9. арахантаабха̄йанапан̃хо

9. ‘‘бханте на̄гасена, бха̄ситампетам̣ бхагавата̄ ‘вигатабхайасанта̄са̄ араханто’ти. пуна ча нагаре ра̄джагахе дханапа̄лакам̣ хаттхим̣ бхагавати опатантам̣ дисва̄ пан̃ча кхӣн̣а̄савасата̄ни париччаджитва̄ джинаварам̣ пакканта̄ни диса̄видисам̣ екам̣ т̣хапетва̄ тхерам̣ а̄нандам̣. ким̣ ну кхо, бханте на̄гасена, те араханто бхайа̄ пакканта̄, пан̃н̃а̄йиссати сакена каммена̄ти дасабалам̣ па̄тетука̄ма̄ пакканта̄, уда̄ху татха̄гатасса атулам̣ випуламасамам̣ па̄т̣иха̄рийам̣ дат̣т̣хука̄ма̄ пакканта̄? йади, бханте на̄гасена, бхагавата̄ бхан̣итам̣ ‘вигатабхайасанта̄са̄ араханто’ти, тена хи ‘нагаре…пе… а̄нанда’нти йам̣ вачанам̣ там̣ миччха̄. йади нагаре ра̄джагахе дханапа̄лакам̣ хаттхим̣ бхагавати опатантам̣ дисва̄ пан̃ча кхӣн̣а̄савасата̄ни париччаджитва̄ джинаварам̣ пакканта̄ни диса̄видисам̣ екам̣ т̣хапетва̄ тхерам̣ а̄нандам̣, тена хи ‘вигатабхайасанта̄са̄ араханто’ти тампи вачанам̣ миччха̄. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘бха̄ситампетам̣, маха̄ра̄джа, бхагавата̄ ‘вигатабхайасанта̄са̄ араханто’ти, нагаре ра̄джагахе дханапа̄лакам̣ хаттхим̣ бхагавати опатантам̣ дисва̄ пан̃ча кхӣн̣а̄савасата̄ни париччаджитва̄ джинаварам̣ пакканта̄ни диса̄видисам̣ екам̣ т̣хапетва̄ тхерам̣ а̄нандам̣, тан̃ча пана на бхайа̄, на̄пи бхагавантам̣ па̄тетука̄мата̄йа.

‘‘йена пана, маха̄ра̄джа, хетуна̄ араханто бха̄йеййум̣ ва̄ та̄сеййум̣ ва̄, со хету араханта̄нам̣ самуччхинно, тасма̄ вигатабхайасанта̄са̄ араханто, бха̄йати ну, маха̄ра̄джа, маха̄патхавӣ кхан̣антепи бхиндантепи дха̄рентепи самуддапаббатагирисикхарети? ‘‘на хи, бханте’’ти. ‘‘кена ка̄ран̣ена маха̄ра̄джа̄’’ти? ‘‘наттхи, бханте, маха̄патхавийа̄ со хету, йена хетуна̄ маха̄патхавӣ бха̄йеййа ва̄ та̄сеййа ва̄’’ти. ‘‘евамева кхо, маха̄ра̄джа, наттхи араханта̄нам̣ со хету, йена хетуна̄ араханто бха̄йеййум̣ ва̄ та̄сеййум̣ ва̄.

‘‘бха̄йати ну, маха̄ра̄джа, гирисикхарам̣ чхинданте ва̄ бхинданте ва̄ патанте ва̄ аггина̄ даханте ва̄’’ти? ‘‘на хи, бханте’’ти. ‘‘кена ка̄ран̣ена маха̄ра̄джа̄’’ти? ‘‘наттхи, бханте, гирисикхарасса со хету, йена хетуна̄ гирисикхарам̣ бха̄йеййа ва̄ та̄сеййа ва̄’’ти. ‘‘евамева кхо, маха̄ра̄джа, наттхи араханта̄нам̣ со хету, йена хетуна̄ араханто бха̄йеййум̣ ва̄ та̄сеййум̣ ва̄.

‘‘йадипи, маха̄ра̄джа, локадха̄тусатасахассесу йе кечи саттаника̄йапарийа̄панна̄ саббепи те саттихаттха̄ екам̣ арахантам̣ упадха̄витва̄ та̄сеййум̣, на бхавеййа арахато читтасса кин̃чи ан̃н̃атхаттам̣. ким̣ ка̄ран̣ам̣? ат̣т̣ха̄наманавака̄сата̄йа.

‘‘апи ча, маха̄ра̄джа, тесам̣ кхӣн̣а̄сава̄нам̣ евам̣ четопаривитакко ахоси ‘аджджа нараварапаваре джинаваравасабхе нагараварамануппавит̣т̣хе вӣтхийа̄ дханапа̄лако хаттхӣ а̄патиссати, асам̣сайаматидевадевам̣ упат̣т̣ха̄ко на париччаджиссати, йади майам̣ саббепи бхагавантам̣ на париччаджисса̄ма, а̄нандасса гун̣о па̄кат̣о на бхависсати, на хева ча татха̄гатам̣ самупагамиссати хаттхина̄го, ханда майам̣ апагаччха̄ма, евамидам̣ махато джанака̄йасса килесабандханамоккхо бхависсати, а̄нандасса ча гун̣о па̄кат̣о бхависсатӣ’ти. евам̣ те араханто а̄нисам̣сам̣ дисва̄ диса̄видисам̣ пакканта̄’’ти. ‘‘сувибхатто, бханте на̄гасена, пан̃хо, еваметам̣ наттхи араханта̄нам̣ бхайам̣ ва̄ санта̄со ва̄, а̄нисам̣сам̣ дисва̄ араханто пакканта̄ диса̄видиса’’нти.

арахантаабха̄йанапан̃хо навамо.