7. четийапа̄т̣иха̄рийапан̃хо

7. ‘‘бханте на̄гасена, саббесам̣ париниббута̄нам̣ четийе па̄т̣ихӣрам̣ хоти, уда̄ху екачча̄нам̣ йева хотӣ’’ти? ‘‘екачча̄нам̣, маха̄ра̄джа, хоти, екачча̄нам̣ на хотӣ’’ти. ‘‘катамесам̣, бханте, хоти, катамесам̣ на хотӣ’’ти? ‘‘тин̣н̣аннам̣, маха̄ра̄джа, ан̃н̃атарасса адхит̣т̣ха̄на̄ париниббутасса четийе па̄т̣ихӣрам̣ хоти. катамесам̣ тин̣н̣аннам̣? идха, маха̄ра̄джа, араха̄ деваманусса̄нам̣ анукампа̄йа тит̣т̣хантова адхит̣т̣ха̄ти ‘евам̣на̄ма четийе па̄т̣ихӣрам̣ хотӯ’ти, тасса адхит̣т̣ха̄навасена четийе па̄т̣ихӣрам̣ хоти, евам̣ арахато адхит̣т̣ха̄навасена париниббутасса четийе па̄т̣ихӣрам̣ хоти.

‘‘пуна чапарам̣, маха̄ра̄джа, девата̄ манусса̄нам̣ анукампа̄йа париниббутасса четийе па̄т̣ихӣрам̣ дассенти ‘имина̄ па̄т̣ихӣрена саддхаммо ниччасампаггахито бхависсати, манусса̄ ча пасанна̄ кусалена абхивад̣д̣хиссантӣ’ти, евам̣ девата̄нам̣ адхит̣т̣ха̄навасена париниббутасса четийе па̄т̣ихӣрам̣ хоти.

‘‘пуна чапарам̣, маха̄ра̄джа, иттхӣ ва̄ пурисо ва̄ саддхо пасанно пан̣д̣ито бйатто медха̄вӣ буддхисампанно йонисо чинтайитва̄ гандхам̣ ва̄ ма̄лам̣ ва̄ дуссам̣ ва̄ ан̃н̃атарам̣ ва̄ кин̃чи адхит̣т̣хахитва̄ четийе уккхипати ‘евам̣на̄ма хотӯ’ти, тассапи адхит̣т̣ха̄навасена париниббутасса четийе па̄т̣ихӣрам̣ хоти, евам̣ манусса̄нам̣ адхит̣т̣ха̄навасена париниббутасса четийе па̄т̣ихӣрам̣ хоти.

‘‘имесам̣ кхо, маха̄ра̄джа, тин̣н̣аннам̣ ан̃н̃атарасса адхит̣т̣ха̄навасена париниббутасса четийе па̄т̣ихӣрам̣ хоти.

‘‘йади, маха̄ра̄джа, тесам̣ адхит̣т̣ха̄нам̣ на хоти, кхӣн̣а̄савассапи чхал̣абхин̃н̃асса четовасиппаттасса четийе па̄т̣ихӣрам̣ на хоти, асатипи, маха̄ра̄джа, па̄т̣ихӣре чаритам̣ дисва̄ супарисуддхам̣ окаппетаббам̣ нит̣т̣хам̣ гантаббам̣ саддахитаббам̣ ‘супариниббуто айам̣ буддхапутто’’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

четийапа̄т̣иха̄рийапан̃хо саттамо.