480. акиттиджа̄такам̣ (7)

83. акиттим̣ [акаттим̣ (ка.)] дисва̄ саммантам̣, сакко бхӯтапатӣ брави;

ким̣ паттхайам̣ маха̄брахме, еко саммаси гхаммани.

84. дуккхо пунаббхаво сакка, сарӣрасса ча бхеданам̣;

саммохамаран̣ам̣ дуккхам̣, тасма̄ самма̄ми ва̄сава.

85. етасмим̣ те сулапите, патирӯпе субха̄сите;

варам̣ кассапа те дамми, йам̣ кин̃чи манасиччхаси.

86. варам̣ че ме адо сакка, саббабхӯта̄намиссара;

йена путте ча да̄ре ча, дханадхан̃н̃ам̣ пийа̄ни ча;

ладдха̄ нара̄ на [ладдха̄ нан̃н̃а̄ни (ка.)] таппанти, со лобхо на майӣ васе.

87. етасмим̣ те сулапите, патирӯпе субха̄сите;

варам̣ кассапа те дамми, йам̣ кин̃чи манасиччхаси.

88. варам̣ че ме адо сакка, саббабхӯта̄намиссара;

кхеттам̣ ваттхум̣ хиран̃н̃ан̃ча, гавассам̣ да̄сапорисам̣;

йена джа̄тена джӣйанти, со досо на майӣ васе.

89. етасмим̣ те сулапите, патирӯпе субха̄сите;

варам̣ кассапа те дамми, йам̣ кин̃чи манасиччхаси.

90. варам̣ че ме адо сакка, саббабхӯта̄намиссара;

ба̄лам̣ на пассе на сун̣е, на ча ба̄лена сам̣васе;

ба̄леналла̄па [ба̄лена̄’ла̄па (?)] салла̄пам̣, на каре на ча рочайе.

91. ким̣ ну те акарам̣ ба̄ло, вада кассапа ка̄ран̣ам̣;

кена кассапа ба̄ласса, дассанам̣ на̄бхикан̇кхаси.

92. анайам̣ найати думмедхо, адхура̄йам̣ нийун̃джати;

дуннайо сеййасо хоти, самма̄ вутто пакуппати;

винайам̣ со на джа̄на̄ти, са̄дху тасса адассанам̣.

93. етасмим̣ те сулапите, патирӯпе субха̄сите;

варам̣ кассапа те дамми, йам̣ кин̃чи манасиччхаси.

94. варам̣ че ме адо сакка, саббабхӯта̄намиссара;

дхӣрам̣ пассе сун̣е дхӣрам̣, дхӣрена саха сам̣васе;

дхӣреналла̄пасалла̄пам̣, там̣ каре тан̃ча рочайе.

95. ким̣ ну те акарам̣ дхӣро, вада кассапа ка̄ран̣ам̣;

кена кассапа дхӣрасса, дассанам̣ абхикан̇кхаси.

96. найам̣ найати медха̄вӣ, адхура̄йам̣ на йун̃джати;

сунайо сеййасо хоти, самма̄ вутто на куппати;

винайам̣ со паджа̄на̄ти, са̄дху тена сама̄гамо.

97. етасмим̣ те сулапите, патирӯпе субха̄сите;

варам̣ кассапа те дамми, йам̣ кин̃чи манасиччхаси.

98. варам̣ че ме адо сакка, саббабхӯта̄намиссара;

тато ратйа̄ виваса̄не [вивасане (сӣ. сйа̄. пӣ.)], сӯрийуггаманам̣ [сурийассуггаманам̣ (сӣ. сйа̄. пӣ.)] пати;

дибба̄ бхаккха̄ па̄тубхавеййум̣, сӣлаванто ча йа̄чака̄.

99. дадато ме [дадато ча ме (пӣ.)] на кхӣйетха, датва̄ на̄нутапеййахам̣;

дадам̣ читтам̣ паса̄деййам̣, етам̣ сакка варам̣ варе.

100. етасмим̣ те сулапите, патирӯпе субха̄сите;

варам̣ кассапа те дамми, йам̣ кин̃чи манасиччхаси.

101. варам̣ че ме адо сакка, саббабхӯта̄намиссара;

на мам̣ пуна упеййа̄си, етам̣ сакка варам̣ варе.

102. бахӯхи ватачарийа̄хи [ваттачарийа̄хи (сӣ. сйа̄. ка.)], нара̄ ча атха на̄рийо;

дассанам̣ абхикан̇кханти, ким̣ ну ме дассане бхайам̣.

103. там̣ та̄дисам̣ деваван̣н̣ам̣ [деваван̣н̣им̣ (пӣ.)], саббака̄масамиддхинам̣;

дисва̄ тапо памаджджеййа [дисва̄ тапо памаджджеййам̣ (сӣ. сйа̄. пӣ.), дисва̄нахам̣ памаджджеййам̣ (чарийа̄пит̣акат̣т̣хакатха̄)], етам̣ те дассане бхайанти.

акиттиджа̄такам̣ саттамам̣.