1. сантхавапан̃хо

1. ‘‘бханте на̄гасена, бха̄ситампетам̣ бхагавата̄ –

‘‘‘сантхавато бхайам̣ джа̄там̣, никета̄ джа̄йате раджо;

аникетамасантхавам̣, етам̣ ве мунидассана’нти.

‘‘пуна ча бхагавата̄ бхан̣итам̣ ‘виха̄ре ка̄райе рамме, ва̄сайеттха бахуссуте’ти. йади, бханте на̄гасена, татха̄гатена бхан̣итам̣ ‘сантхавато бхайам̣ джа̄там̣, никета̄ джа̄йате раджо. аникетамасантхавам̣, етам̣ ве мунидассана’нти, тена хи ‘виха̄ре ка̄райе рамме, ва̄сайеттха бахуссуте’ти йам̣ вачанам̣, там̣ миччха̄. йади татха̄гатена бхан̣итам̣ ‘виха̄ре ка̄райе рамме, ва̄сайеттха бахуссуте’ти, тена хи ‘сантхавато бхайам̣ джа̄там̣, никета̄ джа̄йате раджо. аникетамасантхавам̣, етам̣ ве мунидассана’нти тампи вачанам̣ миччха̄. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘сантхавато бхайам̣ джа̄там̣, никета̄ джа̄йате раджо. аникетамасантхавам̣, етам̣ ве мунидассана’нти. бхан̣итан̃ча ‘виха̄ре ка̄райе рамме, ва̄сайеттха бахуссуте’ти. йам̣, маха̄ра̄джа, бхагавата̄ бхан̣итам̣ ‘сантхавато бхайам̣ джа̄там̣, никета̄ джа̄йате раджо. аникетамасантхавам̣, етам̣ ве мунидассана’нти, там̣ сабха̄вавачанам̣ асесавачанам̣ ниссесавачанам̣ ниппарийа̄йавачанам̣ саман̣а̄нуччхавам̣ саман̣аса̄руппам̣ саман̣аппатирӯпам̣ саман̣а̄рахам̣ саман̣агочарам̣ саман̣аппат̣ипада̄ саман̣аппат̣ипатти. йатха̄, маха̄ра̄джа, а̄ран̃н̃ако миго аран̃н̃е паване чарама̄но нира̄лайо аникето йатхиччхакам̣ сайати, евамева кхо, маха̄ра̄джа, бхиккхуна̄ ‘сантхавато бхайам̣ джа̄там̣, никета̄ джа̄йате раджо. аникетамасантхавам̣, етам̣ ве мунидассана’нти чинтетаббам̣.

‘‘йам̣ пана, маха̄ра̄джа, бхагавата̄ бхан̣итам̣ ‘виха̄ре ка̄райе рамме, ва̄сайеттха бахуссуте’ти, там̣ две аттхавасе сампассама̄нена бхагавата̄ бхан̣итам̣. катаме две? виха̄рада̄нам̣ на̄ма саббабуддхехи ван̣н̣итам̣ ануматам̣ тхомитам̣ пасаттхам̣, там̣ те виха̄рада̄нам̣ датва̄ джа̄тиджара̄маран̣а̄ паримуччиссантӣти. айам̣ та̄ва пат̣хамо а̄нисам̣со виха̄рада̄не.

‘‘пуна чапарам̣ виха̄ре виджджама̄не бхиккхунийо бйаттасан̇кета̄ бхависсанти, сулабхам̣ дассанам̣ дассанака̄ма̄нам̣, аникете дуддассана̄ бхависсантӣти. айам̣ дутийо а̄нисам̣со виха̄рада̄не. име две аттхавасе сампассама̄нена бхагавата̄ бхан̣итам̣ ‘виха̄ре ка̄райе рамме, ва̄сайеттха бахуссуте’ти, на таттха буддхапуттена а̄лайо каран̣ӣйо никете’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

сантхавапан̃хо пат̣хамо.