5. бхаддиттхивима̄наваттху

206. ‘‘нӣла̄ пӣта̄ ча ка̄л̣а̄ ча, ман̃джит̣т̣ха̄ [ман̃джет̣т̣ха̄ (сӣ.), ман̃джат̣т̣ха̄ (пӣ.)] атха лохита̄;

учча̄вача̄нам̣ ван̣н̣а̄нам̣, кин̃джаккхапарива̄рита̄.

207. ‘‘манда̄рава̄нам̣ пуппха̄нам̣, ма̄лам̣ дха̄реси муддхани;

найиме ан̃н̃есу ка̄йесу, руккха̄ санти сумедхасе.

208. ‘‘кена ка̄йам̣ упапанна̄, та̄ватим̣сам̣ йасассинӣ;

девате пуччхита̄чиккха, кисса каммассидам̣ пхала’’нти.

209. ‘‘бхаддиттхика̄ти [бхаддиттхӣти (сӣ.)] мам̣ ан̃н̃ам̣су, кимила̄йам̣ упа̄сика̄;

саддха̄ сӣлена сампанна̄, сам̣вибха̄гарата̄ сада̄.

210. ‘‘аччха̄данан̃ча бхаттан̃ча, сена̄санам̣ падӣпийам̣;

ада̄сим̣ уджубхӯтесу, виппасаннена четаса̄.

211. ‘‘ча̄туддасим̣ пан̃чадасим̣, йа̄ ча паккхасса ат̣т̣хамӣ;

па̄т̣иха̄рийапаккхан̃ча, ат̣т̣хан̇гасусама̄гатам̣.

212. ‘‘упосатхам̣ упавасиссам̣, сада̄ сӣлесу сам̣вута̄;

сан̃н̃ама̄ сам̣вибха̄га̄ ча, вима̄нам̣ а̄васа̄махам̣.

213. ‘‘па̄н̣а̄типа̄та̄ вирата̄, муса̄ва̄да̄ ча сан̃н̃ата̄;

тхеййа̄ ча атича̄ра̄ ча, маджджапа̄на̄ ча а̄рака̄.

214. ‘‘пан̃часиккха̄паде рата̄, арийасачча̄на ковида̄;

упа̄сика̄ чаккхумато, аппама̄давиха̄ринӣ.

ката̄ва̄са̄ катакусала̄ тато чута̄ [ката̄вака̄са̄ катакусала̄ (ка.)],

сайам̣ пабха̄ анувичара̄ми нанданам̣.

215. ‘‘бхиккхӯ ча̄хам̣ парамахита̄нукампаке, абходжайим̣ тапассийугам̣ маха̄муним̣;

ката̄ва̄са̄ катакусала̄ тато чута̄ [ката̄вака̄са̄ катакусала̄ (ка.)], сайам̣ пабха̄ анувичара̄ми нанданам̣.

216. ‘‘ат̣т̣хан̇гикам̣ апаримитам̣ сукха̄вахам̣, упосатхам̣ сататамупа̄васим̣ ахам̣;

ката̄ва̄са̄ катакусала̄ тато чута̄ [ката̄вака̄са̄ катакусала̄ (ка.)], сайам̣ пабха̄ анувичара̄ми нандана’’нти.

бхаддиттхивима̄нам̣ [бхаддиттхика̄вима̄нам̣ (сйа̄.)] пан̃чамам̣.