510. айогхараджа̄такам̣ (14)
363. йамекараттим̣ пат̣хамам̣, габбхе васати ма̄н̣аво;
аббхут̣т̣хитова со йа̄ти [сайати (сӣ. пӣ.), са йа̄ти (каттхачи)], сагаччхам̣ на ниваттати.
364. на йуджджхама̄на̄ на баленавассита̄, нара̄ на джӣранти на ча̄пи миййаре;
саббам̣ хидам̣ [хи там̣ (сӣ. пӣ.)] джа̄тиджара̄йупаддутам̣, там̣ ме матӣ хоти чара̄ми дхаммам̣.
365. чатуран̇гиним̣ сенам̣ субхим̣сарӯпам̣, джайанти рат̣т̣ха̄дхипатӣ пасайха;
на маччуно джайитумуссаханти, там̣ ме матӣ хоти чара̄ми дхаммам̣.
366. хаттхӣхи ассехи ратхехи паттибхи, парива̄рита̄ муччаре екаччеййа̄ [екачеййа̄ (сӣ. пӣ.)];
на маччуно [на маччуто (сӣ.)] муччитумуссаханти, там̣ ме матӣ хоти чара̄ми дхаммам̣.
367. хаттхӣхи ассехи ратхехи паттибхи, сӯра̄ [пура̄ (ка.)] пабхан̃джанти падхам̣сайанти;
на маччуно бхан̃джитумуссаханти, там̣ ме матӣ хоти чара̄ми дхаммам̣.
368. матта̄ гаджа̄ бхиннагал̣а̄ [пабхиннагала̄ (сӣ.)] пабхинна̄, нагара̄ни мадданти джанам̣ хананти;
на маччуно маддитумуссаханти, там̣ ме матӣ хоти чара̄ми дхаммам̣.
369. исса̄сино катахаттха̄пи вӣра̄ [вӣра̄ (сӣ. пӣ.)], дӯрепа̄тӣ [патӣ (ка.)] аккхан̣аведхинопи;
на маччуно виджджхитумуссаханти, там̣ ме матӣ хоти чара̄ми дхаммам̣.
370. сара̄ни кхӣйанти саселака̄нана̄, саббам̣ хидам̣ [хи там̣ (сӣ. пӣ.), питам̣ (сйа̄.)] кхӣйати дӣгхамантарам̣;
саббам̣ хидам̣ [хи там̣ (сӣ. пӣ.), питам̣ (сйа̄.)] бхан̃джаре ка̄лапарийа̄йам̣, там̣ ме матӣ хоти чара̄ми дхаммам̣.
371. саббе самевам̣ хи нара̄нана̄ринам̣ [нара̄нарӣнам̣ (пӣ.), на̄рӣ нара̄нам̣ (сйа̄.), нарана̄рӣнам̣ (ка.)], чала̄чалам̣ па̄н̣абхунодха джӣвитам̣;
пат̣ова дхуттасса думова кӯладжо, там̣ ме матӣ хоти чара̄ми дхаммам̣.
372. думаппхала̄нева патанти ма̄н̣ава̄, дахара̄ ча вуддха̄ ча сарӣрабхеда̄;
на̄рийо нара̄ маджджхимапориса̄ ча, там̣ ме матӣ хоти чара̄ми дхаммам̣.
373. на̄йам̣ вайо та̄ракара̄джасаннибхо, йадаббхатӣтам̣ гатамева да̄ни там̣;
джин̣н̣асса хӣ наттхи ратӣ куто сукхам̣, там̣ ме матӣ хоти чара̄ми дхаммам̣.
374. йаккха̄ писа̄ча̄ атхава̄пи пета̄, купита̄те [купита̄пи те (сӣ. пӣ.)] ассасанти мануссе;
на маччуно ассаситуссаханти, там̣ ме матӣ хоти чара̄ми дхаммам̣.
375. йаккхе писа̄че атхава̄пи пете, купитепи те ниджджхапанам̣ каронти;
на маччуно ниджджхапанам̣ каронти, там̣ ме матӣ хоти чара̄ми дхаммам̣.
376. апара̄дхаке дӯсаке хет̣хаке ча, ра̄джа̄но дан̣д̣енти видитва̄на досам̣;
на маччуно дан̣д̣айитуссаханти, там̣ ме матӣ хоти чара̄ми дхаммам̣.
377. апара̄дхака̄ дӯсака̄ хет̣т̣хака̄ ча, лабханти те ра̄джино ниджджхапетум̣;
на маччуно ниджджхапанам̣ каронти, там̣ ме матӣ хоти чара̄ми дхаммам̣.
378. на кхаттийоти на ча бра̄хман̣оти, на ад̣д̣хака̄ балава̄ теджава̄пи;
на маччура̄джасса апеккхаматтхи, там̣ ме матӣ хоти чара̄ми дхаммам̣.
379. сӣха̄ ча бйаггха̄ ча атхопи дӣпийо, пасайха кха̄данти виппхандама̄нам̣;
на маччуно кха̄дитумуссаханти, там̣ ме матӣ хоти чара̄ми дхаммам̣.
380. ма̄йа̄ка̄ра̄ ран̇гамаджджхе каронта̄, мохенти чаккхӯни джанасса та̄ваде;
на маччуно мохайитуссаханти, там̣ ме матӣ хоти чара̄ми дхаммам̣.
381. а̄сӣвиса̄ купита̄ уггатеджа̄, д̣ам̣санти ма̄рентипи те мануссе;
на маччуно д̣ам̣ситумуссаханти, там̣ ме матӣ хоти чара̄ми дхаммам̣.
382. а̄сӣвиса̄ купита̄ йам̣ д̣ам̣санти, тикиччхака̄ теса висам̣ хананти;
на маччуно дат̣т̣хависам̣ [дат̣т̣хасса висам̣ (ка.)] хананти, там̣ ме матӣ хоти чара̄ми дхаммам̣.
383. дхаммантарӣ веттаран̣ӣ [ветаран̣ӣ (сӣ. пӣ.)] ча бходжо, виса̄ни хантва̄на бхуджан̇гама̄нам̣;
суййанти те ка̄лаката̄ татхева, там̣ ме матӣ хоти чара̄ми дхаммам̣.
384. виджджа̄дхара̄ гхорамадхӣйама̄на̄, адассанам̣ осадхехи ваджанти;
на маччура̄джасса ваджантадассанам̣ [ваджанти адассанам̣ (сйа̄. ка.)], там̣ ме матӣ хоти чара̄ми дхаммам̣.
385. дхаммо хаве раккхати дхаммача̄рим̣, дхаммо сучин̣н̣о сукхама̄ваха̄ти;
еса̄нисам̣со дхамме сучин̣н̣е, на дуггатим̣ гаччхати дхаммача̄рӣ.
386. на хи дхаммо адхаммо ча, убхо самавипа̄кино;
адхаммо нирайам̣ нети, дхаммо па̄пети суггатинти.
айогхараджа̄такам̣ чуддасамам̣.
тассудда̄нам̣ –
ма̄тан̇га самбхӯта сиви сириманто, рохан̣а хам̣са саттигумбо бхалла̄тийа;
соманасса чампеййа брахма пан̃ча-пан̣д̣ита чирассам̣вата айогхара̄ти.
вӣсатинипа̄там̣ нит̣т̣хитам̣.