7. ра̄джапуттапетаваттху

753. пуббе ката̄нам̣ камма̄нам̣, випа̄ко матхайе манам̣;

рӯпе садде расе гандхе, пхот̣т̣хаббе ча манораме.

754. наччам̣ гӣтам̣ ратим̣ кхид̣д̣ам̣, анубхутва̄ анаппакам̣;

уййа̄не паричаритва̄, пависанто гириббаджам̣.

755. исим̣ сунетта [сунита (ка.)] маддаккхи, аттадантам̣ сама̄хитам̣;

аппиччхам̣ хирисампаннам̣, ун̃чхе паттагате ратам̣.

756. хаттхиккхандхато оруйха, ладдха̄ бхантети ча̄брави;

тасса паттам̣ гахетва̄на, уччам̣ паггайха кхаттийо.

757. тхан̣д̣иле паттам̣ бхиндитва̄, хасама̄но апакками;

‘‘ран̃н̃о китавасса̄хам̣ путто, ким̣ мам̣ бхиккху кариссаси’’.

758. тасса каммасса пхарусасса, випа̄ко кат̣уко аху;

йам̣ ра̄джапутто ведеси, нирайамхи самаппито.

759. чхал̣ева чатура̄сӣти, васса̄ни навута̄ни ча;

бхусам̣ дуккхам̣ нигаччхиттхо, нирайе катакиббисо.

760. утта̄нопи ча паччиттха, никуджджо ва̄мадаккхин̣о;

уддхам̣па̄до т̣хито чева, чирам̣ ба̄ло апаччатха.

761. бахӯни вассасахасса̄ни, пӯга̄ни нахута̄ни ча;

бхусам̣ дуккхам̣ нигаччхиттхо, нирайе катакиббисо.

762. ета̄дисам̣ кхо кат̣укам̣, аппадут̣т̣хаппадосинам̣;

паччанти па̄пакамманта̄, исима̄саджджа суббатам̣.

763. со таттха бахувасса̄ни, ведайитва̄ бахум̣ дукхам̣;

кхуппипа̄сахато на̄ма [кхуппипа̄са̄хато на̄ма (сӣ. пӣ)], пето а̄си тато чуто.

764. етама̄дӣнавам̣ н̃атва̄ [дисва̄ (сӣ.)], иссарамадасамбхавам̣;

паха̄йа иссарамадам̣, нива̄тамануваттайе.

765. дит̣т̣хева дхамме па̄сам̣со, йо буддхесу сага̄раво;

ка̄йасса бхеда̄ саппан̃н̃о, саггам̣ со упападжджатӣти.

ра̄джапуттапетаваттху саттамам̣.