9. упасенасуттам̣

39. евам̣ ме сутам̣ – екам̣ самайам̣ бхагава̄ ра̄джагахе вихарати вел̣уване каландаканива̄пе. атха кхо а̄йасмато упасенасса ван̇гантапуттасса рахогатасса пат̣исаллӣнасса евам̣ четасо паривитакко удапа̄ди – ‘‘ла̄бха̄ вата ме, суладдхам̣ вата ме, саттха̄ ча ме бхагава̄ арахам̣ самма̄самбуддхо; сва̄ккха̄те чамхи дхаммавинайе ага̄расма̄ анага̄рийам̣ паббаджито; сабрахмача̄рино ча ме сӣлаванто калйа̄н̣адхамма̄; сӣлесу чамхи парипӯрака̄рӣ; сусама̄хито чамхи екаггачитто; араха̄ чамхи кхӣн̣а̄саво; махиддхико чамхи маха̄нубха̄во. бхаддакам̣ ме джӣвитам̣, бхаддакам̣ маран̣а’’нти.

атха кхо бхагава̄ а̄йасмато упасенасса ван̇гантапуттасса четаса̄ четопаривитаккаман̃н̃а̄йа та̄йам̣ вела̄йам̣ имам̣ уда̄нам̣ уда̄неси –

‘‘йам̣ джӣвитам̣ на тапати, маран̣анте на сочати;

са ве дит̣т̣хападо дхӣро, сокамаджджхе на сочати.

‘‘уччхиннабхаватан̣хасса, сантачиттасса бхиккхуно;

виккхӣн̣о джа̄тисам̣са̄ро, наттхи тасса пунаббхаво’’ти. навамам̣;