париккамана̄йа, писун̣ава̄часса пурисапуггаласса писун̣а̄йа ва̄ча̄йа вераман̣ӣ хоти париккамана̄йа, пхарусава̄часса пурисапуггаласса пхаруса̄йа ва̄ча̄йа вераман̣ӣ хоти париккамана̄йа, сампхаппала̄писса пурисапуггаласса сампхаппала̄па̄ вераман̣ӣ хоти париккамана̄йа, абхиджджха̄лусса пурисапуггаласса анабхиджджха̄ хоти париккамана̄йа, бйа̄панначиттасса пурисапуггаласса абйа̄па̄до хоти париккамана̄йа, миччха̄дит̣т̣хисса пурисапуггаласса самма̄дит̣т̣хи хоти париккамана̄йа, миччха̄сан̇каппасса пурисапуггаласса самма̄сан̇каппо хоти париккамана̄йа, миччха̄ва̄часса пурисапуггаласса самма̄ва̄ча̄ хоти париккамана̄йа, миччха̄каммантасса пурисапуггаласса самма̄камманто хоти париккамана̄йа, миччха̄а̄джӣвасса пурисапуггаласса самма̄а̄джӣво хоти париккамана̄йа, миччха̄ва̄йа̄масса пурисапуггаласса самма̄ва̄йа̄мо хоти париккамана̄йа, миччха̄сатисса пурисапуггаласса самма̄сати хоти париккамана̄йа, миччха̄сама̄дхисса пурисапуггаласса самма̄сама̄дхи хоти париккамана̄йа, миччха̄н̃а̄н̣исса пурисапуггаласса самма̄н̃а̄н̣ам̣ хоти париккамана̄йа, миччха̄вимуттисса пурисапуггаласса самма̄вимутти хоти париккамана̄йа.

‘‘тхӣнамиддхапарийут̣т̣хитасса пурисапуггаласса вигататхинамиддхата̄ хоти париккамана̄йа, уддхатасса пурисапуггаласса ануддхаччам̣ хоти париккамана̄йа, вичикиччхисса пурисапуггаласса тин̣н̣авичикиччхата̄ хоти париккамана̄йа, кодханасса пурисапуггаласса аккодхо хоти париккамана̄йа, упана̄хисса пурисапуггаласса анупана̄хо хоти париккамана̄йа, маккхисса пурисапуггаласса амаккхо хоти париккамана̄йа, пал̣а̄сисса пурисапуггаласса апал̣а̄со хоти париккамана̄йа, иссукисса пурисапуггаласса аниссукита̄ хоти париккамана̄йа, маччхарисса пурисапуггаласса амаччхарийам̣ хоти париккамана̄йа, сат̣хасса пурисапуггаласса аса̄т̣хеййам̣ хоти париккамана̄йа, ма̄йа̄висса пурисапуггаласса ама̄йа̄ [ама̄йа̄вита̄ (ка.)] хоти париккамана̄йа, тхаддхасса пурисапуггаласса аттхаддхийам̣ хоти париккамана̄йа, атима̄нисса пурисапуггаласса анатима̄но хоти париккамана̄йа, дуббачасса пурисапуггаласса совачассата̄ хоти париккамана̄йа, па̄памиттасса пурисапуггаласса калйа̄н̣амиттата̄ хоти париккамана̄йа, паматтасса пурисапуггаласса аппама̄до хоти париккамана̄йа, ассаддхасса пурисапуггаласса саддха̄ хоти париккамана̄йа, ахирикасса пурисапуггаласса хирӣ хоти париккамана̄йа, анотта̄писса пурисапуггаласса оттаппам̣ хоти париккамана̄йа, аппассутасса пурисапуггаласса ба̄хусаччам̣ хоти париккамана̄йа, кусӣтасса пурисапуггаласса вӣрийа̄рамбхо хоти париккамана̄йа, мут̣т̣хассатисса пурисапуггаласса упат̣т̣хитассатита̄ хоти париккамана̄йа, дуппан̃н̃асса пурисапуггаласса пан̃н̃а̄сампада̄ хоти париккамана̄йа, сандит̣т̣хипара̄ма̄си-а̄дха̄нагга̄хи-дуппат̣иниссаггисса пурисапуггаласса асандит̣т̣хипара̄ма̄сиана̄дха̄нагга̄хи-суппат̣иниссаггита̄ хоти париккамана̄йа.

