5. парамат̣т̣хакасуттам̣

802. параманти дит̣т̣хӣсу париббаса̄но, йадуттари куруте джанту локе;

хӣна̄ти ан̃н̃е тато саббама̄ха, тасма̄ вива̄да̄ни авӣтиватто.

803. йадаттанӣ пассати а̄нисам̣сам̣, дит̣т̣хе суте сӣлавате [сӣлаббате (сйа̄.)] муте ва̄;

тадева со таттха самуггаха̄йа, нихӣнато пассати саббаман̃н̃ам̣.

804. там̣ ва̄пи гантхам̣ кусала̄ ваданти, йам̣ ниссито пассати хӣнаман̃н̃ам̣;

тасма̄ хи дит̣т̣хам̣ ва сутам̣ мутам̣ ва̄, сӣлаббатам̣ бхиккху на ниссайеййа.

805. дит̣т̣химпи локасмим̣ на каппайеййа, н̃а̄н̣ена ва̄ сӣлаватена ва̄пи;

самоти атта̄наманӯпанеййа, хӣно на ман̃н̃етха висеси ва̄пи.

806. аттам̣ паха̄йа анупа̄дийа̄но, н̃а̄н̣епи со ниссайам̣ но кароти;

са ве вийаттесу [вийуттесу (сӣ. ат̣т̣ха.), двийаттесу (ка.)] на ваггаса̄рӣ, дит̣т̣химпи [дит̣т̣химапи (ка.)] со на паччети кин̃чи.

807. йассӯбхайанте пан̣идхӣдха наттхи, бхава̄бхава̄йа идха ва̄ хурам̣ ва̄;

нивесана̄ тасса на санти кечи, дхаммесу ниччхеййа самуггахӣтам̣.

808. тассӣдха дит̣т̣хе ва суте муте ва̄, пакаппита̄ наттхи ан̣ӯпи сан̃н̃а̄;

там̣ бра̄хман̣ам̣ дит̣т̣химана̄дийа̄нам̣, кенӣдха локасмим̣ викаппайеййа.

809. на каппайанти на пуреккхаронти, дхамма̄пи тесам̣ на пат̣иччхита̄се;

на бра̄хман̣о сӣлаватена неййо, па̄ран̇гато на паччети та̄дӣти.

парамат̣т̣хакасуттам̣ пан̃чамам̣ нит̣т̣хитам̣.