9. ва̄сет̣т̣хасуттам̣

евам̣ ме сутам̣ – екам̣ самайам̣ бхагава̄ иччха̄нан̇гале вихарати иччха̄нан̇галаванасан̣д̣е. тена кхо пана самайена самбахула̄ абхин̃н̃а̄та̄ абхин̃н̃а̄та̄ бра̄хман̣амаха̄са̄ла̄ иччха̄нан̇гале пат̣ивасанти, сеййатхидам̣ – чан̇кӣ бра̄хман̣о, та̄руккхо бра̄хман̣о, поккхараса̄ти бра̄хман̣о, джа̄н̣уссон̣и [джа̄н̣усон̣и (ка.)] бра̄хман̣о, тодеййо бра̄хман̣о, ан̃н̃е ча абхин̃н̃а̄та̄ абхин̃н̃а̄та̄ бра̄хман̣амаха̄са̄ла̄. атха кхо ва̄сет̣т̣хабха̄радва̄джа̄нам̣ ма̄н̣ава̄нам̣ джан̇гха̄виха̄рам̣ анучан̇каманта̄нам̣ анувичаранта̄нам̣ [анучан̇камама̄на̄нам̣ анувичарама̄на̄нам̣ (сӣ. пӣ.)] айамантара̄катха̄ удапа̄ди – ‘‘катхам̣, бхо, бра̄хман̣о хотӣ’’ти?

бха̄радва̄джо ма̄н̣аво евама̄ха – ‘‘йато кхо, бхо, убхато суджа̄то хоти ма̄тито ча питито ча сам̣суддхагахан̣ико йа̄ва саттама̄ пита̄махайуга̄ аккхитто анупаккут̣т̣хо джа̄тива̄дена, етта̄вата̄ кхо бхо бра̄хман̣о хотӣ’’ти.

ва̄сет̣т̣хо ма̄н̣аво евама̄ха – ‘‘йато кхо, бхо, сӣлава̄ ча хоти ватасампанно [ваттасампанно (сӣ. сйа̄. ма. ни. 2.454)] ча, етта̄вата̄ кхо, бхо, бра̄хман̣о хотӣ’’ти. нева кхо асаккхи бха̄радва̄джо ма̄н̣аво ва̄сет̣т̣хам̣ ма̄н̣авам̣ сан̃н̃а̄петум̣, на пана асаккхи ва̄сет̣т̣хо ма̄н̣аво бха̄радва̄джам̣ ма̄н̣авам̣ сан̃н̃а̄петум̣.

атха кхо ва̄сет̣т̣хо ма̄н̣аво бха̄радва̄джам̣ ма̄н̣авам̣ а̄мантеси – ‘‘айам̣ кхо, бхо [айам̣ бхо (сӣ. сйа̄. ка.), айам̣ кхо (пӣ.)] бха̄радва̄джа, саман̣о готамо сакйапутто сакйакула̄ паббаджито иччха̄нан̇гале вихарати иччха̄нан̇галаванасан̣д̣е; там̣ кхо пана бхавантам̣ готамам̣ евам̣ калйа̄н̣о киттисаддо аббхуггато – ‘итипи…пе… буддхо бхагава̄’ти. а̄йа̄ма, бхо бха̄радва̄джа, йена саман̣о готамо тенупасан̇камисса̄ма; упасан̇камитва̄ саман̣ам̣ готамам̣ етаматтхам̣ пуччхисса̄ма. йатха̄ но саман̣о готамо бйа̄кариссати татха̄ нам̣ дха̄ресса̄ма̄’’ти. ‘‘евам̣, бхо’’ти кхо бха̄радва̄джо ма̄н̣аво ва̄сет̣т̣хасса ма̄н̣авасса паччассоси.

