4. чан̣д̣а̄ливима̄наваттху

195. ‘‘чан̣д̣а̄ли ванда па̄да̄ни, готамасса йасассино;

тамева [тавева (сӣ.)] анукампа̄йа, ат̣т̣ха̄си исисаттамо [исисуттамо (сӣ.)].

196. ‘‘абхиппаса̄дехи манам̣, арахантамхи та̄дини [та̄дине (сйа̄. ка.)];

кхиппам̣ пан̃джалика̄ ванда, париттам̣ тава джӣвита’’нти.

197. чодита̄ бха̄витаттена, сарӣрантимадха̄рина̄;

чан̣д̣а̄лӣ ванди па̄да̄ни, готамасса йасассино.

198. таменам̣ авадхӣ га̄вӣ, чан̣д̣а̄лим̣ пан̃джалим̣ т̣хитам̣;

намассама̄нам̣ самбуддхам̣, андхака̄ре пабхан̇каранти.

199. ‘‘кхӣн̣а̄савам̣ вигатараджам̣ анеджам̣, екам̣ аран̃н̃амхи рахо нисиннам̣;

девиддхипатта̄ упасан̇камитва̄, ванда̄ми там̣ вӣра маха̄нубха̄ва’’нти.

200. ‘‘суван̣н̣аван̣н̣а̄ джалита̄ маха̄йаса̄, вима̄наморуйха анекачитта̄;

парива̄рита̄ аччхара̄сан̇ган̣ена [аччхара̄нам̣ ган̣ена (сӣ.)], ка̄ твам̣ субхе девате вандасе мама’’нти.

201. ‘‘ахам̣ бхадданте чан̣д̣а̄лӣ, тайа̄ вӣрена [тхерена (ка.)] песита̄;

вандим̣ арахато па̄де, готамасса йасассино.

202. ‘‘са̄хам̣ вандитва̄ [вандитва (сӣ.)] па̄да̄ни, чута̄ чан̣д̣а̄лайонийа̄;

вима̄нам̣ саббато бхаддам̣, упапаннамхи нандане.

203. ‘‘аччхара̄нам̣ сатасахассам̣, пураккхатва̄на [пураккхитва̄ мам̣ (сйа̄. ка.)] тит̣т̣хати;

та̄са̄хам̣ павара̄ сет̣т̣ха̄, ван̣н̣ена йасаса̄йуна̄.

204. ‘‘пахӯтакатакалйа̄н̣а̄, сампаджа̄на̄ пат̣иссата̄ [патиссата̄ (сӣ. сйа̄.)];

муним̣ ка̄рун̣икам̣ локе, там̣ бханте вандитума̄гата̄’’ти.

205. идам̣ ватва̄на чан̣д̣а̄лӣ, катан̃н̃ӯ катавединӣ;

вандитва̄ арахато па̄де, таттхевантарадха̄йатха̄ти [таттхевантарадха̄йатӣти (сйа̄. ка.)].

чан̣д̣а̄ливима̄нам̣ чатуттхам̣.