6. сон̣адинна̄вима̄наваттху

217. ‘‘абхиккантена ван̣н̣ена, йа̄ твам̣ тит̣т̣хаси девате;

обха̄сентӣ диса̄ сабба̄, осадхӣ вийа та̄рака̄.

218. ‘‘кена тета̄дисо ван̣н̣о, кена те идха миджджхати;

уппаджджанти ча те бхога̄, йе кечи манасо пийа̄.

219. ‘‘пуччха̄ми там̣ деви маха̄нубха̄ве, мануссабхӯта̄ кимака̄си пун̃н̃ам̣;

кена̄си евам̣ джалита̄нубха̄ва̄, ван̣н̣о ча те саббадиса̄ пабха̄сатӣ’’ти.

220. са̄ девата̄ аттамана̄, моггалла̄нена пуччхита̄;

пан̃хам̣ пут̣т̣ха̄ вийа̄ка̄си, йасса каммассидам̣ пхалам̣.

221. ‘‘сон̣адинна̄ти мам̣ ан̃н̃ам̣су, на̄л̣анда̄йам̣ упа̄сика̄;

саддха̄ сӣлена сампанна̄, сам̣вибха̄гарата̄ сада̄.

222. ‘‘аччха̄данан̃ча бхаттан̃ча, сена̄санам̣ падӣпийам̣;

ада̄сим̣ уджубхӯтесу, виппасаннена четаса̄.

223. ‘‘ча̄туддасим̣ пан̃чадасим̣, йа̄ ча паккхасса ат̣т̣хамӣ;

па̄т̣иха̄рийапаккхан̃ча, ат̣т̣хан̇гасусама̄гатам̣.

224. ‘‘упосатхам̣ упавасиссам̣, сада̄ сӣлесу сам̣вута̄;

сан̃н̃ама̄ сам̣вибха̄га̄ ча, вима̄нам̣ а̄васа̄махам̣.

225. ‘‘па̄н̣а̄типа̄та̄ вирата̄, муса̄ва̄да̄ ча сан̃н̃ата̄;

тхеййа̄ ча атича̄ра̄ ча, маджджапа̄на̄ ча а̄рака̄.

226. ‘‘пан̃часиккха̄паде рата̄, арийасачча̄на ковида̄;

упа̄сика̄ чаккхумато, готамасса йасассино.

227. ‘‘тена мета̄дисо ван̣н̣о…пе…

ван̣н̣о ча ме саббадиса̄ пабха̄сатӣ’’ти.

сон̣адинна̄вима̄нам̣ чхат̣т̣хам̣.