1. гадрабхан̇гапан̃хо

1. ‘‘бханте на̄гасена, ‘гадрабхасса екам̣ ан̇гам̣ гахетабба’нти йам̣ вадеси, катамам̣ там̣ екам̣ ан̇гам̣ гахетабба’’нти? ‘‘йатха̄, маха̄ра̄джа, гадрабхо на̄ма сан̇ка̄ракӯт̣епи чатуккепи син̇гха̄т̣акепи га̄мадва̄репи тхусара̄симхипи йаттха каттхачи сайати, на сайанабахуло хоти, евамева кхо, маха̄ра̄джа, йогина̄ йога̄вачарена тин̣асантха̄репи пан̣н̣асантха̄репи кат̣т̣хаман̃чакепи чхама̄йапи йаттха каттхачи чаммакхан̣д̣ам̣ паттхаритва̄ йаттха каттхачи сайитаббам̣, на сайанабахулена бхавитаббам̣. идам̣, маха̄ра̄джа, гадрабхасса екам̣ ан̇гам̣ гахетаббам̣. бха̄ситампетам̣, маха̄ра̄джа, бхагавата̄ дева̄тидевена ‘калин̇гарӯпадха̄на̄, бхиккхаве, етарахи мама са̄вака̄ вихаранти аппаматта̄ а̄та̄пино падха̄насми’нти. бха̄ситампетам̣, маха̄ра̄джа, тхерена са̄рипуттена дхаммасена̄патина̄пи –

‘‘‘паллан̇кена нисиннасса, джан̣н̣укена̄бхивассати;

алам̣ пха̄сувиха̄ра̄йа, пахитаттасса бхиккхуно’’’ти.

гадрабхан̇гапан̃хо пат̣хамо.