8. сатипат̣т̣ха̄накатха̄

34. са̄ваттхинида̄нам̣. ‘‘чатта̄роме, бхиккхаве, сатипат̣т̣ха̄на̄. катаме чатта̄ро? идха, бхиккхаве, бхиккху ка̄йе ка̄йа̄нупассӣ вихарати а̄та̄пӣ сампаджа̄но сатима̄, винеййа локе абхиджджха̄доманассам̣. ведана̄су…пе… читте… дхаммесу дхамма̄нупассӣ вихарати а̄та̄пӣ сампаджа̄но сатима̄, винеййа локе абхиджджха̄доманассам̣. име кхо, бхиккхаве, чатта̄ро сатипат̣т̣ха̄на̄’’ти.

35. [ка] катхам̣ ка̄йе ка̄йа̄нупассӣ вихарати? идхекаччо патхавӣка̄йам̣ аниччато анупассати, но ниччато; дуккхато анупассати, но сукхато; анаттато анупассати, но аттато; ниббиндати, но нандати; вираджджати, но раджджати; ниродхети, но самудети, пат̣иниссаджджати, но а̄дийати. аниччато анупассанто ниччасан̃н̃ам̣ паджахати, дуккхато анупассанто сукхасан̃н̃ам̣ паджахати, анаттато анупассанто аттасан̃н̃ам̣ паджахати, ниббинданто нандим̣ паджахати, вираджджанто ра̄гам̣ паджахати, ниродхенто самудайам̣ паджахати, пат̣иниссаджджанто а̄да̄нам̣ паджахати. имехи саттахи а̄ка̄рехи ка̄йам̣ анупассати. ка̄йо упат̣т̣ха̄нам̣, но сати. сати упат̣т̣ха̄нан̃чева сати ча. та̄йа сатийа̄ тена н̃а̄н̣ена там̣ ка̄йам̣ анупассати. тена вуччати – ‘‘ка̄йе ка̄йа̄нупассана̄сатипат̣т̣ха̄на̄’’.

бха̄вана̄ти чатассо бха̄вана̄ – таттха джа̄та̄нам̣ дхамма̄нам̣ анативаттанат̣т̣хена бха̄вана̄, индрийа̄нам̣ екарасат̣т̣хена бха̄вана̄, тадупагавӣрийава̄ханат̣т̣хена бха̄вана̄, а̄севанат̣т̣хена бха̄вана̄.

идхекаччо а̄пока̄йам̣…пе… теджока̄йам̣… ва̄йока̄йам̣… кесака̄йам̣… ломака̄йам̣… чхавика̄йам̣… чаммака̄йам̣… мам̣сака̄йам̣… рудхирака̄йам̣… нха̄рука̄йам̣ [наха̄рука̄йам̣ (сйа̄.)] … ат̣т̣хика̄йам̣… ат̣т̣химин̃джака̄йам̣ аниччато анупассати, но ниччато; дуккхато анупассати, но сукхато; анаттато анупассати, но аттато; ниббиндати, но нандати; вираджджати, но раджджати, ниродхети, но самудети; пат̣иниссаджджати, но а̄дийати. аниччато анупассанто ниччасан̃н̃ам̣ паджахати, дуккхато анупассанто сукхасан̃н̃ам̣ паджахати, анаттато анупассанто аттасан̃н̃ам̣ паджахати, ниббинданто нандим̣ паджахати, вираджджанто ра̄гам̣ паджахати, ниродхенто самудайам̣ паджахати, пат̣иниссаджджанто а̄да̄нам̣ паджахати. имехи саттахи а̄ка̄рехи ка̄йам̣ анупассати. ка̄йо упат̣т̣ха̄нам̣, но сати. сати упат̣т̣ха̄нан̃чева сати ча. та̄йа сатийа̄ тена н̃а̄н̣ена там̣ ка̄йам̣ анупассати. тена вуччати – ‘‘ка̄йе ка̄йа̄нупассана̄сатипат̣т̣ха̄на̄’’.

[кха] катхам̣ ведана̄су ведана̄нупассӣ вихарати? идхекаччо сукхам̣ веданам̣ аниччато анупассати, но ниччато…пе… пат̣иниссаджджати, но а̄дийати. аниччато анупассанто ниччасан̃н̃ам̣ паджахати…пе… пат̣иниссаджджанто а̄да̄нам̣ паджахати. имехи саттахи а̄ка̄рехи веданам̣ анупассати. ведана̄ упат̣т̣ха̄нам̣, но сати. сати упат̣т̣ха̄нан̃чева сати ча. та̄йа сатийа̄ тена н̃а̄н̣ена там̣ веданам̣ анупассати. тена вуччати – ‘‘ведана̄су ведана̄нупассана̄сатипат̣т̣ха̄на̄’’.

