8. гӯтхакха̄дакапетаваттху

766. ‘‘гӯтхакӯпато уггантва̄, ко ну дӣно патит̣т̣хаси [дӣно хи тит̣т̣хаси (сӣ.)];

ниссам̣сайам̣ па̄пакамманто, ким̣ ну саддахасе тува’’нти.

767. ‘‘ахам̣ бхаданте петомхи, дуггато йамалокико;

па̄пакаммам̣ каритва̄на, петалокам̣ ито гато’’.

768. ‘‘ким̣ ну ка̄йена ва̄ча̄йа, манаса̄ дуккат̣ам̣ катам̣;

кисса каммавипа̄кена, идам̣ дуккхам̣ нигаччхасӣ’’ти.

769. ‘‘аху а̄ва̄сико майхам̣, иссукӣ куламаччхарӣ;

аджджхосито майхам̣ гхаре, кадарийо парибха̄сако.

770. ‘‘тасса̄хам̣ вачанам̣ сутва̄, бхиккхаво парибха̄сисам̣;

тасса каммавипа̄кена, петалокам̣ ито гато’’ти.

771. ‘‘амитто миттаван̣н̣ена, йо те а̄си кулӯпако;

ка̄йасса бхеда̄ дуппан̃н̃о, ким̣ ну печча гатим̣ гато’’ти.

772. ‘‘тассева̄хам̣ па̄пакаммасса, сӣсе тит̣т̣ха̄ми маттхаке;

со ча парависайам̣ патто, мамева парича̄рако.

773. ‘‘йам̣ бхаданте хадантан̃н̃е, етам̣ ме хоти бходжанам̣;

ахан̃ча кхо йам̣ хада̄ми, етам̣ со упаджӣватӣ’’ти.

гӯтхакха̄дакапетаваттху ат̣т̣хамам̣.