8. дутийамигалуддакапетаваттху

488. ‘‘кӯт̣а̄га̄ре ча па̄са̄де, паллан̇ке гонакаттхате;

пан̃чан̇гикена турийена, рамаси суппава̄дите.

489. ‘‘тато ратйа̄ виваса̄не [вйаваса̄не (сӣ.)], сӯрийуггаманам̣ пати;

апавиддхо суса̄насмим̣, бахудуккхам̣ нигаччхаси.

490. ‘‘ким̣ ну ка̄йена ва̄ча̄йа, манаса̄ дуккат̣ам̣ катам̣;

кисса каммавипа̄кена, идам̣ дуккхам̣ нигаччхаси’’.

491. ‘‘ахам̣ ра̄джагахе рамме, раман̣ӣйе гириббадже;

мигалуддо пуре а̄сим̣, луддо ча̄симасан̃н̃ато.

492. ‘‘тасса ме саха̄йо сухадайо, саддхо а̄си упа̄сако;

тасса кулупако бхиккху, а̄си готамаса̄вако;

сопи мам̣ анукампанто, нива̄реси пунаппунам̣.

493. ‘‘‘ма̄ка̄си па̄пакам̣ каммам̣, ма̄ та̄та дуггатим̣ ага̄;

саче иччхаси печча сукхам̣, вирама па̄н̣авадха̄ асам̣йама̄’.

494. ‘‘тасса̄хам̣ вачанам̣ сутва̄, сукхака̄масса хита̄нукампино;

на̄ка̄сим̣ сакала̄нуса̄саним̣, чирапа̄па̄бхирато абуддхима̄.

495. ‘‘со мам̣ пуна бхӯрисумедхасо, анукампа̄йа сам̣йаме нивесайи;

‘саче дива̄ ханаси па̄н̣ино, атха те раттим̣ бхавату сам̣йамо’.

496. ‘‘сва̄хам̣ дива̄ ханитва̄ па̄н̣ино, вирато раттимахоси сан̃н̃ато;

ратта̄хам̣ парича̄реми, дива̄ кхаджджа̄ми дуггато.

497. ‘‘тасса каммасса кусаласса, анубхоми раттим̣ ама̄нусим̣;

дива̄ пат̣ихата̄ва куккура̄, упадха̄ванти саманта̄ кха̄дитум̣.

498. ‘‘йе ча те сатата̄нуйогино, дхувам̣ пайутта̄ [дхувайутта̄ (сӣ.)] сугатасса са̄сане;

ман̃н̃а̄ми те аматамева кевалам̣, адхигаччханти падам̣ асан̇кхата’’нти.

дутийамигалуддакапетаваттху ат̣т̣хамам̣.