6. джарасин̇га̄лан̇гапан̃хо

6. ‘‘бханте на̄гасена, ‘джарасин̇га̄ласса две ан̇га̄ни гахетабба̄нӣ’ти йам̣ вадеси, катама̄ни та̄ни две ан̇га̄ни гахетабба̄нӣ’’ти? ‘‘йатха̄, маха̄ра̄джа, джарасин̇га̄ло бходжанам̣ пат̣илабхитва̄ аджигуччхама̄но йа̄вадаттхам̣ а̄харайати, евамева кхо, маха̄ра̄джа, йогина̄ йога̄вачарена бходжанам̣ пат̣илабхитва̄ аджигуччхама̄нена сарӣрайа̄панаматтамева парибхун̃джитаббам̣. идам̣, маха̄ра̄джа, джарасин̇га̄ласса пат̣хамам̣ ан̇гам̣ гахетаббам̣. бха̄ситампетам̣, маха̄ра̄джа, тхерена маха̄кассапена –

‘‘‘сена̄санамха̄ оруйха, га̄мам̣ пин̣д̣а̄йа па̄висим̣;

бхун̃джантам̣ пурисам̣ кут̣т̣хим̣, саккачча нам̣ упат̣т̣хахим̣.

‘‘‘со ме паккена хаттхена, а̄лопам̣ упана̄майи;

а̄лопам̣ паккхипантасса, ан̇гулипеттха чхиджджатха.

‘‘‘кут̣т̣амӯлан̃ча нисса̄йа, а̄лопам̣ там̣ абхун̃джисам̣;

бхун̃джама̄не ва̄ бхутте ва̄, джегуччхам̣ ме на виджджатӣ’ти.

‘‘пуна чапарам̣, маха̄ра̄джа, джарасин̇га̄ло бходжанам̣ пат̣илабхитва̄ на вичина̄ти лӯкхам̣ ва̄ пан̣ӣтам̣ ва̄ти, евамева кхо, маха̄ра̄джа, йогина̄ йога̄вачарена бходжанам̣ пат̣илабхитва̄ на вичинитаббам̣ ‘лӯкхам̣ ва̄ пан̣ӣтам̣ ва̄ сампаннам̣ ва̄ асампаннам̣ ва̄’ти, йатха̄ладдхена сантусситаббам̣. идам̣, маха̄ра̄джа, джарасин̇га̄ласса дутийам̣ ан̇гам̣ гахетаббам̣. бха̄ситампетам̣, маха̄ра̄джа, тхерена упасенена ван̇гантапуттена –

‘‘‘лӯкхенапи ча сантуссе, на̄н̃н̃ам̣ паттхе расам̣ бахум̣;

расесу анугиддхасса, джха̄не на рамате [раматӣ (сӣ. пӣ.)] мано;

итарӣтарена сантут̣т̣хо [сантут̣т̣хе (сӣ. пӣ.)], са̄ман̃н̃ам̣ парипӯратӣ’’’ти.

джарасин̇га̄лан̇гапан̃хо чхат̣т̣хо.