бха̄вана̄ти чатассо бха̄вана̄…пе… а̄севанат̣т̣хена бха̄вана̄…пе… идхекаччо дуккхам̣ веданам̣…пе… адуккхамасукхам̣ веданам̣… са̄мисам̣ сукхам̣ веданам̣… нира̄мисам̣ сукхам̣ веданам̣… са̄мисам̣ дуккхам̣ веданам̣… нира̄мисам̣ дуккхам̣ веданам̣… са̄мисам̣ адуккхамасукхам̣ веданам̣… нира̄мисам̣ адуккхамасукхам̣ веданам̣… чаккхусампхассаджам̣ веданам̣… сотасампхассаджам̣ веданам̣… гха̄насампхассаджам̣ веданам̣… дживха̄сампхассаджам̣ веданам̣… ка̄йасампхассаджам̣ веданам̣… маносампхассаджам̣ веданам̣ аниччато анупассати, но ниччато…пе… пат̣иниссаджджати, но а̄дийати. аниччато анупассанто ниччасан̃н̃ам̣ паджахати…пе… пат̣иниссаджджанто а̄да̄нам̣ паджахати. имехи саттахи а̄ка̄рехи веданам̣ анупассати. ведана̄ упат̣т̣ха̄нам̣, но сати. сати упат̣т̣ха̄нан̃чева сати ча. та̄йа сатийа̄ тена н̃а̄н̣ена там̣ веданам̣ анупассати. тена вуччати – ‘‘ведана̄су ведана̄нупассана̄сатипат̣т̣ха̄на̄’’.

бха̄вана̄ти чатассо бха̄вана̄…пе… евам̣ ведана̄су ведана̄нупассӣ вихарати.

[га] катхам̣ читте читта̄нупассӣ вихарати? идхекаччо сара̄гам̣ читтам̣ аниччато анупассати, но ниччато…пе… пат̣иниссаджджати, но а̄дийати. аниччато анупассанто ниччасан̃н̃ам̣ паджахати…пе… пат̣иниссаджджанто а̄да̄нам̣ паджахати. имехи саттахи а̄ка̄рехи читтам̣ анупассати. читтам̣ упат̣т̣ха̄нам̣, но сати. сати упат̣т̣ха̄нан̃чева сати ча. та̄йа сатийа̄ тена н̃а̄н̣ена там̣ читтам̣ анупассати. тена вуччати – ‘‘читте читта̄нупассана̄сатипат̣т̣ха̄на̄’’.

бха̄вана̄ти чатассо бха̄вана̄…пе… а̄севанат̣т̣хена бха̄вана̄.

идхекаччо вӣтара̄гам̣ читтам̣…пе… садосам̣ читтам̣… вӣтадосам̣ читтам̣… самохам̣ читтам̣… вӣтамохам̣ читтам̣… сам̣кхиттам̣ читтам̣… виккхиттам̣ читтам̣… махаггатам̣ читтам̣… амахаггатам̣ читтам̣… сауттарам̣ читтам̣… ануттарам̣ читтам̣… сама̄хитам̣ читтам̣… асама̄хитам̣ читтам̣… вимуттам̣ читтам̣… авимуттам̣ читтам̣… чаккхувин̃н̃а̄н̣ам̣… сотавин̃н̃а̄н̣ам̣… гха̄навин̃н̃а̄н̣ам̣… дживха̄вин̃н̃а̄н̣ам̣… ка̄йавин̃н̃а̄н̣ам̣… мановин̃н̃а̄н̣ам̣ аниччато анупассати, но ниччато…пе… пат̣иниссаджджати, но а̄дийати. аниччато анупассанто ниччасан̃н̃ам̣ паджахати…пе… пат̣иниссаджджанто а̄да̄нам̣ паджахати. имехи саттахи а̄ка̄рехи читтам̣ анупассати. читтам̣ упат̣т̣ха̄нам̣, но сати. сати упат̣т̣ха̄нан̃чева сати ча. та̄йа сатийа̄ тена н̃а̄н̣ена там̣ читтам̣ анупассати. тена вуччати – ‘‘читте читта̄нупассана̄сатипат̣т̣ха̄на̄’’.

бха̄вана̄ти чатассо бха̄вана̄…пе… а̄севанат̣т̣хена бха̄вана̄. евам̣ читте читта̄нупассӣ вихарати.

[гха] катхам̣ дхаммесу дхамма̄нупассӣ вихарати? идхекаччо т̣хапетва̄ ка̄йам̣ т̣хапетва̄ веданам̣ т̣хапетва̄ читтам̣ тадавасесе дхамме аниччато анупассати, но ниччато; дуккхато анупассати, но сукхато; анаттато анупассати, но аттато; ниббиндати, но нандати; вираджджати, но раджджати; ниродхети, но самудети; пат̣иниссаджджати, но а̄дийати. аниччато анупассанто ниччасан̃н̃ам̣ паджахати, дуккхато анупассанто сукхасан̃н̃ам̣ паджахати, анаттато анупассанто аттасан̃н̃ам̣ паджахати, ниббинданто нандим̣ паджахати, вираджджанто ра̄гам̣ паджахати, ниродхенто самудайам̣ паджахати, пат̣иниссаджджанто а̄да̄нам̣ паджахати. имехи саттахи а̄ка̄рехи те дхамме анупассати. дхамма̄ упат̣т̣ха̄нам̣, но сати. сати упат̣т̣ха̄нан̃чева сати ча. та̄йа сатийа̄ тена н̃а̄н̣ена те дхамме анупассати. тена вуччати – ‘‘дхаммесу дхамма̄нупассана̄сатипат̣т̣ха̄на̄’’.

сатипат̣т̣ха̄накатха̄ нит̣т̣хита̄.