1. сӣхан̇гапан̃хо

1. ‘‘бханте на̄гасена, ‘сӣхасса сатта ан̇га̄ни гахетабба̄нӣ’ти йам̣ вадеси, катама̄ни та̄ни сатта ан̇га̄ни гахетабба̄нӣ’’ти? ‘‘йатха̄, маха̄ра̄джа, сӣхо на̄ма сетавималапарисуддхапан̣д̣аро, евамева кхо, маха̄ра̄джа, йогина̄ йога̄вачарена сетавималапарисуддхапан̣д̣арачиттена бйапагатакуккуччена бхавитаббам̣. идам̣, маха̄ра̄джа, сӣхасса пат̣хамам̣ ан̇гам̣ гахетаббам̣.

‘‘пуна чапарам̣, маха̄ра̄джа, сӣхо чатучаран̣о виккантача̄рӣ, евамева кхо, маха̄ра̄джа, йогина̄ йога̄вачарена чатуриддхипа̄дачаран̣ена бхавитаббам̣. идам̣, маха̄ра̄джа, сӣхасса дутийам̣ ан̇гам̣ гахетаббам̣.

‘‘пуна чапарам̣, маха̄ра̄джа, сӣхо абхирӯпаручиракесарӣ, евамева кхо, маха̄ра̄джа, йогина̄ йога̄вачарена абхирӯпаручирасӣлакесарина̄ бхавитаббам̣. идам̣, маха̄ра̄джа, сӣхасса татийам̣ ан̇гам̣ гахетаббам̣.

‘‘пуна чапарам̣, маха̄ра̄джа, сӣхо джӣвитапарийа̄да̄непи на кассачи онамати, евамева кхо, маха̄ра̄джа, йогина̄ йога̄вачарена чӣварапин̣д̣апа̄тасена̄санагила̄напаччайабхесаджджапариккха̄рапарийа̄да̄непи на кассачи онамитаббам̣. идам̣, маха̄ра̄джа, сӣхасса чатуттхам̣ ан̇гам̣ гахетаббам̣.

‘‘пуна чапарам̣, маха̄ра̄джа, сӣхо сапада̄набхаккхо йасмим̣ ока̄се нипатати, таттхева йа̄вадаттхам̣ бхаккхайати, на варамам̣сам̣ вичина̄ти, евамева кхо, маха̄ра̄джа, йогина̄ йога̄вачарена сапада̄набхаккхена бхавитаббам̣, на кула̄ни вичинитабба̄ни, на пуббагехам̣ хитва̄ кула̄ни упасан̇камитабба̄ни, на бходжанам̣ вичинитаббам̣, йасмим̣ ока̄се кабал̣ам̣ а̄дӣйати, тасмим̣ йева ока̄се бхун̃джитаббам̣ сарӣрайа̄панаттхам̣ [сарӣрайа̄панаматтам̣ (сӣ. пӣ.)], на варабходжанам̣ вичинитаббам̣. идам̣, маха̄ра̄джа, сӣхасса пан̃чамам̣ ан̇гам̣ гахетаббам̣.

‘‘пуна чапарам̣, маха̄ра̄джа, сӣхо асаннидхибхаккхо, саким̣ гочарам̣ бхаккхайитва̄ на пуна там̣ упагаччхати, евамева кхо, маха̄ра̄джа, йогина̄ йога̄вачарена асаннидхика̄рапарибхогина̄ бхавитаббам̣. идам̣, маха̄ра̄джа, сӣхасса чхат̣т̣хам̣ ан̇гам̣ гахетаббам̣.

‘‘пуна чапарам̣, маха̄ра̄джа, сӣхо бходжанам̣ аладдха̄ на паритассати, ладдха̄пи бходжанам̣ агадхито [агатхито (сӣ.)] амуччхито анаджджхосанно парибхун̃джати, евамева кхо, маха̄ра̄джа, йогина̄ йога̄вачарена бходжанам̣ аладдха̄ на паритасситаббам̣, ладдха̄пи бходжанам̣ агадхитена амуччхитена анаджджхосаннена а̄дӣнавадасса̄вина̄ ниссаран̣апан̃н̃ена парибхун̃джитаббам̣. идам̣, маха̄ра̄джа, сӣхасса саттамам̣ ан̇гам̣ гахетаббам̣. бха̄ситампетам̣, маха̄ра̄джа, бхагавата̄ дева̄тидевена сам̣йуттаника̄йаваре тхерам̣ маха̄кассапам̣ парикиттайама̄нена –

‘сантут̣т̣хойам̣, бхиккхаве, кассапо итарӣтарена пин̣д̣апа̄тена, итарӣтарапин̣д̣апа̄тасантут̣т̣хийа̄ ча ван̣н̣ава̄дӣ, на ча пин̣д̣апа̄тахету анесанам̣ аппатирӯпам̣ а̄паджджати, аладдха̄ ча пин̣д̣апа̄там̣ на паритассати, ладдха̄ ча пин̣д̣апа̄там̣ агадхито амуччхито анаджджхосанно а̄дӣнавадасса̄вӣ ниссаран̣апан̃н̃о парибхун̃джатӣ’’’ти.

сӣхан̇гапан̃хо пат̣хамо.