86. ‘‘сеййатха̄пи, чунда, йе кечи акусала̄ дхамма̄ саббе те адхобха̄ган̇гаманӣйа̄ [адхобха̄ван̇гаманӣйа̄ (сӣ. сйа̄. пӣ.)], йе кечи кусала̄ дхамма̄ саббе те упарибха̄ган̇гаманӣйа̄ [упарибха̄ван̇гаманӣйа̄ (сӣ. сйа̄. пӣ.)], евамева кхо, чунда, вихим̣сакасса пурисапуггаласса авихим̣са̄ хоти упарибха̄га̄йа [упарибха̄ва̄йа (сӣ. сйа̄. ка.)], па̄н̣а̄типа̄тисса пурисапуггаласса па̄н̣а̄типа̄та̄ вераман̣ӣ хоти упарибха̄га̄йа…пе… сандит̣т̣хипара̄ма̄си-а̄дха̄нагга̄хи-дуппат̣иниссаггисса пурисапуггаласса асандит̣т̣хипара̄ма̄си-ана̄дха̄нагга̄хи-суппат̣иниссаггита̄ хоти упарибха̄га̄йа.

87. ‘‘со вата, чунда, аттана̄ палипапалипанно парам̣ палипапалипаннам̣ уддхариссатӣти нетам̣ т̣ха̄нам̣ виджджати. со вата, чунда, аттана̄ апалипапалипанно парам̣ палипапалипаннам̣ уддхариссатӣти т̣ха̄наметам̣ виджджати. со вата, чунда, аттана̄ аданто авинӣто апариниббуто парам̣ дамессати винессати паринибба̄пессатӣти нетам̣ т̣ха̄нам̣ виджджати. со вата, чунда, аттана̄ данто винӣто париниббуто парам̣ дамессати винессати паринибба̄пессатӣти т̣ха̄наметам̣ виджджати. евамева кхо, чунда, вихим̣сакасса пурисапуггаласса авихим̣са̄ хоти паринибба̄на̄йа, па̄н̣а̄типа̄тисса пурисапуггаласса па̄н̣а̄типа̄та̄ вераман̣ӣ хоти паринибба̄на̄йа. адинна̄да̄йисса пурисапуггаласса адинна̄да̄на̄ вераман̣ӣ хоти паринибба̄на̄йа. абрахмача̄рисса пурисапуггаласса абрахмачарийа̄ вераман̣ӣ хоти паринибба̄на̄йа. муса̄ва̄дисса пурисапуггаласса муса̄ва̄да̄ вераман̣ӣ хоти паринибба̄на̄йа. писун̣ава̄часса пурисапуггаласса писун̣а̄йа ва̄ча̄йа вераман̣ӣ хоти паринибба̄на̄йа. пхарусава̄часса пурисапуггаласса пхаруса̄йа ва̄ча̄йа вераман̣ӣ хоти паринибба̄на̄йа. сампхаппала̄писса пурисапуггаласса сампхаппала̄па̄ вераман̣ӣ хоти паринибба̄на̄йа. абхиджджха̄лусса пурисапуггаласса анабхиджджха̄ хоти паринибба̄на̄йа. бйа̄панначиттасса пурисапуггаласса абйа̄па̄до хоти паринибба̄на̄йа. миччха̄дит̣т̣хисса пурисапуггаласса самма̄дит̣т̣хи хоти паринибба̄на̄йа. миччха̄сан̇каппасса пурисапуггаласса самма̄сан̇каппо хоти паринибба̄на̄йа. миччха̄ва̄часса пурисапуггаласса самма̄ва̄ча̄ хоти паринибба̄на̄йа. миччха̄каммантасса пурисапуггаласса самма̄камманто хоти паринибба̄на̄йа. миччха̄а̄джӣвасса пурисапуггаласса самма̄а̄джӣво хоти паринибба̄на̄йа. миччха̄ва̄йа̄масса пурисапуггаласса самма̄ва̄йа̄мо хоти паринибба̄на̄йа. миччха̄сатисса пурисапуггаласса самма̄сати хоти паринибба̄на̄йа. миччха̄сама̄дхисса пурисапуггаласса самма̄сама̄дхи хоти паринибба̄на̄йа. миччха̄н̃а̄н̣исса пурисапуггаласса самма̄н̃а̄н̣ам̣ хоти паринибба̄на̄йа. миччха̄вимуттисса пурисапуггаласса самма̄вимутти хоти паринибба̄на̄йа.

