1. гадрабхавагго

1. гадрабхан̇гапан̃хо

1. ‘‘бханте на̄гасена, ‘гадрабхасса екам̣ ан̇гам̣ гахетабба’нти йам̣ вадеси, катамам̣ там̣ екам̣ ан̇гам̣ гахетабба’’нти? ‘‘йатха̄, маха̄ра̄джа, гадрабхо на̄ма сан̇ка̄ракӯт̣епи чатуккепи син̇гха̄т̣акепи га̄мадва̄репи тхусара̄симхипи йаттха каттхачи сайати, на сайанабахуло хоти, евамева кхо, маха̄ра̄джа, йогина̄ йога̄вачарена тин̣асантха̄репи пан̣н̣асантха̄репи кат̣т̣хаман̃чакепи чхама̄йапи йаттха каттхачи чаммакхан̣д̣ам̣ паттхаритва̄ йаттха каттхачи сайитаббам̣, на сайанабахулена бхавитаббам̣. идам̣, маха̄ра̄джа, гадрабхасса екам̣ ан̇гам̣ гахетаббам̣. бха̄ситампетам̣, маха̄ра̄джа, бхагавата̄ дева̄тидевена ‘калин̇гарӯпадха̄на̄, бхиккхаве, етарахи мама са̄вака̄ вихаранти аппаматта̄ а̄та̄пино падха̄насми’нти. бха̄ситампетам̣, маха̄ра̄джа, тхерена са̄рипуттена дхаммасена̄патина̄пи –

‘‘‘паллан̇кена нисиннасса, джан̣н̣укена̄бхивассати;

алам̣ пха̄сувиха̄ра̄йа, пахитаттасса бхиккхуно’’’ти.

гадрабхан̇гапан̃хо пат̣хамо.

2. куккут̣ан̇гапан̃хо

2. ‘‘бханте на̄гасена, ‘куккут̣асса пан̃ча ан̇га̄ни гахетабба̄нӣ’ти йам̣ вадеси, катама̄ни та̄ни пан̃ча ан̇га̄ни гахетабба̄нӣ’’ти? ‘‘йатха̄, маха̄ра̄джа, куккут̣о ка̄лена самайена пат̣исаллӣйати, евамева кхо, маха̄ра̄джа, йогина̄ йога̄вачарена ка̄лена самайенева четийан̇ган̣ам̣ саммаджджитва̄ па̄нӣйам̣ парибходжанӣйам̣ упат̣т̣хапетва̄ сарӣрам̣ пат̣иджаггитва̄ наха̄йитва̄ четийам̣ вандитва̄ вуд̣д̣ха̄нам̣ бхиккхӯнам̣ дассана̄йа гантва̄ ка̄лена самайена сун̃н̃а̄га̄рам̣ пависитаббам̣. идам̣, маха̄ра̄джа, куккут̣асса пат̣хамам̣ ан̇гам̣ гахетаббам̣.

‘‘пуна чапарам̣, маха̄ра̄джа, куккут̣о ка̄лена самайенева вут̣т̣ха̄ти. евамева кхо, маха̄ра̄джа, йогина̄ йога̄вачарена ка̄лена самайенева вут̣т̣хахитва̄ четийан̇ган̣ам̣ саммаджджитва̄ па̄нӣйам̣ парибходжанӣйам̣ упат̣т̣хапетва̄ сарӣрам̣ пат̣иджаггитва̄ четийам̣ вандитва̄ пунадева сун̃н̃а̄га̄рам̣ пависитаббам̣. идам̣, маха̄ра̄джа, куккут̣асса дутийам̣ ан̇гам̣ гахетаббам̣.

