10. дха̄тувиван̣н̣апетаваттху

507. ‘‘анталиккхасмим̣ тит̣т̣ханто, дуггандхо пӯти ва̄йаси;

мукхан̃ча те кимайо пӯтигандхам̣, кха̄данти ким̣ каммамака̄си пуббе.

508. ‘‘тато саттхам̣ гахетва̄на, оккантанти пунаппунам̣;

кха̄рена париппхоситва̄, оккантанти пунаппунам̣.

509. ‘‘ким̣ ну ка̄йена ва̄ча̄йа, манаса̄ дуккат̣ам̣ катам̣;

кисса каммавипа̄кена, идам̣ дуккхам̣ нигаччхасӣ’’ти.

510. ‘‘ахам̣ ра̄джагахе рамме, раман̣ӣйе гириббадже;

иссаро дханадхан̃н̃асса, супахӯтасса ма̄риса.

511. ‘‘тасса̄йам̣ ме бхарийа̄ ча, дхӣта̄ ча сун̣иса̄ ча ме;

та̄ ма̄лам̣ уппалан̃ча̄пи, паччаггхан̃ча вилепанам̣;

тхӯпам̣ харантийо ва̄ресим̣, там̣ па̄пам̣ пакатам̣ майа̄.

512. ‘‘чхал̣а̄сӣтисахасса̄ни, майам̣ паччаттаведана̄;

тхӯпапӯджам̣ виван̣н̣етва̄, пачча̄ма нирайе бхусам̣.

513. ‘‘йе ча кхо тхӯпапӯджа̄йа, ваттанте арахато махе;

а̄дӣнавам̣ пака̄сенти, вивечайетха [вивечайатха (сӣ.)] не тато.

514. ‘‘има̄ ча пасса а̄йантийо, ма̄ладха̄рӣ алан̇ката̄;

ма̄ла̄випа̄кам̣нубхонтийо [анубхаванти (сӣ. пӣ.)], самиддха̄ ча та̄ [самиддха̄ та̄ (сӣ. сйа̄.)] йасассинийо.

515. ‘‘тан̃ча дисва̄на аччхерам̣, аббхутам̣ ломахам̣санам̣;

намо каронти саппан̃н̃а̄, ванданти там̣ маха̄муним̣.

516. ‘‘сохам̣ нӯна ито гантва̄, йоним̣ ладдха̄на ма̄нусим̣;

тхӯпапӯджам̣ карисса̄ми, аппаматто пунаппуна’’нти.

дха̄тувиван̣н̣апетаваттху дасамам̣.

чӯл̣авагго татийо нит̣т̣хито.