9. сам̣са̄рапан̃хо

9. ра̄джа̄ а̄ха ‘‘бханте на̄гасена, йам̣ панетам̣ брӯси ‘сам̣са̄ро’ти, катамо со сам̣са̄ро’’ти? ‘‘идха, маха̄ра̄джа, джа̄то идхева марати, идха мато ан̃н̃атра уппаджджати, тахим̣ джа̄то тахим̣ йева марати, тахим̣ мато ан̃н̃атра уппаджджати, евам̣ кхо, маха̄ра̄джа, сам̣са̄ро хотӣ’’ти. ‘‘опаммам̣ карохӣ’’ти. ‘‘йатха̄, маха̄ра̄джа, кочидева пурисо паккам̣ амбам̣ кха̄дитва̄ ат̣т̣хим̣ ропеййа, тато маханто амбаруккхо ниббаттитва̄ пхала̄ни дадеййа, атха со пурисо татопи паккам̣ амбам̣ кха̄дитва̄ ат̣т̣хим̣ ропеййа, татопи маханто амбаруккхо ниббаттитва̄ пхала̄ни дадеййа, еваметесам̣ руккха̄нам̣ кот̣и на пан̃н̃а̄йати, евамева кхо, маха̄ра̄джа, идха джа̄то идхева марати, идха мато ан̃н̃атра уппаджджати, тахим̣ джа̄то тахим̣ йева марати, тахим̣ мато ан̃н̃атра уппаджджати, евам̣ кхо, маха̄ра̄джа, сам̣са̄ро хотӣ’’ти.

‘‘каллоси, бханте на̄гасена̄’’ти.

сам̣са̄рапан̃хо навамо.