7. саттапуттакха̄дапетиваттху

35. ‘‘нагга̄ дуббан̣н̣арӯпа̄си, дуггандха̄ пӯти ва̄йаси;

маккхика̄хи парикин̣н̣а̄, ка̄ ну твам̣ идха тит̣т̣хасӣ’’ти.

36. ‘‘ахам̣ бхаданте петӣмхи, дуггата̄ йамалокика̄;

па̄пакаммам̣ каритва̄на, петалокам̣ ито гата̄.

37. ‘‘ка̄лена сатта путта̄ни, са̄йам̣ сатта пуна̄паре;

виджа̄йитва̄на кха̄да̄ми, тепи на̄ хонти ме алам̣.

38. ‘‘парид̣айхати дхӯма̄йати, кхуда̄йа хадайам̣ мама;

ниббутим̣ на̄дхигаччха̄ми, аггидад̣д̣ха̄ва а̄тапе’’ти.

39. ‘‘ким̣ ну ка̄йена ва̄ча̄йа, манаса̄ дуккат̣ам̣ катам̣;

кисса каммавипа̄кена, путтамам̣са̄ни кха̄дасӣ’’ти.

40. ‘‘ахӯ майхам̣ дуве путта̄, убхо сампаттайоббана̄;

са̄хам̣ путтабалӯпета̄, са̄микам̣ атиман̃н̃исам̣.

41. ‘‘тато ме са̄мико куддхо, сапаттим̣ майхама̄найи;

са̄ ча габбхам̣ алабхиттха, тасса̄ па̄пам̣ ачетайим̣.

42. ‘‘са̄хам̣ падут̣т̣хаманаса̄, акарим̣ габбхапа̄танам̣;

тасса̄ тема̄сико габбхо, пуббалохитако [пуббалохитако (ка.)] пати.

43. ‘‘тадасса̄ ма̄та̄ купита̄, майхам̣ н̃а̄тӣ сама̄найи;

сапатхан̃ча мам̣ ка̄реси, парибха̄са̄пайӣ ча мам̣.

44. ‘‘са̄хам̣ гхоран̃ча сапатхам̣, муса̄ва̄дам̣ абха̄сисам̣;

‘путтамам̣са̄ни кха̄да̄ми, саче там̣ пакатам̣ майа̄’.

45. ‘‘тасса каммасса випа̄кена, муса̄ва̄дасса чӯбхайам̣;

путтамам̣са̄ни кха̄да̄ми, пуббалохитамаккхита̄’’ти.

саттапуттакха̄дапетиваттху саттамам̣.