‘‘пуна чапарам̣, маха̄ра̄джа, куккут̣о патхавим̣ кхан̣итва̄ кхан̣итва̄ аджджхоха̄рам̣ аджджхохарати. евамева кхо, маха̄ра̄джа, йогина̄ йога̄вачарена паччавеккхитва̄ паччавеккхитва̄ аджджхоха̄рам̣ аджджхохаритаббам̣ ‘нева дава̄йа на мада̄йа на ман̣д̣ана̄йа на вибхӯсана̄йа, йа̄вадева имасса ка̄йасса т̣хитийа̄ йа̄пана̄йа вихим̣сӯпаратийа̄ брахмачарийа̄нуггаха̄йа, ити пура̄н̣ан̃ча веданам̣ пат̣ихан̇кха̄ми наван̃ча веданам̣ на уппа̄десса̄ми, йа̄тра̄ ча ме бхависсати анаваджджата̄ ча пха̄сувиха̄ро ча̄’ти. идам̣, маха̄ра̄джа, куккут̣асса татийам̣ ан̇гам̣ гахетаббам̣. бха̄ситампетам̣, маха̄ра̄джа, бхагавата̄ дева̄тидевена –

‘‘‘канта̄ре путтамам̣сам̣ва, аккхассаббхан̃джанам̣ йатха̄;

евам̣ а̄хари а̄ха̄рам̣, йа̄панаттхамамуччхито’ти.

‘‘пуна чапарам̣, маха̄ра̄джа, куккут̣о сачаккхукопи раттим̣ андхо хоти. евамева кхо, маха̄ра̄джа, йогина̄ йога̄вачарена анандхенева андхена вийа бхавитаббам̣, аран̃н̃епи гочарага̄ме пин̣д̣а̄йа чарантенапи раджанӣйесу рӯпасаддагандхарасапхот̣т̣хаббадхаммесу андхена бадхирена мӯгена вийа бхавитаббам̣, на нимиттам̣ гахетаббам̣, на̄нубйан̃джанам̣ гахетаббам̣. идам̣, маха̄ра̄джа, куккут̣асса чатуттхам̣ ан̇гам̣ гахетаббам̣. бха̄ситампетам̣, маха̄ра̄джа, тхерена маха̄качча̄йанена –

‘чаккхума̄сса йатха̄ андхо, сотава̄ бадхиро йатха̄;

пан̃н̃ава̄сса [дживха̄васса (сӣ. пӣ.)] йатха̄ мӯго, балава̄ дуббалорива;

аттааттхе [атха аттхе (сӣ. пӣ.)] самуппанне, сайетха матаса̄йика’нти.

‘‘пуна чапарам̣, маха̄ра̄джа, куккут̣о лед̣д̣удан̣д̣алагул̣амуггарехи парипа̄тийантопи сакам̣ гехам̣ на виджахати. евамева кхо, маха̄ра̄джа, йогина̄ йога̄вачарена чӣваракаммам̣ каронтенапи навакаммам̣ каронтенапи ваттаппат̣иваттам̣ каронтенапи уддисантенапи уддиса̄пентенапи йонисо манасика̄ро на виджахитаббо, сакам̣ кхо панетам̣, маха̄ра̄джа, йогино гехам̣, йадидам̣ йонисо манасика̄ро. идам̣, маха̄ра̄джа, куккут̣асса пан̃чамам̣ ан̇гам̣ гахетаббам̣. бха̄ситампетам̣, маха̄ра̄джа, бхагавата̄ дева̄тидевена ‘ко ча, бхиккхаве, бхиккхуно гочаро сако петтико висайо? йадидам̣ чатта̄ро сатипат̣т̣ха̄на̄’ти. бха̄ситампетам̣, маха̄ра̄джа, тхерена са̄рипуттена дхаммасена̄патина̄пи –

‘‘‘йатха̄ суданто ма̄тан̇го, сакам̣ сон̣д̣ам̣ на маддати;

бхаккха̄бхаккхам̣ виджа̄на̄ти, аттано вуттикаппанам̣.

