402. саттубхастаджа̄такам̣ (7-1-7)

46. виббхантачитто купитиндрийоси, неттехи те ва̄риган̣а̄ саванти;

ким̣ те нат̣т̣хам̣ ким̣ пана паттхайа̄но, идха̄гама̄ брахме тадин̇гха [бра̄хман̣а ин̇гха (сӣ. сйа̄.)] брӯхи.

47. миййетха бхарийа̄ ваджато мамаджджа, агаччхато маран̣ама̄ха йаккхо;

етена дуккхена паведхитосми, аккха̄хи ме сенака етаматтхам̣.

48. бахӯни т̣ха̄на̄ни вичинтайитва̄, йаметтха ваккха̄ми тадева саччам̣;

ман̃н̃а̄ми те бра̄хман̣а саттубхастам̣, аджа̄нато кан̣хасаппо павит̣т̣хо.

49. а̄да̄йа дан̣д̣ам̣ парисумбха бхастам̣, пассел̣амӯгам̣ урагам̣ дудживхам̣ [дидживхам̣ (сӣ. пӣ.)];

чхиндаджджа кан̇кхам̣ вичикиччхита̄ни, бхуджан̇гамам̣ пасса памун̃ча бхастам̣.

50. сам̣виггарӯпо париса̄йа маджджхе, со бра̄хман̣о саттубхастам̣ памун̃чи;

атха никкхами ураго уггатеджо, а̄сӣвисо саппо пхан̣ам̣ каритва̄.

51. суладдхала̄бха̄ джанакасса ран̃н̃о, йо пассатӣ сенакам̣ са̄дхупан̃н̃ам̣;

виват̣т̣ачхаддо [виваттаччхаддо (сӣ.), виват̣т̣аччхадо (сйа̄.), виват̣т̣аччхадда̄ (пӣ.)] нуси саббадассӣ, н̃а̄н̣ам̣ ну те бра̄хман̣а бхим̣сарӯпам̣.

52. има̄ни ме саттасата̄ни аттхи, ган̣ха̄хи сабба̄ни дада̄ми туйхам̣;

тайа̄ хи ме джӣвитамаджджа ладдхам̣, атхопи бхарийа̄йа мака̄си соттхим̣.

53. на пан̣д̣ита̄ ветанама̄дийанти, читра̄хи га̄тха̄хи субха̄сита̄хи;

итопи те брахме даданту виттам̣, а̄да̄йа твам̣ гаччха сакам̣ никетанти.

саттубхастаджа̄такам̣ [сенакаджа̄такам̣ (сйа̄.)] саттамам̣.