13. уббарипетаваттху

368. аху ра̄джа̄ брахмадатто, пан̃ча̄ла̄нам̣ ратхесабхо;

ахоратта̄намаччайа̄, ра̄джа̄ ка̄ламакруббатха [ра̄джа̄ ка̄лан̇карӣ тада̄ (сӣ.)].

369. тасса а̄л̣а̄ханам̣ гантва̄, бхарийа̄ кандати уббарӣ [уппари (ка.)];

брахмадаттам̣ апассантӣ, брахмадатта̄ти кандати.

370. иси ча таттха а̄гаччхи, сампанначаран̣о муни;

со ча таттха апуччхиттха, йе таттха сусама̄гата̄.

371. ‘‘касса идам̣ а̄л̣а̄ханам̣, на̄на̄гандхасамеритам̣;

касса̄йам̣ кандати бхарийа̄, ито дӯрагатам̣ патим̣;

брахмадаттам̣ апассантӣ, ‘брахмадатта̄’ти кандати’’.

372. те ча таттха вийа̄кам̣су, йе таттха сусама̄гата̄;

‘‘брахмадаттасса бхаданте [бхадданте (ка.)], брахмадаттасса ма̄риса.

373. ‘‘тасса идам̣ а̄л̣а̄ханам̣, на̄на̄гандхасамеритам̣;

тасса̄йам̣ кандати бхарийа̄, ито дӯрагатам̣ патим̣;

брахмадаттам̣ апассантӣ, ‘брахмадатта̄’ти кандати’’.

374. ‘‘чхал̣а̄сӣтисахасса̄ни, брахмадаттассана̄мака̄;

имасмим̣ а̄л̣а̄хане дад̣д̣ха̄, тесам̣ каманусочасӣ’’ти.

375. ‘‘йо ра̄джа̄ чӯл̣анӣпутто, пан̃ча̄ла̄нам̣ ратхесабхо;

там̣ бханте анусоча̄ми, бхатта̄рам̣ саббака̄мада’’нти.

376. ‘‘саббе ва̄хесум̣ ра̄джа̄но, брахмадаттассана̄мака̄;

саббевачӯл̣анӣпутта̄, пан̃ча̄ла̄нам̣ ратхесабха̄.

377. ‘‘саббесам̣ анупуббена, махеситтамака̄райи;

касма̄ пуримаке хитва̄, паччхимам̣ анусочасӣ’’ти.

378. ‘‘а̄туме иттхибхӯта̄йа, дӣгхаратта̄йа ма̄риса;

йасса̄ ме иттхибхӯта̄йа, сам̣са̄ре бахубха̄сасӣ’’ти.

379. ‘‘аху иттхӣ аху пурисо, пасуйонимпи а̄гама̄;

еваметам̣ атӣта̄нам̣, парийанто на диссатӣ’’ти.

380. ‘‘а̄диттам̣ вата мам̣ сантам̣, гхатаситтам̣ва па̄вакам̣;

ва̄рина̄ вийа осин̃чам̣, саббам̣ нибба̄пайе дарам̣.

381. ‘‘аббахӣ вата ме саллам̣, сокам̣ хадайанисситам̣;

йо ме сокапарета̄йа, патисокам̣ апа̄нуди.

382. ‘‘са̄хам̣ аббӯл̣хасалла̄сми, сӣтибхӯта̄сми ниббута̄;

на соча̄ми на рода̄ми, тава сутва̄ маха̄мунӣ’’ти.

383. тасса там̣ вачанам̣ сутва̄, саман̣асса субха̄ситам̣;

паттачӣварама̄да̄йа, паббаджи анага̄рийам̣.

384. са̄ ча паббаджита̄ санта̄, ага̄расма̄ анага̄рийам̣;

метта̄читтам̣ абха̄веси, брахмалокӯпапаттийа̄.

385. га̄ма̄ га̄мам̣ вичарантӣ, нигаме ра̄джадха̄нийо;

урувела̄ на̄ма со га̄мо, йаттха ка̄ламакруббатха.

386. метта̄читтам̣ а̄бха̄ветва̄, брахмалокӯпапаттийа̄;

иттхичиттам̣ вира̄джетва̄, брахмалокӯпага̄ ахӯти.

уббарипетаваттху терасамам̣.

уббаривагго дутийо нит̣т̣хито.