‘‘‘татхева буддхапуттена, аппаматтена ва̄ пана;

джинавачанам̣ на маддитаббам̣, манасика̄раваруттама’’’нти.

куккут̣ан̇гапан̃хо дутийо.

3. каландакан̇гапан̃хо

3. ‘‘бханте на̄гасена, ‘каландакасса екам̣ ан̇гам̣ гахетабба’нти йам̣ вадеси, катамам̣ там̣ екам̣ ан̇гам̣ гахетабба’’нти? ‘‘йатха̄, маха̄ра̄джа, каландако пат̣исаттумхи опатанте нан̇гут̣т̣хам̣ паппхот̣етва̄ махантам̣ катва̄ тенева нан̇гут̣т̣халагул̣ена пат̣исаттум̣ пат̣иба̄хати, евамева кхо, маха̄ра̄джа, йогина̄ йога̄вачарена килесасаттумхи опатанте сатипат̣т̣ха̄налагул̣ам̣ паппхот̣етва̄ махантам̣ катва̄ тенева сатипат̣т̣ха̄налагул̣ена саббакилеса̄ пат̣иба̄хитабба̄. идам̣, маха̄ра̄джа, каландакасса екам̣ ан̇гам̣ гахетаббам̣. бха̄ситампетам̣, маха̄ра̄джа, тхерена чӯл̣апантхакена –

‘йада̄ килеса̄ опатанти, са̄ман̃н̃агун̣адхам̣сана̄;

сатипат̣т̣ха̄налагул̣ена, хантабба̄ те пунаппуна’’’нти.

каландакан̇гапан̃хо татийо.

4. дӣпинийан̇гапан̃хо

4. ‘‘бханте на̄гасена, ‘дӣпинийа̄ екам̣ ан̇гам̣ гахетабба’нти йам̣ вадеси, катамам̣ там̣ екам̣ ан̇гам̣ гахетабба’’нти? ‘‘йатха̄, маха̄ра̄джа, дӣпинӣ саким̣ йева габбхам̣ ган̣ха̄ти, на пунаппунам̣ пурисам̣ упети? евамева кхо, маха̄ра̄джа, йогина̄ йога̄вачарена а̄йатим̣ пат̣исандхим̣ уппаттим̣ габбхасеййам̣ чутим̣ бхедам̣ кхайам̣ вина̄сам̣ сам̣са̄рабхайам̣ дуггатим̣ висамам̣ сампӣл̣итам̣ дисва̄ ‘пунаббхаве наппат̣исандахисса̄мӣ’ти йонисо манасика̄ро каран̣ӣйо. идам̣, маха̄ра̄джа, дӣпинийа̄ екам̣ ан̇гам̣ гахетаббам̣. бха̄ситампетам̣, маха̄ра̄джа, бхагавата̄ дева̄тидевена суттанипа̄те дханийагопа̄лакасутте –

‘‘‘усабхорива чхетва бандхана̄ни, на̄го пӯтилатам̣ва да̄лайитва̄;

на̄хам̣ пунупессам̣ габбхасеййам̣, атха че паттхайасӣ павасса дева̄’’’ти.

дӣпинийан̇гапан̃хо чатуттхо.