‘‘тхӣнамиддхапарийут̣т̣хитасса пурисапуггаласса вигататхинамиддхата̄ хоти паринибба̄на̄йа. уддхатасса пурисапуггаласса ануддхаччам̣ хоти паринибба̄на̄йа. вичикиччхисса пурисапуггаласса тин̣н̣авичикиччхата̄ хоти паринибба̄на̄йа. кодханасса пурисапуггаласса аккодхо хоти паринибба̄на̄йа. упана̄хисса пурисапуггаласса анупана̄хо хоти паринибба̄на̄йа. маккхисса пурисапуггаласса амаккхо хоти паринибба̄на̄йа. пал̣а̄сисса пурисапуггаласса апал̣а̄со хоти паринибба̄на̄йа. иссукисса пурисапуггаласса аниссукита̄ хоти паринибба̄на̄йа. маччхарисса пурисапуггаласса амаччхарийам̣ хоти паринибба̄на̄йа. сат̣хасса пурисапуггаласса аса̄т̣хеййам̣ хоти паринибба̄на̄йа. ма̄йа̄висса пурисапуггаласса ама̄йа̄ хоти паринибба̄на̄йа. тхаддхасса пурисапуггаласса аттхаддхийам̣ хоти паринибба̄на̄йа. атима̄нисса пурисапуггаласса анатима̄но хоти паринибба̄на̄йа. дуббачасса пурисапуггаласса совачассата̄ хоти паринибба̄на̄йа. па̄памиттасса пурисапуггаласса калйа̄н̣амиттата̄ хоти паринибба̄на̄йа. паматтасса пурисапуггаласса аппама̄до хоти паринибба̄на̄йа. ассаддхасса пурисапуггаласса саддха̄ хоти паринибба̄на̄йа. ахирикасса пурисапуггаласса хирӣ хоти паринибба̄на̄йа. анотта̄писса пурисапуггаласса оттаппам̣ хоти паринибба̄на̄йа. аппассутасса пурисапуггаласса ба̄хусаччам̣ хоти паринибба̄на̄йа. кусӣтасса пурисапуггаласса вӣрийа̄рамбхо хоти паринибба̄на̄йа. мут̣т̣хассатисса пурисапуггаласса упат̣т̣хитассатита̄ хоти паринибба̄на̄йа. дуппан̃н̃асса пурисапуггаласса пан̃н̃а̄сампада̄ хоти паринибба̄на̄йа. сандит̣т̣хипара̄ма̄си-а̄дха̄нагга̄хи-дуппат̣иниссаггисса пурисапуггаласса асандит̣т̣хипара̄ма̄си-ана̄дха̄нагга̄хи-суппат̣иниссаггита̄ хоти паринибба̄на̄йа.

88. ‘‘ити кхо, чунда, десито майа̄ саллекхапарийа̄йо, десито читтуппа̄дапарийа̄йо, десито париккаманапарийа̄йо, десито упарибха̄гапарийа̄йо, десито паринибба̄напарийа̄йо. йам̣ кхо, чунда, саттха̄ра̄ каран̣ӣйам̣ са̄вака̄нам̣ хитесина̄ анукампакена анукампам̣ упа̄да̄йа, катам̣ во там̣ майа̄. ‘ета̄ни, чунда, руккхамӯла̄ни, ета̄ни сун̃н̃а̄га̄ра̄ни, джха̄йатха, чунда, ма̄ пама̄даттха, ма̄ паччха̄виппат̣иса̄рино ахуваттха’ – айам̣ кхо амха̄кам̣ ануса̄санӣ’’ти.

идамавоча бхагава̄. аттамано а̄йасма̄ маха̄чундо бхагавато бха̄ситам̣ абхинандӣти.

чатутта̄лӣсапада̄ вутта̄, сандхайо пан̃ча десита̄;

саллекхо на̄ма суттанто, гамбхӣро са̄гарӯпамоти.

саллекхасуттам̣ нит̣т̣хитам̣ ат̣т̣хамам̣.