5. асан̇каманапат̣исандаханапан̃хо

5. ра̄джа̄ а̄ха ‘‘бханте на̄гасена, на ча сан̇камати пат̣исандахати ча̄’’ти? ‘‘а̄ма, маха̄ра̄джа, на ча сан̇камати пат̣исандахати ча̄’’ти. ‘‘катхам̣, бханте на̄гасена, на ча сан̇камати пат̣исандахати ча, опаммам̣ карохӣ’’ти? ‘‘йатха̄, маха̄ра̄джа, кочидева пурисо падӣпато падӣпам̣ падӣпеййа, ким̣ну кхо со, маха̄ра̄джа, падӣпо падӣпамха̄ сан̇канто’’ти? ‘‘на хи, бханте’’ти. ‘‘евамева кхо, маха̄ра̄джа, на ча сан̇камати пат̣исандахати ча̄’’ти.

‘‘бхиййо опаммам̣ карохӣ’’ти. ‘‘абхиджа̄на̄си ну, твам̣ маха̄ра̄джа, дахарако санто силока̄чарийасса сантике кин̃чи силокам̣ гахита’’нти? ‘‘а̄ма, бханте’’ти. ‘‘ким̣ну кхо, маха̄ра̄джа, со силоко а̄чарийамха̄ сан̇канто’’ти? ‘‘на хи, бханте’’ти. ‘‘евамева кхо, маха̄ра̄джа, на ча сан̇камати пат̣исандахати ча̄ти.

‘‘каллоси, бханте на̄гасена̄’’ти.

асан̇каманапат̣исандаханапан̃хо пан̃чамо.