401. пан̣н̣акаджа̄такам̣ (7-1-6)

39. пан̣н̣акам̣ [дасан̣н̣акам̣ (сӣ. сйа̄. пӣ.)] тикхин̣адха̄рам̣, асим̣ сампаннапа̄йинам̣;

париса̄йам̣ пурисо гилати, ким̣ дуккаратарам̣ тато;

йадан̃н̃ам̣ дуккарам̣ т̣ха̄нам̣, там̣ ме аккха̄хи пуччхито.

40. гилеййа пурисо лобха̄, асим̣ сампаннапа̄йинам̣;

йо ча ваджджа̄ дада̄мӣти, там̣ дуккаратарам̣ тато;

саббан̃н̃ам̣ сукарам̣ т̣ха̄нам̣, евам̣ джа̄на̄хи маддава [ма̄гадха (сӣ. сйа̄. пӣ.)].

41. бйа̄ка̄си а̄йуро пан̃хам̣, аттхам̣ [аттха (пӣ. сӣ. ниййа)] дхаммасса ковидо;

пуккусам̣ да̄ни пуччха̄ми, ким̣ дуккаратарам̣ тато;

йадан̃н̃ам̣ дуккарам̣ т̣ха̄нам̣, там̣ ме аккха̄хи пуччхито.

42. на ва̄чамупаджӣванти, апхалам̣ гирамудӣритам̣;

йо ча датва̄ ава̄кайира̄, там̣ дуккаратарам̣ тато;

саббан̃н̃ам̣ сукарам̣ т̣ха̄нам̣, евам̣ джа̄на̄хи маддава.

43. бйа̄ка̄си пуккусо пан̃хам̣, аттхам̣ дхаммасса ковидо;

сенакам̣ да̄ни пуччха̄ми, ким̣ дуккаратарам̣ тато;

йадан̃н̃ам̣ дуккарам̣ т̣ха̄нам̣, там̣ ме аккха̄хи пуччхито.

44. дадеййа пурисо да̄нам̣, аппам̣ ва̄ йади ва̄ бахум̣;

йо ча датва̄ на̄нутаппе [тапе (сӣ. пӣ.)], там̣ дуккаратарам̣ тато;

саббан̃н̃ам̣ сукарам̣ т̣ха̄нам̣, евам̣ джа̄на̄хи маддава.

45. бйа̄ка̄си а̄йуро пан̃хам̣, атхо пуккусапорисо;

саббе пан̃хе атибхоти, йатха̄ бха̄сати сенакоти.

пан̣н̣ака [дасан̣н̣ака (сӣ. сйа̄. пӣ.)] джа̄такам̣ чхат̣т̣хам̣.