атха кхо ва̄сет̣т̣хабха̄радва̄джа̄ ма̄н̣ава̄ йена бхагава̄ тенупасан̇камим̣су; упасан̇камитва̄ бхагавата̄ саддхим̣ саммодим̣су. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣдим̣су. екамантам̣ нисинно кхо ва̄сет̣т̣хо ма̄н̣аво бхагавантам̣ га̄тха̄хи аджджхабха̄си –

599. ‘‘анун̃н̃а̄тапат̣ин̃н̃а̄та̄, тевиджджа̄ майамасмубхо;

ахам̣ поккхараса̄тисса, та̄руккхасса̄йам̣ ма̄н̣аво.

600. ‘‘тевиджджа̄нам̣ йадаккха̄там̣, татра кевалиносмасе;

падакасма веййа̄каран̣а̄, джаппе а̄чарийаса̄диса̄.

601. ‘‘тесам̣ но джа̄тива̄дасмим̣, вива̄до аттхи готама;

джа̄тийа̄ бра̄хман̣о хоти, бха̄радва̄джо ити бха̄сати;

ахан̃ча каммуна̄ [каммана̄ (сӣ. пӣ.) евамупарипи] брӯми, евам̣ джа̄на̄хи чаккхума.

602. ‘‘те на саккома сан̃н̃а̄петум̣, ан̃н̃аман̃н̃ам̣ майам̣ убхо;

бхавантам̣ [бхагавантам̣ (ка.)] пут̣т̣хума̄гамха̄, самбуддхам̣ ити виссутам̣.

603. ‘‘чандам̣ йатха̄ кхайа̄тӣтам̣, печча пан̃джалика̄ джана̄;

вандама̄на̄ намассанти, евам̣ локасми готамам̣.

604. ‘‘чаккхум̣ локе самуппаннам̣, майам̣ пуччха̄ма готамам̣;

джа̄тийа̄ бра̄хман̣о хоти, уда̄ху бхавати каммуна̄;

аджа̄натам̣ но пабрӯхи, йатха̄ джа̄несу бра̄хман̣ам̣’’.

605. ‘‘тесам̣ во ахам̣ бйаккхиссам̣, (ва̄сет̣т̣ха̄ти бхагава̄) анупуббам̣ йатха̄татхам̣;

джа̄тивибхан̇гам̣ па̄н̣а̄нам̣, ан̃н̃аман̃н̃а̄ хи джа̄тийо.

606. ‘‘тин̣аруккхепи джа̄на̄тха, на ча̄пи пат̣иджа̄наре;

лин̇гам̣ джа̄тимайам̣ тесам̣, ан̃н̃аман̃н̃а̄ хи джа̄тийо.

607. ‘‘тато кӣт̣е пат̣ан̇ге ча, йа̄ва кунтхакипиллике;

лин̇гам̣ джа̄тимайам̣ тесам̣, ан̃н̃аман̃н̃а̄ хи джа̄тийо.

608. ‘‘чатуппадепи джа̄на̄тха, кхуддаке ча махаллаке;

лин̇гам̣ джа̄тимайам̣ тесам̣, ан̃н̃аман̃н̃а̄ хи джа̄тийо.

609. ‘‘па̄дӯдарепи джа̄на̄тха, ураге дӣгхапит̣т̣хике;

лин̇гам̣ джа̄тимайам̣ тесам̣, ан̃н̃аман̃н̃а̄ хи джа̄тийо.

610. ‘‘тато маччхепи джа̄на̄тха, одаке ва̄ригочаре;

лин̇гам̣ джа̄тимайам̣ тесам̣, ан̃н̃аман̃н̃а̄ хи джа̄тийо.

611. ‘‘тато паккхӣпи джа̄на̄тха, паттайа̄не вихан̇гаме;

лин̇гам̣ джа̄тимайам̣ тесам̣, ан̃н̃аман̃н̃а̄ хи джа̄тийо.

612. ‘‘йатха̄ ета̄су джа̄тӣсу, лин̇гам̣ джа̄тимайам̣ путху;

евам̣ наттхи мануссесу, лин̇гам̣ джа̄тимайам̣ путху.

613. ‘‘на кесехи на сӣсена, на кан̣н̣ехи на аккхибхи;

на мукхена на на̄са̄йа, на от̣т̣хехи бхамӯхи ва̄.

