466. самуддава̄н̣иджаджа̄такам̣ (3)
25. касанти вапанти те джана̄, мануджа̄ каммапхалӯпаджӣвино;
найимасса дӣпакасса бха̄гино, джамбудӣпа̄ идамева но варам̣.
26. типан̃чараттӯпагатамхи чанде, вего маха̄ хехити са̄гарасса;
уплависсам̣ дӣпамимам̣ ул̣а̄рам̣, ма̄ во вадхӣ гаччхатха лен̣аман̃н̃ам̣.
27. на джа̄туйам̣ са̄гарава̄ривего, уплависсам̣ дӣпамимам̣ ул̣а̄рам̣;
там̣ ме нимиттехи бахӯхи дит̣т̣хам̣, ма̄ бхетха ким̣ сочатха модатхавхо [модатха во (ка.) 6.38 моггалла̄насуттам̣ пасситаббам̣].
28. пахӯтабхаккхам̣ бахуаннапа̄нам̣, паттаттха а̄ва̄самимам̣ ул̣а̄рам̣;
на во бхайам̣ пат̣ипасса̄ми кин̃чи, а̄путтапуттехи памодатхавхо.
29. йо девойам̣ даккхин̣а̄йам̣ [даккхин̣ассам̣ (сӣ.)] диса̄йам̣, кхеманти паккосати тасса саччам̣;
на уттаро веди бхайа̄бхайасса, ма̄ бхетха ким̣ сочатха модатхавхо.
30. йатха̄ име виппаваданти йаккха̄, еко бхайам̣ сам̣сати кхемамеко;
тадин̇гха майхам̣ вачанам̣ сун̣а̄тха, кхиппам̣ лахум̣ ма̄ винассимха саббе.
31. саббе сама̄гамма карома на̄вам̣, дон̣им̣ дал̣хам̣ саббайантӯпапаннам̣;
саче айам̣ даккхин̣о саччама̄ха, могхам̣ пат̣иккосати уттаройам̣;
са̄ чева но хехити а̄падаттха̄, иман̃ча дӣпам̣ на париччаджема.
32. саче ча кхо уттаро саччама̄ха, могхам̣ пат̣иккосати даккхин̣ойам̣;
тамева на̄вам̣ абхируйха саббе, евам̣ майам̣ соттхи тарему па̄рам̣.
33. на ве суган̣хам̣ пат̣хамена сет̣т̣хам̣, канит̣т̣хама̄па̄тхагатам̣ гахетва̄;
йо чӣдха таччхам̣ [маджджхам̣ (сӣ. сйа̄. пӣ.)] павичеййа ган̣хати [ган̣хи (ка.)], са ве наро сет̣т̣хамупети т̣ха̄нам̣.
34. йатха̄пи те са̄гарава̄римаджджхе, сакаммуна̄ соттхи вахим̣су ва̄н̣иджа̄;
ана̄гататтхам̣ пат̣ивиджджхийа̄на, аппампи на̄ччети са бхӯрипан̃н̃о.
35. ба̄ла̄ ча мохена раса̄нугиддха̄, ана̄гатам̣ аппат̣ивиджджхийаттхам̣;
паччуппанне сӣданти аттхаджа̄те, самуддамаджджхе йатха̄ те манусса̄.
36. ана̄гатам̣ пат̣икайира̄тха киччам̣, ‘‘ма̄ мам̣ киччам̣ киччака̄ле бйадхеси’’;
там̣ та̄дисам̣ пат̣иката [пат̣икатам̣ (ка.), пат̣игата (сӣ. ат̣т̣ха.), пат̣икачча (?)] киччака̄рим̣, на там̣ киччам̣ киччака̄ле бйадхетӣти.
самуддава̄н̣иджаджа̄такам̣ татийам̣.