5. дӣпикан̇гапан̃хо

5. ‘‘бханте на̄гасена, ‘дӣпикасса две ан̇га̄ни гахетабба̄нӣ’ти йам̣ вадеси, катама̄ни та̄ни две ан̇га̄ни гахетабба̄нӣ’’ти? ‘‘йатха̄, маха̄ра̄джа, дӣпико аран̃н̃е тин̣агаханам̣ ва̄ ванагаханам̣ ва̄ паббатагаханам̣ ва̄ нисса̄йа нилӣйитва̄ миге ган̣ха̄ти, евамева кхо, маха̄ра̄джа, йогина̄ йога̄вачарена вивекам̣ севитаббам̣ аран̃н̃ам̣ руккхамӯлам̣ паббатам̣ кандарам̣ гиригухам̣ суса̄нам̣ ванапаттхам̣ аббхока̄сам̣ пала̄лапун̃джам̣ аппасаддам̣ аппаниггхосам̣ виджанава̄там̣ мануссара̄хасеййакам̣ пат̣исалла̄наса̄руппам̣; вивекам̣ севама̄но хи, маха̄ра̄джа, йогӣ йога̄вачаро начирассева чхал̣абхин̃н̃а̄су ча васибха̄вам̣ па̄пун̣а̄ти. идам̣, маха̄ра̄джа, дӣпикасса пат̣хамам̣ ан̇гам̣ гахетаббам̣. бха̄ситампетам̣, маха̄ра̄джа, тхерехи дхаммасан̇га̄хакехи –

‘‘‘йатха̄пи дӣпико на̄ма, нилӣйитва̄ ган̣хате [ган̣хатӣ (сӣ. пӣ.)] миге;

татхева̄йам̣ буддхапутто, йуттайого випассако;

аран̃н̃ам̣ пависитва̄на, ган̣ха̄ти пхаламуттама’нти.

‘‘пуна чапарам̣, маха̄ра̄джа, дӣпико йам̣ кин̃чи пасум̣ вадхитва̄ ва̄мена пассена патитам̣ на бхаккхети. евамева кхо, маха̄ра̄джа, йогина̄ йога̄вачарена вел̣уда̄нена ва̄ паттада̄нена ва̄ пуппхада̄нена ва̄ пхалада̄нена ва̄ сина̄нада̄нена ва̄ маттика̄да̄нена ва̄ чун̣н̣ада̄нена ва̄ дантакат̣т̣хада̄нена ва̄ мукходакада̄нена ва̄ ча̄тукамйата̄йа ва̄ муггасупйата̄йа [муггасуппата̄йа (сӣ. пӣ.)] ва̄ па̄рибхат̣а [па̄рибхат̣т̣ата̄йа (сӣ. пӣ.)] йата̄йа ва̄ джан̇гхапесанӣйена ва̄ веджджакаммена ва̄ дӯтакаммена ва̄ пахин̣агаманена ва̄ пин̣д̣апат̣ипин̣д̣ена ва̄ да̄на̄нуппада̄нена ва̄ ваттхувиджджа̄йа ва̄ наккхаттавиджджа̄йа ва̄ ан̇гавиджджа̄йа [нагавиджджа̄йа (ка.)] ва̄ ан̃н̃атаран̃н̃атарена ва̄ буддхаппат̣икут̣т̣хена миччха̄джӣвена ниппха̄дитам̣ бходжанам̣ на бхун̃джитаббам̣ [парибхун̃джитаббам̣ (сӣ. пӣ.)] ва̄мена пассена патитам̣ пасум̣ вийа дӣпико. идам̣, маха̄ра̄джа, дӣпикасса дутийам̣ ан̇гам̣ гахетаббам̣. бха̄ситампетам̣, маха̄ра̄джа, тхерена са̄рипуттена дхаммасена̄патина̄ –

‘‘‘вачӣвин̃н̃аттивиппха̄ра̄, уппаннам̣ мадхупа̄йасам̣;

саче бхутто бхавеййа̄хам̣, са̄джӣво гарахито мама.

‘‘‘йадипи ме антагун̣ам̣, никкхамитва̄ бахӣ чаре;

нева бхиндеййама̄джӣвам̣, чаджама̄нопи джӣвита’’’нти.

дӣпикан̇гапан̃хо пан̃чамо.

