4. суддхат̣т̣хакасуттам̣

794. пасса̄ми суддхам̣ парамам̣ арогам̣, дит̣т̣хена сам̣суддхи нарасса хоти;

ева̄бхиджа̄нам̣ [ета̄бхиджа̄нам̣ (сӣ. пӣ.)] параманти н̃атва̄, суддха̄нупассӣти паччети н̃а̄н̣ам̣.

795. дит̣т̣хена че суддхи нарасса хоти, н̃а̄н̣ена ва̄ со паджаха̄ти дуккхам̣;

ан̃н̃ена со суджджхати сопадхӣко, дит̣т̣хӣ хи нам̣ па̄ва татха̄ вада̄нам̣.

796. на бра̄хман̣о ан̃н̃ато суддхима̄ха, дит̣т̣хе суте сӣлавате муте ва̄;

пун̃н̃е ча па̄пе ча анӯпалитто, аттан̃джахо найидха пакуббама̄но.

797. пуримам̣ паха̄йа апарам̣ сита̄се, еджа̄нуга̄ те на таранти сан̇гам̣;

те уггаха̄йанти нирассаджанти, капӣва са̄кхам̣ памун̃чам̣ гаха̄йам̣ [памукхам̣ гаха̄йа (сйа̄.), памун̃ча гаха̄йа (ка.)].

798. сайам̣ сама̄да̄йа вата̄ни джанту, учча̄вачам̣ гаччхати сан̃н̃асатто;

видва̄ ча ведехи самечча дхаммам̣, на учча̄вачам̣ гаччхати бхӯрипан̃н̃о.

799. са саббадхаммесу висенибхӯто, йам̣ кин̃чи дит̣т̣хам̣ ва сутам̣ мутам̣ ва̄;

тамева дассим̣ виват̣ам̣ чарантам̣, кенӣдха локасми викаппайеййа.

800. на каппайанти на пуреккхаронти, аччантасуддхӣти на те ваданти;

а̄да̄нагантхам̣ гатхитам̣ висаджджа, а̄сам̣ на куббанти кухин̃чи локе.

801. сӣма̄тиго бра̄хман̣о тасса наттхи, н̃атва̄ ва дисва̄ ва [н̃атва̄ ча дисва̄ ча (ка. сӣ. ка.)] самуггахӣтам̣;

на ра̄гара̄гӣ на вира̄гаратто, тассӣдха наттхӣ парамуггахӣтанти.

суддхат̣т̣хакасуттам̣ чатуттхам̣ нит̣т̣хитам̣.