420. суман̇галаджа̄такам̣ (4)

27. бхусамхи [бхусампи (ка.), бхусам̣ хи (сӣ. ниййа)] куддхоти авеккхийа̄на, на та̄ва дан̣д̣ам̣ пан̣айеййа иссаро;

ат̣т̣ха̄насо аппатирӯпаматтано, парасса дуккха̄ни бхусам̣ удӣрайе.

28. йато ча джа̄неййа паса̄даматтано, аттхам̣ нийун̃джеййа парасса дуккат̣ам̣;

тада̄йаматтхоти сайам̣ авеккхийа, атхасса дан̣д̣ам̣ садисам̣ нивесайе.

29. на ча̄пи джха̄пети парам̣ на аттанам̣, амуччхито йо найате найа̄найам̣;

йо дан̣д̣адха̄ро бхаватӣдха иссаро, са ван̣н̣агутто сирийа̄ на дхам̣сати.

30. йе кхаттийа̄ се анисаммака̄рино, пан̣енти дан̣д̣ам̣ сахаса̄ памуччхита̄;

аван̣н̣асам̣йута̄ [йутта̄ва (ка.)] джаханти джӣвитам̣, ито вимутта̄пи ча йанти дуггатим̣.

31. дхамме ча йе арийаппаведите рата̄, ануттара̄ те вачаса̄ манаса̄ каммуна̄ ча;

те сантисораччасама̄дхисан̣т̣хита̄, ваджанти локам̣ дубхайам̣ татха̄видха̄.

32. ра̄джа̄хамасми нарапамада̄намиссаро, сачепи куджджха̄ми т̣хапеми аттанам̣;

ниседхайанто джанатам̣ татха̄видхам̣, пан̣еми дан̣д̣ам̣ анукампа йонисо.

33. сирӣ ча лаккхӣ ча тавева кхаттийа, джана̄дхипа ма̄ виджахи куда̄чанам̣;

аккодхано ниччапасанначитто, анӣгхо тувам̣ вассасата̄ни па̄лайа.

34. гун̣ехи етехи упета кхаттийа, т̣хитамарийаваттӣ [ватти (сӣ.), вутти (ка.)] сувачо акодхано;

сукхӣ ануппӣл̣а паса̄самединим̣ [ануппӣл̣ам̣ сахасамеданим̣ (ка.)], ито вимуттопи ча йа̄хи суггатим̣.

35. евам̣ сунӣтена [сувинӣтена (пӣ.)] субха̄ситена, дхаммена н̃а̄йена упа̄йасо найам̣;

нибба̄пайе сан̇кхубхитам̣ маха̄джанам̣, маха̄ва мегхо салилена медининти [меданинти (сйа̄. ка.)].

суман̇галаджа̄такам̣ чатуттхам̣.