1. пат̣хаманибба̄напат̣исам̣йуттасуттам̣

71. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена бхагава̄ бхиккхӯ нибба̄напат̣исам̣йутта̄йа дхаммийа̄ катха̄йа сандассети сама̄дапети самуттеджети сампахам̣сети. тедха бхиккхӯ [те ча бхиккхӯ (сӣ. сйа̄. пӣ. тадат̣т̣хакатха̄пи олокетабба̄] ат̣т̣хим̣ катва̄ [ат̣т̣хӣкатва̄ (сӣ. сйа̄.), ат̣т̣хикатва̄ (пӣ.)] манаси катва̄ саббам̣ четасо [саббам̣ четаса̄ (итипи ан̃н̃асуттесу)] саманна̄харитва̄ охитасота̄ дхаммам̣ сун̣анти.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘аттхи, бхиккхаве, тада̄йатанам̣, йаттха нева патхавӣ, на а̄по, на теджо, на ва̄йо, на а̄ка̄са̄нан̃ча̄йатанам̣, на вин̃н̃а̄н̣ан̃ча̄йатанам̣, на а̄кин̃чан̃н̃а̄йатанам̣, на невасан̃н̃а̄на̄сан̃н̃а̄йатанам̣, на̄йам̣ локо, на паралоко, на убхо чандимасӯрийа̄. татра̄па̄хам̣, бхиккхаве, нева а̄гатим̣ вада̄ми, на гатим̣, на т̣хитим̣, на чутим̣, на упапаттим̣; аппатит̣т̣хам̣, аппаваттам̣, ана̄рамман̣амеветам̣. есеванто дуккхасса̄’’ти. пат̣хамам̣.