6. тан̣ха̄сан̇кхайасуттам̣

66. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена а̄йасма̄ ан̃н̃а̄сикон̣д̣ан̃н̃о [ан̃н̃а̄такон̣д̣ан̃н̃о (саббаттха)] бхагавато авидӯре нисинно хоти паллан̇кам̣ а̄бхуджитва̄ уджум̣ ка̄йам̣ пан̣идха̄йа тан̣ха̄сан̇кхайавимуттим̣ паччавеккхама̄но.

аддаса̄ кхо бхагава̄ а̄йасмантам̣ ан̃н̃а̄сикон̣д̣ан̃н̃ам̣ авидӯре нисиннам̣ паллан̇кам̣ а̄бхуджитва̄ уджум̣ ка̄йам̣ пан̣идха̄йа тан̣ха̄сан̇кхайавимуттим̣ паччавеккхама̄нам̣.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘йасса мӯлам̣ чхама̄ наттхи, пан̣н̣а̄ наттхи куто лата̄;

там̣ дхӣрам̣ бандхана̄ муттам̣, ко там̣ ниндитумарахати;

дева̄пи нам̣ пасам̣санти, брахмуна̄пи пасам̣сито’’ти. чхат̣т̣хам̣;