6. кумман̇гапан̃хо

6. ‘‘бханте на̄гасена, ‘куммасса пан̃ча ан̇га̄ни гахетабба̄нӣ’ти йам̣ вадеси, катама̄ни та̄ни пан̃ча ан̇га̄ни гахетабба̄нӣ’’ти? ‘‘йатха̄, маха̄ра̄джа, куммо удакачаро удакейева ва̄сам̣ каппети, евамева кхо, маха̄ра̄джа, йогина̄ йога̄вачарена саббапа̄н̣абхӯтапуггала̄нам̣ хита̄нукампина̄ метта̄сахагатена четаса̄ випулена махаггатена аппама̄н̣ена аверена абйа̄паджджена сабба̄вантам̣ локам̣ пхаритва̄ вихаритаббам̣. идам̣, маха̄ра̄джа, куммасса пат̣хамам̣ ан̇гам̣ гахетаббам̣.

‘‘пуна чапарам̣, маха̄ра̄джа, куммо удаке уппилаванто сӣсам̣ уккхипитва̄ йади кочи пассати, таттхева нимуджджати га̄л̣хамога̄хати ‘ма̄ мам̣ те пуна пассеййу’нти, евамева кхо, маха̄ра̄джа, йогина̄ йога̄вачарена килесесу опатантесу а̄рамман̣асаре нимуджджитаббам̣ га̄л̣хамога̄хитаббам̣ ‘ма̄ мам̣ килеса̄ пуна пассеййу’нти. идам̣, маха̄ра̄джа, куммасса дутийам̣ ан̇гам̣ гахетаббам̣.

‘‘пуна чапарам̣, маха̄ра̄джа, куммо удакато никкхамитва̄ ка̄йам̣ ота̄пети, евамева кхо, маха̄ра̄джа, йогина̄ йога̄вачарена нисаджджат̣т̣ха̄насайаначан̇камато ма̄насам̣ нӣхаритва̄ саммаппадха̄не ма̄насам̣ ота̄петаббам̣. идам̣, маха̄ра̄джа, куммасса татийам̣ ан̇гам̣ гахетаббам̣.

‘‘пуна чапарам̣, маха̄ра̄джа, куммо патхавим̣ кхан̣итва̄ вивитте ва̄сам̣ каппети, евамева кхо, маха̄ра̄джа, йогина̄ йога̄вачарена ла̄бхасакка̄расилокам̣ паджахитва̄ сун̃н̃ам̣ вивиттам̣ ка̄нанам̣ ванапаттхам̣ паббатам̣ кандарам̣ гиригухам̣ аппасаддам̣ аппаниггхосам̣ павивиттамога̄хитва̄ вивитте йева ва̄сам̣ упагантаббам̣. идам̣, маха̄ра̄джа, куммасса чатуттхам̣ ан̇гам̣ гахетаббам̣. бха̄ситампетам̣, маха̄ра̄джа, тхерена упасенена ван̇гантапуттена –

‘‘‘вивиттам̣ аппаниггхосам̣, ва̄л̣амиганисевитам̣;

севе сена̄санам̣ бхиккху, пат̣исалла̄нака̄ран̣а̄’ти.

‘‘пуна чапарам̣, маха̄ра̄джа, куммо ча̄рикам̣ чарама̄но йади кан̃чи пассати ва̄, саддам̣ сун̣а̄ти ва̄, сон̣д̣ипан̃чама̄ни ан̇га̄ни саке капа̄ле нидахитва̄ аппоссукко тун̣хӣбхӯто тит̣т̣хати ка̄йаманураккханто, евамева кхо, маха̄ра̄джа, йогина̄ йога̄вачарена саббаттха рӯпасаддагандхарасапхот̣т̣хаббадхаммесу а̄патантесу чхасу два̄ресу сам̣варакава̄т̣ам̣ ануггха̄т̣етва̄ ма̄насам̣ самодахитва̄ сам̣варам̣ катва̄ сатена сампаджа̄нена виха̄таббам̣ саман̣адхаммам̣ анураккхама̄нена. идам̣, маха̄ра̄джа, куммасса пан̃чамам̣ ан̇гам̣ гахетаббам̣. бха̄ситампетам̣, маха̄ра̄джа, бхагавата̄ дева̄тидевена сам̣йуттаника̄йаваре куммӯпамасуттанте –

‘‘‘куммова ан̇га̄ни саке капа̄ле, самодахам̣ бхиккху мановитакке;

аниссито ан̃н̃амахет̣хайа̄но, париниббутонӯпавадеййа кан̃чӣ’’’ти.

