7. абхисамайантара̄йакарапан̃хо

7. ‘‘бханте на̄гасена, идха йо кочи гихӣ па̄ра̄джикам̣ аджджха̄панно бхавеййа, со апарена самайена пабба̄джеййа, аттана̄пи со на джа̄неййа ‘гихипа̄ра̄джикам̣ аджджха̄панносмӣ’ти, напи тасса ан̃н̃о кочи а̄чиккхеййа ‘гихипа̄ра̄джикам̣ аджджха̄панносӣ’ти. со ча татхатта̄йа пат̣ипаджджеййа, апи ну тасса дхамма̄бхисамайо бхавеййа̄’’ти? ‘‘на хи, маха̄ра̄джа̄’’ти. ‘‘кена, бханте, ка̄ран̣ена̄’’ти? ‘‘йо тасса хету дхамма̄бхисамайа̄йа, со тасса самуччхинно, тасма̄ дхамма̄бхисамайо на бхаватӣ’’ти.

‘‘бханте на̄гасена, тумхе бхан̣атха ‘джа̄нантасса куккуччам̣ хоти, куккучче сати а̄варан̣ам̣ хоти, а̄ват̣е читте дхамма̄бхисамайо на хотӣ’ти. имасса пана аджа̄нантасса акуккуччаджа̄тасса сантачиттасса вихарато кена ка̄ран̣ена дхамма̄бхисамайо на хоти, висамена висаменесо пан̃хо гаччхати, чинтетва̄ висаджджетха̄’’ти.

‘‘рухати, маха̄ра̄джа, сукат̣т̣хе сукалале ман̣д̣акхетте са̄радам̣ сукхасайитам̣ бӣджа’’нти? ‘‘а̄ма, бханте’’ти. ‘‘апи ну, маха̄ра̄джа, тан̃н̃ева бӣджам̣ гханаселасила̄тале рухеййа̄’’ти? ‘‘на хи, бханте’’ти. ‘‘кисса пана, маха̄ра̄джа, тан̃н̃ева бӣджам̣ калале рухати, кисса гханаселе на рухатӣ’’ти? ‘‘наттхи, бханте, тасса бӣджасса рухана̄йа гханаселе хету, ахетуна̄ бӣджам̣ на рухатӣ’’ти. ‘‘евамева кхо, маха̄ра̄джа, йена хетуна̄ тасса дхамма̄бхисамайо бхавеййа, со тасса хету самуччхинно, ахетуна̄ дхамма̄бхисамайо на хоти.

‘‘йатха̄ ва̄ пана, маха̄ра̄джа, дан̣д̣алед̣д̣улагул̣амуггара̄ патхавийа̄ т̣ха̄намупагаччханти, апи ну, маха̄ра̄джа, те йева дан̣д̣алед̣д̣улагул̣амуггара̄ гагане т̣ха̄намупагаччхантӣ’’ти? ‘‘на хи бханте’’ти. ‘‘ким̣ панеттха, маха̄ра̄джа, ка̄ран̣ам̣, йена ка̄ран̣ена те йева дан̣д̣алед̣д̣улагул̣амуггара̄ патхавийа̄ т̣ха̄намупагаччханти, кена ка̄ран̣ена гагане на тит̣т̣хантӣ’’ти? ‘‘наттхи, бханте, тесам̣ дан̣д̣алед̣д̣улагул̣амуггара̄нам̣ патит̣т̣ха̄на̄йа а̄ка̄се хету, ахетуна̄ на тит̣т̣хантӣ’’ти. ‘‘евамева кхо, маха̄ра̄джа, тасса тена досена абхисамайахету самуччхинно, хетусамуггха̄те ахетуна̄ абхисамайо на хотӣти.

‘‘йатха̄ ва̄ пана, маха̄ра̄джа, тхале агги джалати, апи ну кхо, маха̄ра̄джа, со йева агги удаке джалатӣ’’ти? ‘‘на хи, бханте’’ти. ‘‘ким̣ панеттха, маха̄ра̄джа, ка̄ран̣ам̣, йена ка̄ран̣ена со йева агги тхале джалати, кена ка̄ран̣ена удаке на джалатӣ’’ти? ‘‘наттхи, бханте, аггисса джалана̄йа удаке хету, ахетуна̄ на джалатӣ’’ти. ‘‘евамева кхо, маха̄ра̄джа, тасса тена досена абхисамайахету самуччхинно, хетусамуггха̄те ахетуна̄ дхамма̄бхисамайо на хотӣ’’ти.

‘‘бханте на̄гасена, пунапетам̣ аттхам̣ чинтехи, на ме таттха читтасан̃н̃атти бхавати, аджа̄нантасса асати куккучче а̄варан̣ам̣ хотӣти, ка̄ран̣ена мам̣ сан̃н̃а̄пехӣ’’ти. ‘‘апи ну, маха̄ра̄джа, висам̣ хала̄халам̣ аджа̄нантена кха̄йитам̣ джӣвитам̣ харатӣ’’ти? ‘‘а̄ма, бханте’’ти. ‘‘евамева кхо, маха̄ра̄джа, аджа̄нантенапи катам̣ па̄пам̣ абхисамайантара̄йакарам̣ хоти.

‘‘апи ну, маха̄ра̄джа, агги аджа̄нитва̄ аккамантам̣ д̣ахатӣ’’ти? ‘‘а̄ма, бханте’’ти. ‘‘евамева кхо, маха̄ра̄джа, аджа̄нантенапи катам̣ па̄пам̣ абхисамайантара̄йакарам̣ хоти.

‘‘апи ну, маха̄ра̄джа, аджа̄нантам̣ а̄сӣвисо д̣ам̣ситва̄ джӣвитам̣ харатӣ’’ти? ‘‘а̄ма, бханте’’ти. ‘‘евамева кхо, маха̄ра̄джа, аджа̄нантенапи катам̣ па̄пам̣ абхисамайантара̄йакарам̣ хоти.

‘‘нану, маха̄ра̄джа, ка̄лин̇гара̄джа̄ саман̣аколан̃н̃о саттаратанапарикин̣н̣о хаттхиратанамабхируйха куладассана̄йа гаччханто аджа̄нантопи на̄саккхи бодхиман̣д̣асса упарито гантум̣, идаметтха, маха̄ра̄джа, ка̄ран̣ам̣, йена ка̄ран̣ена аджа̄нантенапи катам̣ па̄пам̣ абхисамайантара̄йакарам̣ хотӣ’’ти? ‘‘джинабха̄ситам̣, бханте на̄гасена, ка̄ран̣ам̣ на сакка̄ пат̣иккоситум̣, есоветасса аттхо татха̄ сампат̣иччха̄мӣ’’ти.

абхисамайантара̄йакарапан̃хо саттамо.