5. двиннам̣ локуппанна̄нам̣ самакабха̄вапан̃хо

5. ра̄джа̄ а̄ха ‘‘бханте на̄гасена, йо идха ка̄лан̇като брахмалоке уппаджджеййа, йо ча идха ка̄лан̇като касмӣре уппаджджеййа, ко чиратарам̣ ко сӣгхатара’’нти? ‘‘самакам̣, маха̄ра̄джа̄’’ти.

‘‘опаммам̣ карохӣ’’ти. ‘‘кухим̣ пана, маха̄ра̄джа, тава джа̄танагара’’нти? ‘‘аттхи, бханте, каласига̄мо на̄ма, таттха̄хам̣ джа̄то’’ти. ‘‘кӣва дӯро, маха̄ра̄джа, ито каласига̄мо хотӣ’’ти. ‘‘двиматта̄ни, бханте, йоджанасата̄нӣ’’ти. ‘‘кӣва дӯрам̣, маха̄ра̄джа, ито касмӣрам̣ хотӣ’’ти? ‘‘два̄даса, бханте, йоджана̄нӣ’’ти. ‘‘ин̇гха, твам̣ маха̄ра̄джа, каласига̄мам̣ чинтехӣ’’ти. ‘‘чинтито, бханте’’ти. ‘‘ин̇гха, твам̣ маха̄ра̄джа, касмӣрам̣ чинтехӣ’’ти. ‘‘чинтитам̣ бханте’’ти. ‘‘катамам̣ ну кхо, маха̄ра̄джа, чирена чинтитам̣, катамам̣ сӣгхатара’’нти? ‘‘самакам̣ бханте’’ти. ‘‘евамева кхо, маха̄ра̄джа, йо идха ка̄лан̇като брахмалоке уппаджджеййа, йо ча идха ка̄лан̇като касмӣре уппаджджеййа, самакам̣ йева уппаджджантӣ’’ти.

‘‘бхиййо опаммам̣ карохӣ’’ти. ‘‘там̣ ким̣ ман̃н̃аси, маха̄ра̄джа, две сакун̣а̄ а̄ка̄сена гаччхеййум̣, тесу еко учче руккхе нисӣдеййа, еко нӣче руккхе нисӣдеййа, тесам̣ самакам̣ патит̣т̣хита̄нам̣ катамасса чха̄йа̄ пат̣хаматарам̣ патхавийам̣ патит̣т̣хахеййа, катамасса чха̄йа̄ чирена патхавийам̣ патит̣т̣хахеййа̄’’ти? ‘‘самакам̣, бханте’’ти. ‘‘евамева кхо, маха̄ра̄джа, йо идха ка̄лан̇като брахмалоке уппаджджеййа, йо ча идха ка̄лан̇като касмӣре уппаджджеййа, самакам̣ йева уппаджджантӣ’’ти.

‘‘каллоси, бханте на̄гасена̄’’ти.

двиннам̣ локуппанна̄нам̣ самакабха̄вапан̃хо пан̃чамо.