кумман̇гапан̃хо чхат̣т̣хо.

7. вам̣сан̇гапан̃хо

7. ‘‘бханте на̄гасена, ‘вам̣сасса екам̣ ан̇гам̣ гахетабба’нти йам̣ вадеси, катамам̣ там̣ екам̣ ан̇гам̣ гахетабба’’нти? ‘‘йатха̄, маха̄ра̄джа, вам̣со йаттха ва̄то, таттха ануломети, на̄н̃н̃аттхаманудха̄вати, евамева кхо, маха̄ра̄джа, йогина̄ йога̄вачарена йам̣ буддхена бхагавата̄ бха̄ситам̣ наван̇гам̣ саттху са̄санам̣, там̣ ануломайитва̄ каппийе анавадждже т̣хатва̄ саман̣адхаммам̣ йева парийеситаббам̣. идам̣, маха̄ра̄джа, вам̣сасса екам̣ ан̇гам̣ гахетаббам̣. бха̄ситампетам̣ маха̄ра̄джа тхерена ра̄хулена –

‘‘‘наван̇гам̣ буддхавачанам̣, анулометва̄на саббада̄;

каппийе анаваджджасмим̣, т̣хатва̄па̄йам̣ самуттари’’’нти.

вам̣сан̇гапан̃хо саттамо.

8. ча̄пан̇гапан̃хо

8. ‘‘бханте на̄гасена, ‘ча̄пасса екам̣ ан̇гам̣ гахетабба’нти йам̣ вадеси, катамам̣ там̣ екам̣ ан̇гам̣ гахетабба’’нти? ‘‘йатха̄, маха̄ра̄джа, ча̄по сутаччхито намито [мито (сӣ. пӣ. ка.)] йа̄ваггамӯлам̣ самакамева анунамати наппат̣иттхамбхати, евамева кхо, маха̄ра̄джа, йогина̄ йога̄вачарена тхеранавамаджджхимасамакесу анунамитаббам̣ наппат̣ипхаритаббам̣. идам̣, маха̄ра̄джа, ча̄пасса екам̣ ан̇гам̣ гахетаббам̣. бха̄ситампетам̣, маха̄ра̄джа, бхагавата̄ дева̄тидевена видхура [пун̣н̣ака] джа̄таке –

‘‘‘ча̄повӯнударо дхӣро, вам̣со ва̄пи пакампайе [ча̄по ва̄ нуна ме дхӣро, вам̣сова ануломайам̣ (сӣ. пӣ. ка.)];

пат̣иломам̣ на ваттеййа, са ра̄джавасатим̣ васе’’’ти.

ча̄пан̇гапан̃хо ат̣т̣хамо.

9. ва̄йасан̇гапан̃хо

9. ‘‘бханте на̄гасена, ‘ва̄йасасса две ан̇га̄ни гахетабба̄нӣ’ти йам̣ вадеси, катама̄ни та̄ни две ан̇га̄ни гахетабба̄нӣ’’ти? ‘‘йатха̄, маха̄ра̄джа, ва̄йасо а̄сан̇китапарисан̇кито йаттаппайатто чарати, евамева кхо, маха̄ра̄джа, йогина̄ йога̄вачарена а̄сан̇китапарисан̇китена йаттапайаттена упат̣т̣хита̄йа сатийа̄ сам̣вутехи индрийехи чаритаббам̣. идам̣, маха̄ра̄джа, ва̄йасасса пат̣хамам̣ ан̇гам̣ гахетаббам̣.

