1. мучалиндасуттам̣

11. евам̣ ме сутам̣ – екам̣ самайам̣ бхагава̄ урувела̄йам̣ вихарати наджджа̄ неран̃джара̄йа тӣре мучалиндамӯле пат̣хама̄бхисамбуддхо. тена кхо пана самайена бхагава̄ сатта̄хам̣ екапаллан̇кена нисинно хоти вимуттисукхапат̣исам̣ведӣ.

тена кхо пана самайена маха̄ ака̄ламегхо удапа̄ди сатта̄хаваддалика̄ сӣтава̄тадуддинӣ. атха кхо мучалиндо на̄гара̄джа̄ сакабхавана̄ никкхамитва̄ бхагавато ка̄йам̣ саттаккхаттум̣ бхогехи париккхипитва̄ упаримуддхани махантам̣ пхан̣ам̣ вихачча ат̣т̣ха̄си – ‘‘ма̄ бхагавантам̣ сӣтам̣, ма̄ бхагавантам̣ ун̣хам̣, ма̄ бхагавантам̣ д̣ам̣самакасава̄та̄тапасарӣсапа [сирим̣сапа (сӣ. сйа̄. кам̣. пӣ.)] сампхассо’’ти.

атха кхо бхагава̄ тасса сатта̄хасса аччайена тамха̄ сама̄дхимха̄ вут̣т̣ха̄си. атха кхо мучалиндо на̄гара̄джа̄ виддхам̣ вигатавала̄хакам̣ девам̣ видитва̄ бхагавато ка̄йа̄ бхоге винивет̣хетва̄ сакаван̣н̣ам̣ пат̣исам̣харитва̄ ма̄н̣авакаван̣н̣ам̣ абхинимминитва̄ бхагавато пурато ат̣т̣ха̄си пан̃джалико бхагавантам̣ намассама̄но.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘сукхо вивеко тут̣т̣хасса, сутадхаммасса пассато;

абйа̄паджджам̣ сукхам̣ локе, па̄н̣абхӯтесу сам̣йамо.

‘‘сукха̄ вира̄гата̄ локе, ка̄ма̄нам̣ саматиккамо;

асмима̄насса йо винайо, етам̣ ве парамам̣ сукха’’нти. пат̣хамам̣;