614. ‘‘на гӣва̄йа на ам̣сехи, на ударена на пит̣т̣хийа̄;

на сон̣ийа̄ на ураса̄, на самба̄дхе на метхуне [на самба̄дха̄ на метхуна̄ (сйа̄. ка.)].

615. ‘‘на хаттхехи на па̄дехи, на̄н̇гулӣхи накхехи ва̄;

на джан̇гха̄хи на ӯрӯхи, на ван̣н̣ена сарена ва̄;

лин̇гам̣ джа̄тимайам̣ нева, йатха̄ ан̃н̃а̄су джа̄тису.

616. ‘‘паччаттан̃ча сарӣресу [паччаттам̣ сасарӣресу (сӣ. пӣ.)], мануссесветам̣ на виджджати;

вока̄ран̃ча мануссесу, саман̃н̃а̄йа павуччати.

617. ‘‘йо хи кочи мануссесу, гораккхам̣ упаджӣвати;

евам̣ ва̄сет̣т̣ха джа̄на̄хи, кассако со на бра̄хман̣о.

618. ‘‘йо хи кочи мануссесу, путхусиппена джӣвати;

евам̣ ва̄сет̣т̣ха джа̄на̄хи, сиппико со на бра̄хман̣о.

619. ‘‘йо хи кочи мануссесу, воха̄рам̣ упаджӣвати;

евам̣ ва̄сет̣т̣ха джа̄на̄хи, ва̄н̣иджо со на бра̄хман̣о.

620. ‘‘йо хи кочи мануссесу, парапессена джӣвати;

евам̣ ва̄сет̣т̣ха джа̄на̄хи, пессико [пессако (ка.)] со на бра̄хман̣о.

621. ‘‘йо хи кочи мануссесу, адиннам̣ упаджӣвати;

евам̣ ва̄сет̣т̣ха джа̄на̄хи, чоро есо на бра̄хман̣о.

622. ‘‘йо хи кочи мануссесу, иссаттхам̣ упаджӣвати;

евам̣ ва̄сет̣т̣ха джа̄на̄хи, йодха̄джӣво на бра̄хман̣о.

623. ‘‘йо хи кочи мануссесу, порохиччена джӣвати;

евам̣ ва̄сет̣т̣ха джа̄на̄хи, йа̄джако есо на бра̄хман̣о.

624. ‘‘йо хи кочи мануссесу, га̄мам̣ рат̣т̣хан̃ча бхун̃джати;

евам̣ ва̄сет̣т̣ха джа̄на̄хи, ра̄джа̄ есо на бра̄хман̣о.

625. ‘‘на ча̄хам̣ бра̄хман̣ам̣ брӯми, йониджам̣ маттисамбхавам̣;

бхова̄ди на̄ма со хоти, саче [са ве (сӣ. сйа̄.)] хоти сакин̃чано;

акин̃чанам̣ ана̄да̄нам̣, тамахам̣ брӯми бра̄хман̣ам̣.

626. ‘‘саббасам̣йоджанам̣ чхетва̄, со ве на паритассати;

сан̇га̄тигам̣ висам̣йуттам̣, тамахам̣ брӯми бра̄хман̣ам̣.

627. ‘‘чхетва̄ наддхим̣ вараттан̃ча, санда̄нам̣ сахануккамам̣;

уккхиттапалигхам̣ буддхам̣, тамахам̣ брӯми бра̄хман̣ам̣.

628. ‘‘аккосам̣ вадхабандхан̃ча, адут̣т̣хо йо титиккхати;

кхантӣбалам̣ бала̄нӣкам̣, тамахам̣ брӯми бра̄хман̣ам̣.

629. ‘‘аккодханам̣ ватавантам̣, сӣлавантам̣ ануссадам̣;

дантам̣ антимаса̄рӣрам̣, тамахам̣ брӯми бра̄хман̣ам̣.

630. ‘‘ва̄ри поккхарапаттева, а̄раггерива са̄сапо;

йо на лимпати ка̄месу, тамахам̣ брӯми бра̄хман̣ам̣.

