6. пилиндаваччхасуттам̣

26. евам̣ ме сутам̣ – екам̣ самайам̣ бхагава̄ ра̄джагахе вихарати вел̣уване каландаканива̄пе. тена кхо пана самайена а̄йасма̄ пилиндаваччхо [пилиндиваччхо (сӣ.)] бхиккхӯ васалава̄дена самуда̄чарати. атха кхо самбахула̄ бхиккхӯ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ – ‘‘а̄йасма̄, бханте, пилиндаваччхо бхиккхӯ васалава̄дена самуда̄чаратӣ’’ти.

атха кхо бхагава̄ ан̃н̃атарам̣ бхиккхум̣ а̄мантеси – ‘‘ехи твам̣, бхиккху, мама вачанена пилиндаваччхам̣ бхиккхум̣ а̄мантехи – ‘саттха̄ там̣, а̄вусо пилиндаваччха [ваччха (сйа̄.)], а̄мантетӣ’’’ти. ‘‘евам̣, бханте’’ти кхо со бхиккху бхагавато пат̣иссутва̄ йена̄йасма̄ пилиндаваччхо тенупасан̇ками; упасан̇камитва̄ а̄йасмантам̣ пилиндаваччхам̣ етадавоча – ‘‘саттха̄ там̣, а̄вусо пилиндаваччха, а̄мантетӣ’’ти.

‘‘евама̄вусо’’ти кхо а̄йасма̄ пилиндаваччхо тасса бхиккхуно пат̣иссутва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо а̄йасмантам̣ пилиндаваччхам̣ бхагава̄ етадавоча – ‘‘саччам̣ кира твам̣, ваччха, бхиккхӯ васалава̄дена самуда̄чарасӣ’’ти? ‘‘евам̣, бханте’’ти.

атха кхо бхагава̄ а̄йасмато пилиндаваччхасса пуббенива̄сам̣ манаси каритва̄ бхиккхӯ а̄мантеси – ‘‘ма̄ кхо тумхе, бхиккхаве, ваччхасса бхиккхуно уджджха̄йиттха. на, бхиккхаве, ваччхо досантаро бхиккхӯ васалава̄дена самуда̄чарати. ваччхасса, бхиккхаве, бхиккхуно пан̃ча джа̄тисата̄ни аббокин̣н̣а̄ни бра̄хман̣акуле пачча̄джа̄та̄ни. со тасса васалава̄до дӣгхараттам̣ самуда̄чин̣н̣о [аджджха̄чин̣н̣о (сйа̄. пӣ. ка. ат̣т̣хакатха̄йам̣ па̄т̣хантарам̣)]. тена̄йам̣ ваччхо бхиккхӯ васалава̄дена самуда̄чаратӣ’’ти.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘йамхӣ на ма̄йа̄ васатӣ на ма̄но,

йо вӣталобхо амамо нира̄со;

панун̣н̣акодхо [пан̣уннакодхо (пӣ.)] абхиниббутатто,

со бра̄хман̣о со саман̣о са бхиккхӯ’’ти. чхат̣т̣хам̣;