6. маха̄кассапасуттам̣

6. евам̣ ме сутам̣ – екам̣ самайам̣ бхагава̄ ра̄джагахе вихарати вел̣уване каландаканива̄пе. тена кхо пана самайена а̄йасма̄ маха̄кассапо пиппалигуха̄йам̣ [пиппхалигуха̄йам̣ (сйа̄.), симбалигуха̄йам̣ (ка.)] вихарати а̄ба̄дхико [а̄ба̄дхико хоти (сйа̄. пӣ.)] дуккхито ба̄л̣хагила̄но. атха кхо а̄йасма̄ маха̄кассапо апарена самайена тамха̄ а̄ба̄дха̄ вут̣т̣ха̄си. атха кхо а̄йасмато маха̄кассапасса тамха̄ а̄ба̄дха̄ вут̣т̣хитасса етадахоси – ‘‘йам̣нӯна̄хам̣ ра̄джагахам̣ пин̣д̣а̄йа пависеййа’’нти.

тена кхо пана самайена пан̃чаматта̄ни девата̄сата̄ни уссуккам̣ а̄панна̄ни хонти а̄йасмато маха̄кассапасса пин̣д̣апа̄тапат̣ила̄бха̄йа. атха кхо а̄йасма̄ маха̄кассапо та̄ни пан̃чаматта̄ни девата̄сата̄ни пат̣иккхипитва̄ пуббан̣хасамайам̣ нива̄сетва̄ паттачӣварама̄да̄йа ра̄джагахам̣ пин̣д̣а̄йа па̄виси – йена далиддависикха̄ капан̣ависикха̄ песака̄рависикха̄. аддаса̄ кхо бхагава̄ а̄йасмантам̣ маха̄кассапам̣ ра̄джагахе пин̣д̣а̄йа чарантам̣ йена далиддависикха̄ капан̣ависикха̄ песака̄рависикха̄.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘анан̃н̃апосиман̃н̃а̄там̣, дантам̣ са̄ре патит̣т̣хитам̣;

кхӣн̣а̄савам̣ вантадосам̣, тамахам̣ брӯми бра̄хман̣а’’нти. чхат̣т̣хам̣;