1. сатиуппаджджанапан̃хо

1. ра̄джа̄ а̄ха ‘‘бханте на̄гасена, катиха̄ка̄рехи сати уппаджджатӣ’’ти? ‘‘саттарасаха̄ка̄рехи, маха̄ра̄джа, сати уппаджджатӣ’’ти. ‘‘катамехи саттарасаха̄ка̄рехӣ’’ти? ‘‘абхиджа̄натопи, маха̄ра̄джа, сати уппаджджати, кат̣умика̄йапи сати уппаджджати, ол̣а̄рикавин̃н̃а̄н̣атопи сати уппаджджати, хитавин̃н̃а̄н̣атопи сати уппаджджати, ахитавин̃н̃а̄н̣атопи сати уппаджджати, сабха̄ганимиттатопи сати уппаджджати, висабха̄ганимиттатопи сати уппаджджати, катха̄бхин̃н̃а̄н̣атопи сати уппаджджати, лаккхан̣атопи сати уппаджджати, са̄ран̣атопи сати уппаджджати, мудда̄топи сати уппаджджати, ган̣ана̄топи сати уппаджджати, дха̄ран̣атопи сати уппаджджати, бха̄ванатопи сати уппаджджати, поттхаканибандханатопи сати уппаджджати, упаниккхепатопи сати уппаджджати, анубхӯтатопи сати уппаджджатӣти.

‘‘катхам̣ абхиджа̄нато сати уппаджджати? йатха̄, маха̄ра̄джа, а̄йасма̄ ча а̄нандо кхуджджуттара̄ ча упа̄сика̄, йе ва̄ пана ан̃н̃епи кечи джа̄тиссара̄ джа̄тим̣ саранти, евам̣ абхиджа̄нато сати уппаджджати.

‘‘катхам̣ кат̣умика̄йа сати уппаджджати? йо пакатийа̄ мут̣т̣хассатико, паре ча там̣ сара̄панаттхам̣ нибандханти, евам̣ кат̣умика̄йа сати уппаджджати.

‘‘катхам̣ ол̣а̄рикавин̃н̃а̄н̣ато сати уппаджджати? йада̄ радждже ва̄ абхиситто хоти, сота̄паттипхалам̣ ва̄ патто хоти, евам̣ ол̣а̄рикавин̃н̃а̄н̣ато сати уппаджджати.

‘‘катхам̣ хитавин̃н̃а̄н̣ато сати уппаджджати? йамхи сукха̄пито, ‘амукасмим̣ евам̣ сукха̄пито’ти сарати, евам̣ хитавин̃н̃а̄н̣ато сати уппаджджати.

‘‘катхам̣ ахитавин̃н̃а̄н̣ато сати уппаджджати? йамхи дуккха̄пито, ‘амукасмим̣ евам̣ дуккха̄пито’ти сарати, евам̣ ахитавин̃н̃а̄н̣ато сати уппаджджати.

‘‘катхам̣ сабха̄ганимиттато сати уппаджджати? садисам̣ пуггалам̣ дисва̄ ма̄тарам̣ ва̄ питарам̣ ва̄ бха̄тарам̣ ва̄ бхагиним̣ ва̄ сарати, от̣т̣хам̣ ва̄ гон̣ам̣ ва̄ гадрабхам̣ ва̄ дисва̄ ан̃н̃ам̣ та̄дисам̣ от̣т̣хам̣ ва̄ гон̣ам̣ ва̄ гадрабхам̣ ва̄ сарати, евам̣ сабха̄ганимиттато сати уппаджджати.

‘‘катхам̣ висабха̄ганиматтато сати уппаджджати? асукасса на̄ма ван̣н̣о едисо, саддо едисо, гандхо едисо, расо едисо, пхот̣т̣хаббо едисоти сарати, евампи висабха̄ганимиттатопи сати уппаджджати.

‘‘катхам̣ катха̄бхин̃н̃а̄н̣ато сати уппаджджати? йо пакатийа̄ мут̣т̣хассатико хоти, там̣ паре сара̄пенти, тена со сарати, евам̣ катха̄бхин̃н̃а̄н̣ато сати уппаджджати.

‘‘катхам̣ лаккхан̣ато сати уппаджджати? йо пакатийа̄ балӣбадда̄нам̣ ан̇гена джа̄на̄ти, лаккхан̣ена джа̄на̄ти, евам̣ лаккхан̣ато сати уппаджджати.

‘‘катхам̣ са̄ран̣ато сати уппаджджати? йо пакатийа̄ мут̣т̣хассатико хоти, йо там̣ ‘сара̄хи бхо, сара̄хи бхо’ти пунаппунам̣ сара̄пети, евам̣ са̄ран̣ато сати уппаджджати.

‘‘катхам̣ мудда̄то сати уппаджджати? липийа̄ сиккхитатта̄ джа̄на̄ти ‘имасса аккхарасса анантарам̣ имам̣ аккхарам̣ ка̄табба’нти евам̣ мудда̄то сати уппаджджати.

‘‘катхам̣ ган̣ана̄то сати уппаджджати? ган̣ана̄йа сиккхитатта̄ ган̣ака̄ бахумпи ган̣енти, евам̣ ган̣ана̄то сати уппаджджати.

‘‘катхам̣ дха̄ран̣ато сати уппаджджати? дха̄ран̣а̄йа сиккхитатта̄ дха̄ран̣ака̄ бахумпи дха̄ренти, евам̣ дха̄ран̣ато сати уппаджджати.

‘‘катхам̣ бха̄вана̄то сати уппаджджати? идха бхиккху анекавихитам̣ пуббенива̄сам̣ ануссарати, сеййатхӣдам̣, екампи джа̄тим̣ двепи джа̄тийо…пе… ити са̄ка̄рам̣ сауддесам̣ пуббенива̄сам̣ ануссарати, евам̣ бха̄вана̄то сати уппаджджати.

‘‘катхам̣ поттхаканибандханато сати уппаджджати? ра̄джа̄но ануса̄санийам̣ ассаранта̄ [ануссаранта̄ (саббаттха)] етам̣ поттхакам̣ а̄харатха̄ти, тена поттхакена ануссаранти, евам̣ поттхаканибандханато сати уппаджджати.

‘‘катхам̣ упаниккхепато сати уппаджджати? упаниккхиттам̣ бхан̣д̣ам̣ дисва̄ сарати, евам̣ упаниккхепато сати уппаджджати.

‘‘катхам̣ анубхӯтато сати уппаджджати? дит̣т̣хатта̄ рӯпам̣ сарати, сутатта̄ саддам̣ сарати, гха̄йитатта̄ гандхам̣ сарати, са̄йитатта̄ расам̣ сарати, пхут̣т̣хатта̄ пхот̣т̣хаббам̣ сарати, вин̃н̃а̄татта̄ дхаммам̣ сарати, евам̣ анубхӯтато сати уппаджджати. имехи кхо, маха̄ра̄джа, саттарасаха̄ка̄рехи сати уппаджджатӣ’’ти.

‘‘каллоси, бханте на̄гасена̄’’ти.

сатиуппаджджанапан̃хо пат̣хамо.