3. вӣмам̣санапан̃хо

3. ра̄джа̄ а̄ха ‘‘бханте на̄гасена, саллаписсаси майа̄ саддхи’’нти? ‘‘саче, твам̣ маха̄ра̄джа, пан̣д̣итава̄дам̣ [пан̣д̣итава̄да̄ (сӣ. пӣ.)] саллаписсаси саллаписса̄ми, саче пана ра̄джава̄дам̣ саллаписсаси на саллаписса̄мӣ’’ти. ‘‘катхам̣, бханте на̄гасена, пан̣д̣ита̄ саллапантӣ’’ти? ‘‘пан̣д̣ита̄нам̣ кхо, маха̄ра̄джа, салла̄пе а̄вет̣ханампи кайирати, ниббет̣ханампи кайирати, ниггахопи кайирати, пат̣икаммампи кайирати, висса̄сопи [висесопи (сӣ. пӣ.)] кайирати, пат̣ивисса̄сопи кайирати, на ча тена пан̣д̣ита̄ куппанти, евам̣ кхо, маха̄ра̄джа, пан̣д̣ита̄ саллапантӣ’’ти. ‘‘катхам̣ пана, бханте, ра̄джа̄но саллапантӣ’’ти? ‘‘ра̄джа̄но кхо, маха̄ра̄джа, салла̄пе екам̣ ваттхум̣ пат̣иджа̄нанти, йо там̣ ваттхум̣ виломети, тасса дан̣д̣ам̣ а̄н̣а̄пенти ‘имасса дан̣д̣ам̣ пан̣етха̄’ти, евам̣ кхо, маха̄ра̄джа, ра̄джа̄но саллапантӣ’’ти. ‘‘пан̣д̣итава̄да̄хам̣, бханте, саллаписса̄ми, но ра̄джава̄дам̣, виссат̣т̣хо бхаданто саллапату йатха̄ бхиккхуна̄ ва̄ са̄ман̣ерена ва̄ упа̄сакена ва̄ а̄ра̄микена ва̄ саддхим̣ саллапати, евам̣ виссат̣т̣хо бхаданто саллапату ма̄ бха̄йатӯ’’ти. ‘‘сут̣т̣ху маха̄ра̄джа̄’’ти тхеро аббха̄нумоди.

ра̄джа̄ а̄ха ‘‘бханте на̄гасена, пуччхисса̄мӣ’’ти. ‘‘пуччха маха̄ра̄джа̄’’ти. ‘‘пуччхитоси ме бханте’’ти. ‘‘висаджджитам̣ маха̄ра̄джа̄’’ти. ‘‘ким̣ пана, бханте, тайа̄ висаджджита’’нти? ‘‘ким̣ пана, маха̄ра̄джа, тайа̄ пуччхита’’нти.

вӣмам̣санапан̃хо татийо.