1. пхасса̄дивиниббхуджанапан̃хо

1. ра̄джа̄ а̄ха ‘‘бханте на̄гасена, сакка̄ имесам̣ дхамма̄нам̣ екатобха̄вагата̄нам̣ виниббхуджитва̄ виниббхуджитва̄ на̄на̄каран̣ам̣ пан̃н̃а̄петум̣ ‘айам̣ пхассо, айам̣ ведана̄, айам̣ сан̃н̃а̄, айам̣ четана̄, идам̣ вин̃н̃а̄н̣ам̣, айам̣ витакко, айам̣ вича̄ро’ти’’? ‘‘на сакка̄, маха̄ра̄джа, имесам̣ дхамма̄нам̣ екатобха̄вагата̄нам̣ виниббхуджитва̄ виниббхуджитва̄ на̄на̄каран̣ам̣ пан̃н̃а̄петум̣ ‘айам̣ пхассо, айам̣ ведана̄, айам̣ сан̃н̃а̄, айам̣ четана̄, идам̣ вин̃н̃а̄н̣ам̣, айам̣ витакко, айам̣ вича̄ро’’’ти.

‘‘опаммам̣ карохӣ’’ти. ‘‘йатха̄, маха̄ра̄джа, ран̃н̃о сӯдо арасам̣ ва̄ расам̣ ва̄ [йӯсам̣ ва̄ расам̣ ва̄ (сӣ. сйа̄. пӣ.)] кареййа, со таттха дадхимпи паккхипеййа, лон̣ампи паккхипеййа, син̇гиверампи паккхипеййа, джӣракампи паккхипеййа, маричампи паккхипеййа, ан̃н̃а̄нипи пака̄ра̄ни паккхипеййа, таменам̣ ра̄джа̄ евам̣ вадеййа, ‘дадхисса ме расам̣ а̄хара, лон̣асса ме расам̣ а̄хара, син̇гиверасса ме расам̣ а̄хара, джӣракасса ме расам̣ а̄хара, маричасса ме расам̣ а̄хара, саббесам̣ ме паккхитта̄нам̣ расам̣ а̄хара̄’ти. сакка̄ ну кхо, маха̄ра̄джа, тесам̣ раса̄нам̣ екатобха̄вагата̄нам̣ виниббхуджитва̄ виниббхуджитва̄ расам̣ а̄харитум̣ амбилаттам̣ ва̄ лаван̣аттам̣ ва̄ титтакаттам̣ ва̄ кат̣укаттам̣ ва̄ каса̄йаттам̣ ва̄ мадхураттам̣ ва̄’’ти? ‘‘на хи, бханте, сакка̄ тесам̣ раса̄нам̣ екатобха̄вагата̄нам̣ виниббхуджитва̄ виниббхуджитва̄ расам̣ а̄харитум̣ амбилаттам̣ ва̄ лаван̣аттам̣ ва̄ титтакаттам̣ ва̄ кат̣укаттам̣ ва̄ каса̄йаттам̣ ва̄ мадхураттам̣ ва̄, апи ча кхо пана сакена сакена лаккхан̣ена упат̣т̣хахантӣ’’ти. ‘‘евамева кхо, маха̄ра̄джа, на сакка̄ имесам̣ дхамма̄нам̣ екатобха̄вагата̄нам̣ виниббхуджитва̄ виниббхуджитва̄ на̄на̄каран̣ам̣ пан̃н̃а̄петум̣ ‘айам̣ пхассо, айам̣ ведана̄, айам̣ сан̃н̃а̄, айам̣ четана̄, идам̣ вин̃н̃а̄н̣ам̣, айам̣ витакко, айам̣ вича̄ро’ти, апи ча кхо пана сакена сакена лаккхан̣ена упат̣т̣хахантӣ’’ти.

‘‘каллоси, бханте на̄гасена̄’’ти.

пхасса̄дивиниббхуджанапан̃хо пат̣хамо.