631. ‘‘йо дуккхасса паджа̄на̄ти, идхева кхайаматтано;

паннабха̄рам̣ висам̣йуттам̣, тамахам̣ брӯми бра̄хман̣ам̣.

632. ‘‘гамбхӣрапан̃н̃ам̣ медха̄вим̣, магга̄маггасса ковидам̣;

уттаматтхамануппаттам̣, тамахам̣ брӯми бра̄хман̣ам̣.

633. ‘‘асам̣сат̣т̣хам̣ гахат̣т̣хехи, ана̄га̄рехи чӯбхайам̣;

анокаса̄римаппиччхам̣, тамахам̣ брӯми бра̄хман̣ам̣.

634. ‘‘нидха̄йа дан̣д̣ам̣ бхӯтесу, тасесу тха̄варесу ча;

йо на ханти на гха̄тети, тамахам̣ брӯми бра̄хман̣ам̣.

635. ‘‘авируддхам̣ вируддхесу, аттадан̣д̣есу ниббутам̣;

са̄да̄несу ана̄да̄нам̣, тамахам̣ брӯми бра̄хман̣ам̣.

636. ‘‘йасса ра̄го ча досо ча, ма̄но маккхо ча па̄тито;

са̄сапорива а̄рагга̄, тамахам̣ брӯми бра̄хман̣ам̣.

637. ‘‘акаккасам̣ вин̃н̃а̄паним̣, гирам̣ саччамудӣрайе;

йа̄йа на̄бхисадже кан̃чи, тамахам̣ брӯми бра̄хман̣ам̣.

638. ‘‘йодха дӣгхам̣ ва рассам̣ ва̄, ан̣ум̣ тхӯлам̣ субха̄субхам̣;

локе адиннам̣ на̄дийати, тамахам̣ брӯми бра̄хман̣ам̣.

639. ‘‘а̄са̄ йасса на виджджанти, асмим̣ локе парамхи ча;

нира̄са̄сам̣ [нира̄сайам̣ (сӣ. сйа̄. пӣ.), нира̄сакам̣ (?)] висам̣йуттам̣, тамахам̣ брӯми бра̄хман̣ам̣.

640. ‘‘йасса̄лайа̄ на виджджанти, ан̃н̃а̄йа акатхам̣катхӣ;

аматогадхамануппаттам̣, тамахам̣ брӯми бра̄хман̣ам̣.

641. ‘‘йодха пун̃н̃ан̃ча па̄пан̃ча, убхо сан̇гамупаччага̄;

асокам̣ вираджам̣ суддхам̣, тамахам̣ брӯми бра̄хман̣ам̣.

642. ‘‘чандам̣ва вималам̣ суддхам̣, виппасаннамана̄вилам̣;

нандӣбхавапариккхӣн̣ам̣, тамахам̣ брӯми бра̄хман̣ам̣.

643. ‘‘йомам̣ палипатхам̣ дуггам̣, сам̣са̄рам̣ мохамаччага̄;

тин̣н̣о па̄ран̇гато джха̄йӣ, анеджо акатхам̣катхӣ;

анупа̄да̄йа ниббуто, тамахам̣ брӯми бра̄хман̣ам̣.

644. ‘‘йодха ка̄ме пахантва̄на, ана̄га̄ро париббадже;

ка̄мабхавапариккхӣн̣ам̣, тамахам̣ брӯми бра̄хман̣ам̣.

645. ‘‘йодха тан̣хам̣ пахантва̄на, ана̄га̄ро париббадже;

тан̣ха̄бхавапариккхӣн̣ам̣, тамахам̣ брӯми бра̄хман̣ам̣.

646. ‘‘хитва̄ ма̄нусакам̣ йогам̣, диббам̣ йогам̣ упаччага̄;

саббайогависам̣йуттам̣, тамахам̣ брӯми бра̄хман̣ам̣.

