7. самасӣсакатха̄

33. саббадхамма̄нам̣ [саббесам̣ дхамма̄нам̣ (ка.) пат̣и. ма. 1.87 пасситабба̄] самма̄самуччхеде ниродхе ча анупат̣т̣ха̄ната̄ пан̃н̃а̄ самасӣсат̣т̣хе н̃а̄н̣ам̣.

саббадхамма̄нанти пан̃чаккхандха̄, два̄даса̄йатана̄ни, ат̣т̣ха̄раса дха̄туйо, кусала̄ дхамма̄, акусала̄ дхамма̄, абйа̄ката̄ дхамма̄, ка̄ма̄вачара̄ дхамма̄, рӯпа̄вачара̄ дхамма̄, арӯпа̄вачара̄ дхамма̄, апарийа̄панна̄ дхамма̄. самма̄ самуччхедети неккхаммена ка̄маччхандам̣ самма̄ самуччхиндати, абйа̄па̄дена бйа̄па̄дам̣ самма̄ самуччхиндати, а̄локасан̃н̃а̄йа тхинамиддхам̣ самма̄ самуччхиндати, авиккхепена уддхаччам̣ самма̄ самуччхиндати, дхаммававаттха̄нена вичикиччхам̣ самма̄ самуччхиндати, н̃а̄н̣ена авиджджам̣ самма̄ самуччхиндати, па̄моджджена аратим̣ самма̄ самуччхиндати, пат̣хамена джха̄нена нӣваран̣е самма̄ самуччхиндати…пе… арахаттамаггена саббакилесе самма̄ самуччхиндати.

ниродхети неккхаммена ка̄маччхандам̣ ниродхети, абйа̄па̄дена бйа̄па̄дам̣ ниродхети, а̄локасан̃н̃а̄йа тхинамиддхам̣ ниродхети, авиккхепена уддхаччам̣ ниродхети, дхаммававаттха̄нена вичикиччхам̣ ниродхети, н̃а̄н̣ена авиджджам̣ ниродхети, па̄моджджена аратим̣ ниродхети, пат̣хамена джха̄нена нӣваран̣е ниродхети…пе… арахаттамаггена саббакилесе ниродхети.

анупат̣т̣ха̄ната̄ти неккхаммам̣ пат̣иладдхасса ка̄маччхандо на упат̣т̣ха̄ти, абйа̄па̄дам̣ пат̣иладдхасса бйа̄па̄до на упат̣т̣ха̄ти, а̄локасан̃н̃ам̣ пат̣иладдхасса тхинамиддхам̣ на упат̣т̣ха̄ти, авиккхепам̣ пат̣иладдхасса уддхаччам̣ на упат̣т̣ха̄ти, дхаммававаттха̄нам̣ пат̣иладдхасса вичикиччха̄ на упат̣т̣ха̄ти, н̃а̄н̣ам̣ пат̣иладдхасса авиджджа̄ на упат̣т̣ха̄ти, па̄моджджам̣ пат̣иладдхасса арати на упат̣т̣ха̄ти, пат̣хамам̣ джха̄нам̣ пат̣иладдхасса нӣваран̣а̄ на упат̣т̣ханти…пе… арахаттамаггам̣ пат̣иладдхасса саббакилеса̄ на упат̣т̣ханти.

саманти ка̄маччхандасса пахӣнатта̄ неккхаммам̣ самам̣, бйа̄па̄дасса пахӣнатта̄ абйа̄па̄до самам̣, тхинамиддхасса пахӣнатта̄ а̄локасан̃н̃а̄ самам̣, уддхаччасса пахӣнатта̄ авиккхепо самам̣, вичикиччха̄йа пахӣнатта̄ дхаммававаттха̄нам̣ самам̣, авиджджа̄йа пахӣнатта̄ н̃а̄н̣ам̣ самам̣, аратийа̄ пахӣнатта̄ па̄моджджам̣ самам̣, нӣваран̣а̄нам̣ пахӣнатта̄ пат̣хамам̣ джха̄нам̣ самам̣…пе… саббакилеса̄нам̣ пахӣнатта̄ арахаттамагго самам̣.

сӣсанти тераса сӣса̄ни – палибодхасӣсан̃ча тан̣ха̄, винибандханасӣсан̃ча ма̄но, пара̄ма̄сасӣсан̃ча дит̣т̣хи, виккхепасӣсан̃ча уддхаччам̣, сам̣килесасӣсан̃ча авиджджа̄, адхимоккхасӣсан̃ча саддха̄, паггахасӣсан̃ча вӣрийам̣, упат̣т̣ха̄насӣсан̃ча сати, авиккхепасӣсан̃ча сама̄дхи, дассанасӣсан̃ча пан̃н̃а̄, паваттасӣсан̃ча джӣвитиндрийам̣, гочарасӣсан̃ча вимоккхо, сан̇кха̄расӣсан̃ча ниродхоти.

самасӣсакатха̄ нит̣т̣хита̄.