1. каммавипа̄каджасуттам̣

21. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена ан̃н̃атаро бхиккху бхагавато авидӯре нисинно хоти паллан̇кам̣ а̄бхуджитва̄ уджум̣ ка̄йам̣ пан̣идха̄йа пура̄н̣акаммавипа̄каджам̣ дуккхам̣ тиббам̣ кхарам̣ кат̣укам̣ веданам̣ адхива̄сенто сато сампаджа̄но авихан̃н̃ама̄но.

аддаса̄ кхо бхагава̄ там̣ бхиккхум̣ авидӯре нисиннам̣ паллан̇кам̣ а̄бхуджитва̄ уджум̣ ка̄йам̣ пан̣идха̄йа пура̄н̣акаммавипа̄каджам̣ дуккхам̣ тиббам̣ кхарам̣ кат̣укам̣ веданам̣ адхива̄сентам̣ сатам̣ сампаджа̄нам̣ авихан̃н̃ама̄нам̣.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘саббакаммаджахасса бхиккхуно,

дхунама̄насса пуре катам̣ раджам̣;

амамасса т̣хитасса та̄дино,

аттхо наттхи джанам̣ лапетаве’’ти. пат̣хамам̣;