4. бодхисаттадхаммата̄пан̃хо

4. ‘‘бханте на̄гасена, бха̄ситампетам̣ бхагавата̄ дхаммата̄дхаммапарийа̄йе ‘пуббева бодхисатта̄нам̣ ма̄та̄питаро нийата̄ хонти, бодхи нийата̄ хоти, аггаса̄вака̄ нийата̄ хонти, путто нийато хоти, упат̣т̣ха̄ко нийато хотӣ’ти. пуна ча тумхе бхан̣атха ‘тусите ка̄йе т̣хито бодхисатто ат̣т̣ха маха̄вилокана̄ни вилокети, ка̄лам̣ вилокети, дӣпам̣ вилокети, десам̣ вилокети, кулам̣ вилокети, джанеттим̣ вилокети, а̄йум̣ вилокети, ма̄сам̣ вилокети, неккхаммам̣ вилокетӣ’ти. бханте на̄гасена, апарипакке н̃а̄н̣е буджджханам̣ наттхи, парипакке н̃а̄н̣е на сакка̄ нимесантарампи а̄гаметум̣, анатиккаманӣйам̣ парипаккама̄насам̣. касма̄ бодхисатто ка̄лам̣ вилокехи ‘камхи ка̄ле уппаджджа̄мӣ’ти. апарипакке н̃а̄н̣е буджджханам̣ наттхи, парипакке н̃а̄н̣е на сакка̄ нимесантарампи а̄гаметум̣, касма̄ бодхисатто кулам̣ вилокети ‘кумхи куле уппаджджа̄мӣ’ти. йади, бханте на̄гасена, пуббева бодхисаттасса ма̄та̄питаро нийата̄, тена хи ‘кулам̣ вилокетӣ’ти йам̣ вачанам̣, там̣ миччха̄. йади кулам̣ вилокети, тена хи ‘пуббева бодхисаттасса ма̄та̄питаро нийата̄’ти тампи вачанам̣ миччха̄. айампи убхато кот̣ико пан̃хо тава̄нуппатто, со тайа̄ нибба̄хитаббо’’ти.

‘‘нийата̄, маха̄ра̄джа, пуббева бодхисаттасса ма̄та̄питаро, кулан̃ча бодхисатто вилокети. кинти пана кулам̣ вилокети ‘йе ме ма̄та̄питаро, те кхаттийа̄ уда̄ху бра̄хман̣а̄’ти. евам̣ кулам̣ вилокети.

‘‘ат̣т̣ханнам̣, маха̄ра̄джа, пуббева ана̄гатам̣ олокетаббам̣ хоти. катамесам̣ ат̣т̣ханнам̣? ва̄н̣иджасса, маха̄ра̄джа, пуббева виккайабхан̣д̣ам̣ олокетаббам̣ хоти, хаттхина̄гасса пуббева сон̣д̣а̄йа ана̄гато магго олокетаббо хоти, са̄кат̣икасса пуббева ана̄гатам̣ титтхам̣ олокетаббам̣ хоти, нийа̄макасса пуббева ана̄гатам̣ тӣрам̣ олокетва̄ на̄ва̄ песетабба̄ хоти, бхисаккасса пуббева а̄йум̣ олокетва̄ а̄туро упасан̇камитаббо хоти, уттарасетусса пуббева тхира̄тхирабха̄вам̣ джа̄нитва̄ абхирухитаббам̣ хоти, бхиккхусса пуббева ана̄гатам̣ ка̄лам̣ паччавеккхитва̄ бходжанам̣ бхун̃джитаббам̣ хоти, бодхисатта̄нам̣ пуббева кулам̣ олокетаббам̣ хоти ‘кхаттийакулам̣ ва̄ бра̄хман̣акулам̣ ва̄’ти. имесам̣ кхо, маха̄ра̄джа, ат̣т̣ханнам̣ пуббева ана̄гатам̣ олокетаббам̣ хотӣ’’ти. ‘‘са̄дху, бханте на̄гасена, еваметам̣ татха̄ сампат̣иччха̄мӣ’’ти.

бодхисаттадхаммата̄пан̃хо чатуттхо.