647. ‘‘хитва̄ ратин̃ча аратим̣, сӣтибхӯтам̣ нирӯпадхим̣;

саббалока̄бхибхум̣ вӣрам̣, тамахам̣ брӯми бра̄хман̣ам̣.

648. ‘‘чутим̣ йо веди [йо’вети (?) итивуттаке 99 ат̣т̣хакатха̄сам̣ван̣ана̄ пасситабба̄] тта̄нам̣, упапаттин̃ча саббасо;

асаттам̣ сугатам̣ буддхам̣, тамахам̣ брӯми бра̄хман̣ам̣.

649. ‘‘йасса гатим̣ на джа̄нанти, дева̄ гандхаббама̄нуса̄;

кхӣн̣а̄савам̣ арахантам̣, тамахам̣ брӯми бра̄хман̣ам̣.

650. ‘‘йасса пуре ча паччха̄ ча, маджджхе ча наттхи кин̃чанам̣;

акин̃чанам̣ ана̄да̄нам̣, тамахам̣ брӯми бра̄хман̣ам̣.

651. ‘‘усабхам̣ паварам̣ вӣрам̣, махесим̣ виджита̄винам̣;

анеджам̣ нха̄такам̣ буддхам̣, тамахам̣ брӯми бра̄хман̣ам̣.

652. ‘‘пуббенива̄сам̣ йо веди [йо’вети (?) итивуттаке 99 ат̣т̣хакатха̄сам̣ван̣ана̄ пасситабба̄], сагга̄па̄йан̃ча пассати;

атхо джа̄тиккхайам̣ патто, тамахам̣ брӯми бра̄хман̣ам̣.

653. ‘‘саман̃н̃а̄ хеса̄ локасмим̣, на̄маготтам̣ пакаппитам̣;

саммучча̄ самуда̄гатам̣, таттха таттха пакаппитам̣.

654. ‘‘дӣгхараттаманусайитам̣, дит̣т̣хигатамаджа̄натам̣;

аджа̄нанта̄ но [аджа̄нанта̄ те (ат̣т̣ха.) ма. ни. 2.460] пабруванти, джа̄тийа̄ хоти бра̄хман̣о.

655. ‘‘на джачча̄ бра̄хман̣о хоти, на джачча̄ хоти абра̄хман̣о;

каммуна̄ бра̄хман̣о хоти, каммуна̄ хоти абра̄хман̣о.

656. ‘‘кассако каммуна̄ хоти, сиппико хоти каммуна̄;

ва̄н̣иджо каммуна̄ хоти, пессико хоти каммуна̄.

657. ‘‘чоропи каммуна̄ хоти, йодха̄джӣвопи каммуна̄;

йа̄джако каммуна̄ хоти, ра̄джа̄пи хоти каммуна̄.

658. ‘‘еваметам̣ йатха̄бхӯтам̣, каммам̣ пассанти пан̣д̣ита̄;

пат̣иччасамуппа̄дадасса̄, каммавипа̄каковида̄.

659. ‘‘каммуна̄ ваттати локо, каммуна̄ ваттати паджа̄;

камманибандхана̄ сатта̄, ратхасса̄н̣ӣва йа̄йато.

660. ‘‘тапена брахмачарийена, сам̣йамена дамена ча;

етена бра̄хман̣о хоти, етам̣ бра̄хман̣амуттамам̣.

661. ‘‘тӣхи виджджа̄хи сампанно, санто кхӣн̣апунаббхаво;

евам̣ ва̄сет̣т̣ха джа̄на̄хи, брахма̄ сакко виджа̄ната’’нти.

евам̣ вутте, ва̄сет̣т̣хабха̄радва̄джа̄ ма̄н̣ава̄ бхагавантам̣ етадавочум̣ – ‘‘абхиккантам̣, бхо готама…пе… упа̄саке но бхавам̣ готамо дха̄рету аджджатагге па̄н̣упете [па̄н̣упетам̣ (ка.)] саран̣ам̣ гате’’ти.

ва̄сет̣т̣хасуттам̣ навамам̣ нит̣т̣хитам̣.