‘‘пуна чапарам̣, маха̄ра̄джа, ва̄йасо йам̣ кин̃чи бходжанам̣ дисва̄ н̃а̄тӣхи сам̣вибхаджитва̄ бхун̃джати, евамева кхо, маха̄ра̄джа, йогина̄ йога̄вачарена йе те ла̄бха̄ дхаммика̄ дхаммаладдха̄ антамасо паттапарийа̄паннаматтампи, татха̄рӯпехи ла̄бхехи пат̣ивибхаттабхогина̄ бхавитаббам̣ сӣлавантехи сабрахмача̄рӣхи. идам̣, маха̄ра̄джа, ва̄йасасса дутийам̣ ан̇гам̣ гахетаббам̣. бха̄ситампетам̣, маха̄ра̄джа, тхерена са̄рипуттена дхаммасена̄патина̄ –

‘‘‘саче ме упана̄менти, йатха̄ладдхам̣ тапассино;

саббе сам̣вибхаджитва̄на, тато бхун̃джа̄ми бходжана’’’нти.

ва̄йасан̇гапан̃хо навамо.

10. маккат̣ан̇гапан̃хо

10. ‘‘бханте на̄гасена, ‘маккат̣асса две ан̇га̄ни гахетабба̄нӣ’ти йам̣ вадеси, катама̄ни та̄ни две ан̇га̄ни гахетабба̄нӣ’’ти? ‘‘йатха̄, маха̄ра̄джа, маккат̣о ва̄самупагаччханто татха̄рӯпе ока̄се махатимаха̄руккхе павивитте саббат̣т̣хакаса̄кхе [саббаттхакаса̄кхе (сйа̄.), саббат̣т̣хаса̄кхе (ка.)] бхӣрутта̄н̣е ва̄самупагаччхати, евамева кхо, маха̄ра̄джа, йогина̄ йога̄вачарена ладжджим̣ песалам̣ сӣлавантам̣ калйа̄н̣адхаммам̣ бахуссутам̣ дхаммадхарам̣ винайадхарам̣ пийам̣ гарубха̄ванӣйам̣ ватта̄рам̣ вачанаккхамам̣ ова̄дакам̣ вин̃н̃а̄пакам̣ сандассакам̣ сама̄дапакам̣ самуттеджакам̣ сампахам̣сакам̣ еварӯпам̣ калйа̄н̣амиттам̣ а̄чарийам̣ нисса̄йа вихаритаббам̣. идам̣, маха̄ра̄джа, маккат̣асса пат̣хамам̣ ан̇гам̣ гахетаббам̣.

‘‘пуна чапарам̣, маха̄ра̄джа, маккат̣о руккхе йева чарати тит̣т̣хати нисӣдати, йади ниддам̣ оккамати, таттхева раттим̣ ва̄саманубхавати. евамева кхо, маха̄ра̄джа, йогина̄ йога̄вачарена павана̄бхимукхена бхавитаббам̣, паване йева т̣ха̄начан̇каманисаджджа̄сайанам̣ ниддам̣ оккамитаббам̣, таттхева сатипат̣т̣ха̄наманубхавитаббам̣. идам̣, маха̄ра̄джа, маккат̣асса дутийам̣ ан̇гам̣ гахетаббам̣. бха̄ситампетам̣, маха̄ра̄джа, тхерена са̄рипуттена дхаммасена̄патина̄ –

‘‘‘чан̇камантопи тит̣т̣ханто, нисаджджа̄сайанена ва̄;

паване собхате бхиккху, паванантам̣ва ван̣н̣ита’’’нти.

маккат̣ан̇гапан̃хо дасамо.

гадрабхавагго пат̣хамо.

тассудда̄нам̣ –

гадрабхо чева [гхорассаро ча (сӣ. сйа̄. пӣ.)] куккут̣о, каландо дӣпини дӣпико;

куммо вам̣со ча ча̄по ча, ва̄йасо атха маккат̣оти.