473. митта̄миттаджа̄такам̣ (10)

121. ка̄ни камма̄ни кубба̄нам̣, катхам̣ вин̃н̃ӯ параккаме;

амиттам̣ джа̄неййа медха̄вӣ, дисва̄ сутва̄ ча пан̣д̣ито.

122. на нам̣ умхайате дисва̄, на ча нам̣ пат̣инандати;

чаккхӯни часса [чаккхӯнисса (сйа̄. ка.)] на дада̄ти, пат̣иломан̃ча ваттати.

123. амитте тасса бхаджати, митте тасса на севати;

ван̣н̣ака̄ме нива̄рети, аккосанте пасам̣сати.

124. гуйхан̃ча тасса наккха̄ти, тасса гуйхам̣ на гӯхати;

каммам̣ тасса на ван̣н̣ети, пан̃н̃асса наппасам̣сати.

125. абхаве нандати тасса, бхаве тасса на нандати;

аччхерам̣ [аччхарийам̣ (сӣ. сйа̄. пӣ.)] бходжанам̣ ладдха̄, тасса нуппаджджате сати;

тато нам̣ на̄нукампати, ахо сопи [аха̄сопи (ка. сӣ. сйа̄. ка.)] лабхеййито.

126. иччете сол̣аса̄ка̄ра̄, амиттасмим̣ патит̣т̣хита̄;

йехи амиттам̣ джа̄неййа, дисва̄ сутва̄ ча пан̣д̣ито.

127. ка̄ни камма̄ни кубба̄нам̣, катхам̣ вин̃н̃ӯ параккаме;

миттам̣ джа̄неййа медха̄вӣ, дисва̄ сутва̄ ча пан̣д̣ито.

128. павуттхам̣ тасса сарати, а̄гатам̣ абхинандати;

тато кела̄йито хоти, ва̄ча̄йа пат̣инандати.

129. митте тассева бхаджати, амитте тасса на севати;

аккосанте нива̄рети, ван̣н̣ака̄ме пасам̣сати.

130. гуйхан̃ча тасса аккха̄ти, тасса гуйхан̃ча гӯхати;

камман̃ча тасса ван̣н̣ети, пан̃н̃ам̣ тасса [пан̃н̃амасса (сйа̄. ка.)] пасам̣сати.

131. бхаве ча нандати тасса [бхаве нандати тасса ча (ка.)], абхаве тасса на нандати;

аччхерам̣ [аччхарийам̣ (сӣ. сйа̄. пӣ.)] бходжанам̣ ладдха̄, тасса уппаджджате сати;

тато нам̣ анукампати, ахо сопи [паха̄сопи (ка. сӣ. сйа̄. ка.)] лабхеййито.

132. иччете сол̣аса̄ка̄ра̄, миттасмим̣ суппатит̣т̣хита̄;

йехи миттан̃ча джа̄неййа [миттам̣ суджа̄неййа (пӣ. ка.)], дисва̄ сутва̄ ча пан̣д̣итоти.

митта̄миттаджа̄такам̣ дасамам̣.

два̄дасаканипа̄там̣ нит̣т̣хитам̣.